1 Samuel 29 - Qheshwa Biblia DC

Filisteos Davidmanta iskayrayanku

¹ Filisteosqa tukuy soldadosninkuta tantaykorqanku Afec llajtapi, chaykamataj israelitasqa tantakullarqankutaj Jezreel chaynejpi yaku juturi chaypi.

² Filisteo soldadosta pusajkunataj risharqanku t'aqasqas pachajkunapi, waranqaspiwan. Davidwan runasninwantaj Aquiswan khuska qhepallata risharqanku.

³ Chaypacha filisteosmanta kurajkuna Aquista taporqanku: Chay hebreo runas imatataj kaypi ruwashankuri?, nispa. Aquistaj kuticherqa: Kay runajtaqa David sutin, payqa Israel rey Saulpa yanapajnin karqa. Kunanqa uj mashkha watastaña noqawan kashan. Noqawan kasqanmantapacha mana ima pantaytapis paypi tarinichu.

⁴ Chay filisteospa kurajkunasninkutaj Aquispaj phiñakuspa nerqanku: Kunanqa kachapuy maypichus jallp'ata qorqanki chayman, amataj maqanakuman noqanchejwan richunchu, pajtataj kikin maqanakupi enemigosninchejman kutiykukunman. Davidqa, reyninman allinta rijch'ayta munaspa, kay soldadospa umasninta qholusqasta rikuchiyta munanqa!

⁵ Manachu kay Davidmanta tusuykunaspi takej kanku: Saulqa waranqa runasta wañucherqa, Davidtaj chunka waranqa runasta, nispa?

⁶ Chaypacha Aquisqa Davidta wajyarqa, nerqataj: Cheqamanta Señorpa sutimpi jurayki, qanqa uj cheqan sonqoyoj runa kanki! Sinch'ita kusichiwarqa jarapi imaynatachus noqawan kausasqaykeqa. Noqawan tiyakusqaykimantapachaqa, mana ima sajratapis qampi tarerqanichu. Filisteosmanqa mana allimpajchu rijch'anki.

⁷ Kunanqa ch'inmanta kutipullay, jinamanta ama llakichinapaj filisteospa kurajkunasninta.

⁸ Davidtaj Aquisman kuticherqa: Noqaqa imatataj ruwasqaniri? Reyníy, imatataj qanwan kasqaymantapacha ruwasqani chay enemigosniykiwan mana maqanakuman rinaypaj jinari?

⁹ Aquistaj kuticherqa: Noqa cheqamanta yachani, qanqa allin runa kasqaykita Diospa angelninman rijch'akoj. Chaywampis filisteosmanta kamachejkunaqa mana munankuchu noqaykuwan maqanakuman yaykunaykita.

¹⁰ Chayrayku, qan, chanta qanwan rey Saulpa kamachisnin jamorqanku chay runawan ima, q'aya paqarin sut'iyajtinkama jatarispa kutipunkichej.

¹¹ Ajinaqa Davidwan chay runasninwan imaqa q'ayantin paqarimpacha filisteo jallp'aman kutiporqanku. Chaykamataj filisteosqa Jezreelman rishallarqankupuni.