1 Samuel 7 - Qheshwa Biblia DC

¹ Chaypacha Quiriat-jearim llajtapi tiyakojkunaqa rispa Diospa trato cajonninta apakamporqanku. Loma patapi Abinadabpa wasinmantaj apaykorqanku. Wawan Eliazartataj t'aqarqanku chay Señorpa trato cajonninta waqaychanampaj.

Samuelqa Israelta kamachin

² Iskay chunka watasña pasarqa Quiriat-jearimpi Diospa trato cajonninta saqesqankoqa. Chay wataspeqa tukuy Israel ayllu Señorta maytapuni mask'arqanku.

³ Chayrayku Samuelqa tukuynin israelitasman nerqa: Sichus qankuna tukuy sonqowan Señorman kutirikunkichej chayqa, jawaman wijch'unaykichej tiyan chay mana rejsisqa dioskunasta, chay Astartéj lantisnintapis, kausayniykichejtataj Señorllaman qoychej, pay sapallantataj yupaychaychej. Chaymantaraj Señortaqa filisteospa makinmanta kacharichisonqachej.

⁴ Israelitasqa jawaman wijch'orqanku Baalpa lantisninta, jinataj Astartéj lantisnintapis; chaymantataj Señorllataña yupaycharqanku.

⁵ Chaymanta Samuelqa kamacherqa: Tukuy Israel aylluta Mizpa llajtapi tantaykuychej, noqataj Señormanta qankunapaj mañapusqaykichej, nispa.

⁶ Israel aylloqa Mizpa llajtapi tantakorqa, chaypitaj yakuta orqhospa Señorpa ñaupaqenman jich'arqanku. Chay tukuy diaqa ayunarqanku, nerqankutaj: Señorpa contranta juchallikuyku. Chay Mizpa llajtapimari Samuelqa israelitasta kamachinampaj churasqa karqa.

⁷ Maypachachus filisteos yacharqanku israelitas Mizpa llajtapi tantasqas kashasqankuta, chaypacha filisteospa kurajkunasninku wicharerqanku israelitaspa contrampi. Israelitastaj chayta yachaspa mayta mancharikorqanku.

⁸ Chaymantataj Samuelman nerqanku: Señor Diosninchejmanta noqaykupaj mañapullawaykupuni ari, filisteospa atiyninmanta kacharichinawaykupaj.

⁹ Samueltaj uj juch'uy ñuñushaj corderota jap'ispa tukuyninta Señorpaj ruphacherqa, chaymantataj Señormanta yanapata mañaporqa, Señortaj uyarerqa.

¹⁰ Maypachachus Samuelqa chay rikuchikuta Señorpaj ruphachishajtin, filisteosqa israelitaswan maqanakunankupaj chayamorqankupachaña. Chaypacha Señorqa sinch'i qhon qhonkunata filisteospa patanman nichimorqa; paykunata mayta mancharicherqa. Jinamanta paykunaqa israelitaswan atipachikorqanku.

¹¹ Chay ratopacha israelitasqa Mizpamanta llojsiytawan filisteosta wañurachispa qhatiykorqanku Bet-car llajtamanta aswan urakama.

¹² Chaymantataj Samuelqa uj jatun rumita oqharerqa, Mizpa llajtawan Sen llajtawan tinkuypi churarqa. Chay cheqatataj suticharqa Eben-eser, nispa, chay niyta munan: Kaykama Señorqa yanapawarqayku, nispa.

¹³ Filisteosqa atipachikorqanku, manañataj ujtawan israelitaspa jallp'ankuman jamorqankuchu, Samuel kausanankama, Señorqa filisteospa contrampipuni karqa.

¹⁴ Filisteosqa ima llajtastachus israelitasmanta qhechorqanku chaykunata kutichiporqanku Ecron llajtamanta, Gat llajtakama. Jinamanta israelitasqa filisteospa kamachiyninmanta kacharicherqanku, manataj ima ch'ajwapis karqañachu israelitaswan amorreoswanqa.

¹⁵ Samuelqa israelitasta kamacherqa tukuy kausaynimpi.

¹⁶ Sapa watataj rillajpuni Betelman, Gilgalman, jinataj Mizpamampis, israelitas ukhupi ch'ajwajkunata allinyachej.

¹⁷ Chaymantaqa Ramá llajtaman kutimpoj, chaypi wasin kasqanrayku, chaymantapachataj israelitasta kamacherqa. Chaypitaj Señorpaj uj altarta sayaricherqa.