1 Samuel 30 - Qheshwa Biblia DC

David atipaykun amalecitasta

¹ Chay minchhantin diaqa, David chay runasninwan Siclag llajtaman chayarqanku. Chaypitaj rikorqanku amalecitas yaykukamushasqankuta Neguev llajtaman, jinataj Siclag llajtamampis, tukuyta chinkachispa, ninawantaj jap'iykuchisqankuta.

² Ajinallataj presochaspa apasqankuta warmista, wawasta, jatuchajkunata, tukuy chaypi tiyakojkunatawan. Manataj pitapis wañucherqankuchu.

³ David chay runasnimpiwan chay llajtaman chayaspaqa, chay llajtaqa ruphasqa kashasqanta repararqanku. Warmista, qhari wawasnintinta, jinataj warmi wawasnintinta apakapusqankutawan repararqanku.

⁴ May sinch'ita qhaparispataj waqarqanku mana atinankukama.

⁵ Davidpa iskaynin warmisnimpis apasqasllataj kasqanku, Jezreelmanta Ahinoam warmin, jinataj Carmelpi Nabalpa warmin karqa chay Abigail warmimpis.

⁶ Davidqa sinch'i llakisqa kasharqa, chay runasnin payta rumiswan ch'anqaykuyta munasqankurayku. Tukuyninku wawasninkumanta llakisqas kasqankurayku. Chaywampis Davidqa Señor Diosnimpi atienikorqa.

⁷ Davidtaj Ahimelecpa wawan sacerdote Abiatarman nerqa: Chay efod p'achata aparimuway. Abiatartaj efod p'achata Davidman jaywarqa.

⁸ Davidtaj Señorta taporqa: Chay suwa runasta qhatiykuymanchu? Taripayta atiymanchu?, nispa. Señortaj kuticherqa: Qhatiykullay taripankiraj, chay presostapis qhechukapunkiraj, nispa.

⁹ Chay ratopacha Davidqa chay sojta pachaj runasninwan khuska kachaykukorqa, chayarqankutaj Besor wayq'oman. Chaypitaj wakin qhepakorqanku.

¹⁰ Chay wayq'opi qhepakusqanku iskay pachaj soldados sinch'i sayk'usqa kasqankurayku. Tawa pachaj runaswantaj Davidqa ñaupajman rillarqapuni.

¹¹ Chay pampanejman chayaspataj uj egipcio runata tarerqanku. Chanta Davidman pusarqanku, chaypitaj qorqanku mikhunata, jinataj ujyanatapis.

¹² Qollarqankutaj higos k'isamanta uj chhikanta, jinataj uvas chhullchu k'isatawan. Chayta mikhuykuytawan chay egipcioqa yuyayninman kutirisqa. Payqa kinsa diastaña kinsa ch'isitawan mana imatapis mikhusqachu, nitaj ujyasqachu.

¹³ Chaypacha Davidqa taporqa: Pitaj patronniykiri, maymantataj kankiri?, nispa. Chay egipciotaj kuticherqa: Egiptomanta kani uj amalecitaj uywasqan, payqa kinsa diataña onqoykojtiy saqerpariwan.

¹⁴ Noqaykoqa rerqayku qhechuramoj, chay cereteospa jallp'ankumanta uranejman, chanta Judá jallp'aman, Calebpa jallp'anmanwan. Siclag llajtamampis ninata jap'iykuchillarqaykutaj.

¹⁵ Davidtaj kuticherqa: Pusarqowankimanchu chay suwas maypichus kashanku chayman?, nispa. Chay egipcio runataj kuticherqa: Diosniykej sutimpi jurawankiman mana wañuchinawaykita, nitaj patronniymampis jaywanawaykita chayqa, paykunakama pusarqosqayki, nispa.

¹⁶ Pusarqataj maypichus chay suwas kasharqanku chaykama. Chay suwasqa tukuy pampapi ch'eqerasqas sumaj fiestapi kasharqanku, mikhusharqanku, ujyasharqankutaj chay tukuyta suwasqasninkumanta, filisteospa jallp'ankumanta, jinataj Judá jallp'amantapis.

¹⁷ Chaypacha Davidqa tutamantapacha inti yaykunankama paykunawan maqanakorqa, tukuyninkutataj wañuracherqa. Tawa pachaj runaslla camellosninkuman lloq'aykuytawankama ayqerikaporqanku.

¹⁸ Davidtaj qhechorqa chay amalecitaspa tukuy suwasqankuta, iskaynin warmisnintapis qhechukaporqa.

¹⁹ Chay qhechusqas kajkunamantaqa mana imapis qhepakorqachu, ni juch'uy kajmanta, ni qhari wawasmanta, nitaj warmi wawasmantapis. Jinamanta Davidqa tukuyninta qhechorqa.

²⁰ Chanta Davidqa tukuy ovejasta, wakastapis jap'ikapullarqataj. Kay uywasta qhatejkunataj nisharqanku: Kay uywasqa Davidpa qhechusqasnin, nispa.

²¹ Davidqa chay iskay pachaj runasnin sayk'usqas manaña qhatiyta atispa Besor wayq'opi qhepakorqanku chaykunaman chayarqa. Paykunataj Davidta chay waj runasnintawan taripaj llojsimorqanku. Davidtaj paykunaman chayaspa sumajta napaykorqa.

²² Chay wakin runasnenqa sajra sonqoyoj karqanku. Paykunaqa chay qhepakorqanku chaykunapaj rimarqanku. Chay qhechusqanku imasmanta paykunaman mana qonankuta munarqankuchu, manachayqa warmisninkuta, wawasninkutawan imalla, chaywampis paykunata jap'iytawankama ripunankuta nerqanku.

²³ Chaywampis David nerqa: Ama chayta ruwaychejchu munasqa wauqesníy, imapis kachun, Señorninchej chay tukuytaqa qowarqanchej, pay kausayninchejta waqaycharqa, suwawarqanchej chay runastapis pay makisninchejman churarqa.

²⁴ Kay jinamantaqa pitaj chay nisqaykichejta uyarenqari? Rak'inakupeqa kikillantataj jap'enqanku, maqanakuman rejkuna, jarapi chay imasta qhawaspa qhepakojkunapis.

²⁵ Chaymantapacha Israel ukhupeqa kunankama ajinata ruwanku.

²⁶ Davidqa Siclag llajtaman chayaytawan Judá llajtapi kajkuna kausaqesnin ancianosman apacherqa, enemigosninkumanta qhechorqa chay imasta uj chhikata, kay willaytawan: Kay t'inkata qankunaman apachimuykichej, Señorpa enemigosninmanta qhechusqaykumanta uj chhikanta, nispa.

^27-29 Ajinallatataj t'inkasta apacherqa Betelpi kajkunaman, Neguevpi kashan chay Ramotpi kajkunaman, Jatirpi kajkunaman, Areorpi kajkunaman, Sifmotpi kajkunaman, Estemospi kajkunaman, Racalpi kajkunamampis. Apachillarqataj Jerameelpi kajkunaman, chanta quenitasman ima.

^30-31 Hormapi kajkunaman, Corasampi kajkunaman, Atacpi kajkunaman, Hebrompi kajkunaman, chay tukuy maykunapichus paywan runasninwan purisqasninkumampis.