1 Samuel 5 - Qheshwa Biblia DC

Diospa trato cajonnin filisteospa jallp'ampi

¹ Diospa trato cajonninta filisteosqa jap'ikapuytawan apakaporqanku Eben-ezermanta Asdodman.

² Filisteosqa Diospa trato cajonninta apakaporqanku diosninkoj Dagompa yupaychana wasinman, chay diosninkoj ladonmantaj churaykorqanku.

³ Q'ayantin paqarintaj Asdodmanta kajkuna chayamuspaqa rikorqanku chay dios Dagonta pampaman k'umpusqata Diospa trato cajonnimpa ñaupaqempi. Chaypacha Dagonta oqharispa churaykapullarqankutaj maypichus kananman.

⁴ Jinataj q'ayantin paqarin Asdodmanta kajkunaqa, watejmanta jamuspa Dagonta kikillantataj rikorqanku, pampapi k'umpusqata Diospa trato cajonnimpa ñaupaqempi. Uman, chanta iskaynin makisnimpis waj wajpi wijch'usqa rikhureqanku wasi punku yaykuypi, churasqa cuerpollanña qhepakusqa.

⁵ Chayrayku kunankama, Dagompa sacerdotesnenqa yupaychananku wasi punku ura k'aspisman mana saruspalla pasanku, maypachachus Asdodpi yupaychananku wasiman yaykunku chaypacha.

⁶ Chaymantataj Señorqa Asdodpi tiyakojkunata sinch'ita jasut'erqa, maytataj mancharicherqa. Ch'upu onqoykunawan jasut'erqa Asdodpi tiyakojkunata, jinataj chay tukuy jallp'api kausajkunatapis.

⁷ Asdodpi tiyakojkuna kay tukuy imasta rikuspa nerqanku: Diospa trato cajonnenqa, mana noqanchej ukhupeqa kananchu, imaraykuchus noqanchejta sinch'ita jasut'ishawanchej, jinataj diosninchej Dagontapis.

⁸ Chayrayku willacherqanku filisteosmanta tukuy kurajkunaman, paykuna tantanankuta, chaypipis taporqanku: Imanasunchejtaj Israelpa Diosnimpa trato cajonninwanri? Paykunataj kuticherqanku: Gat llajtaman apaychej, nispa. Filisteostaj chayman aparqanku.

⁹ Chayman apasqankutawantaj Señorqa chay llajtata maytapuni mancharicherqa, jasut'iykorqataj ch'upu onqoywan tukuy chay llajtapi tiyakojkunata jatunmanta juch'uykama.

¹⁰ Chay qhepantataj filisteosqa Ecrón llajtamanñataj aparqanku Diospa trato cajonnintaqa. Chay llajtaman chay cajonta chayachejtinkukamataj Ecronmanta kajkunaqa qhaparerqanku: Israelpa trato cajonninta apamushawanchej tukuyninchejta wañurachinawanchejpaj, nispa.

¹¹ Chay llajtamanta kajkunaqa tukuyninku maytapuni mancharikorqanku, Dios paykunata sinch'ita jasut'isqanrayku. Chaypacha wajyachimorqanku filisteospa kurajkunasninkuta, paykunamantaj nerqanku: Kaymanta apakapuychej chay israelitaspa Diosnimpa trato cajonninta, kutichipuychej maymantachus apamorqankichej chayman, ama tukuyninchejta wañuchinawanchejpaj.

¹² Chay runaspa qhaparisqasninkoqa janaj pachakama uyarikorqa. Piskunachus chay onqoywan mana wañorqankuchu, chaykunaqa ch'upu onqoywan junt'a kasharqanku.