1 Samuel 4 - Qheshwa Biblia DC

¹ Chay qhepatataj Samuelqa Señorpa tukuy willasqasninta israelitasman sut'inchaj. Jaqay tiempospi filisteos tantaykukorqanku Israelpa contrampi maqanakunankupaj, chayrayku israelitasqa llojserqanku filisteospa contranta maqanakoj, Eben-ezer qayllapitaj jaraykukorqanku. Filisteostaj Afec llajtapi jarakorqanku.

Diospa trato cajonninta filisteos jap'ikapunku

² Chaymantataj llojserqanku israelitaswan maqanakamunankupaj, maqanaku qallarikojtintaj, filisteosqa israelitasta atipaykorqanku, wañuracherqankutaj tawa waranqa qharista kikin maqanakorqanku chaypi.

³ Maypachachus israelita soldados jarankuman kutiporqanku chaypacha paykunaj kurajkunasninku nerqanku: Imaraykutaj Señorqa filisteoswan atipaykuchiwanchejri? Silomanta apakamusunchej Señorpa trato cajonninta, pay noqanchejpa chaupinchejta rinampaj, enemigosninchejmantataj jark'anawanchejpaj, nispa.

⁴ Israelitas kacharqanku uj t'aqa soldadosta Silomanta apamunankupaj Tukuy Atiyniyoj Señorpa trato cajonninta, Payqa tiyakun querubines nisqa angelespa patampi. Eléj wawasnin Ofni, chanta Fineespis apaysimorqanku Diospa trato cajonninta.

⁵ Jaraman chayachimojtinkutaj Señorpa trato cajonnintaqa, tukuy imata israelitas qhaparerqanku sinch'i kusiywan jallp'ata kharkatichinankukama.

⁶ Filisteosqa chay sinch'ita qhaparisqankuta uyarispa tapurerqanku: Imaraykutaj sinch'i ch'ajwa tiyan hebreospa jarankupiri?, nispa. Yacharqankutaj israelitaspa jarankuman Señorpa trato cajonnin chayamusqanta.

⁷ Filisteosqa mancharikuspa nerqanku: Dios chayamun jarankuman! Imachus kanqa noqanchejwanqa, imaraykuchus ñaupajtaqa mana ajinachu karqa.

⁸ Ay, noqanchejmanta imachus kanqapis. Pitaj jark'awasunman Atiyniyoj Diospa makinman urmananchejmantari? Paymin ch'in pampapi egipciosta tukuy laya jasut'iywan tukucherqa!

⁹ Kallpachakuychej ari filisteo soldados, sinch'itataj maqanakuychej, ama hebreo runaspa kamachisnin kanaykichejpaj, imaynatachus paykuna kamachisniykichej karqanku jinataqa!, nispa.

¹⁰ Filisteosqa maqanakorqanku atiparqankutaj israelitasta. Kaykunataj jarankuman ayqekaporqanku. Chaypacha may ashkhatapuni wañuracherqanku, chay maqanakojkuna israelitasmantaqa kinsa chunka soldados wañorqanku.

¹¹ Diospa trato cajonnintapis apakaporqanku. Elejpa iskaynin wawasninta, Ofnita, Fineesta wañuracherqanku.

¹² Uj soldadotaj Benjamimpa ayllunmanta kaj ayqerqa chay maqanakumanta, sinch'ita rispataj chay kikin diapacha chayarqa Silo llajtaman, p'achasnin llik'irasqa, umampi jallp'a qhalliykusqayoj.

¹³ Chay runa chayamorqa chaypacha Eleqa jatun sillapi tiyasharqa punku qayllapi, ñanta qhawaspa. May llakisqa kasharqa Diospa trato cajonninmanta. Ayqemorqa chay runaqa llajtaman yaykumorqa, willajtinkamataj tukuy llajtamanta kajkuna qhaparerqanku.

¹⁴ Elitaj qhaparejta uyarispa tapurerqa: Ima niytataj munan chay ch'ajwari?, nispa. Chay runataj usqhayllata Eliman willaj rerqa.

¹⁵ Eleqa isq'on chunka pusajniyoj watasniyojña karqa, ñawisnimpis chharpuyapusqaña. Manaña ni imata rikojñachu.

¹⁶ Chay runataj nerqa: Kunallan chayamuni maqanakuna chaynejmanta. Chay maqanakushayku chaynejmanta ayqemorqani. Imataj kay wawáy?, nispa Eleqa taporqa.

¹⁷ Paytaj kuticherqa: Israelitas filisteosmanta ayqenku, nispa. Jinallataj may chhika soldados wañurachisqas kanku, chayllapitaj Ofni, chanta Fineespis wañunku, Diospa trato cajonnimpis filisteospa makinman urman.

¹⁸ Chay willayta apamoj runa, Diospa trato cajonmanta parlajtinkama Eleqa tiyasharqa chay sillamanta wasaman choqakorqa punkunej cheqaman, ashkha watasniyoj llasa kasqanraykutaj kunkanta p'akikuspa wañorqa. Payqa tawa chunka watasta israelitaspa kuraj kamachejnin karqa.

¹⁹ Fineespa warmin, Eléj ñojch'anqa wijsallisqa kasharqa nacechikunampaj jinaña. Maypachachus yacharqa Diospa trato cajonninta filisteos jap'ikapusqankuta, chanta suegron, qosampis wañupusqankuta chaypacha nanay oqharerqa. Mayta wijsa nanaywan q'ewiykachakuspataj nacechikorqa.

²⁰ Chay yanapajkuna warmis payta wañupunayajta rikuspaqa nerqanku: Ama manchachikuychu, uj qhari wawata nacechikunki, nispa. Paytaj mana imatapis kuticherqachu, manataj kasuta ruwarqachu.

^21-22 Wawatataj Icabodta suticharqa, chay niyta munan: Israelqa mana allimpaj qhawasqa qhepakun, Diospa trato cajonninta qhechuchikusqankurayku. Chaywanqa niyta munan Diospa trato cajonnin qhechusqa kasqanta, suegrompa wañusqanta, jinataj qosampa wañusqantapis.