1 Samuel 28 - Qheshwa Biblia DC

¹ Chay p'unchaykunapeqa filisteos soldadosninkuta tantaykorqanku israelitaswan maqanakunankupaj. Aquistaj Davidan nerqa: Qan allinta yachanki jina, runasniykiwan, noqapiwan maqanakuman llojsinaykichej tiyan.

² Davidtaj kuticherqa: Walej chayqa. Kunan rikunki, reyníy, kay kamachiykeqa imayna walejchus chaypaj kasqanta. Aquistaj nerqa; Jina kajtenqa tukuy kausayniykipi soldadoy jina qhawajniypaj churasqayki, nispa.

Saul tapukun Endormanta yatiri warmita

³ Chaypajwanqa Samuelqa wañupusqaña, tukuy israelitastaj wañupusqanmanta waqasqanku. Chaymantataj Ramá llajtapi p'ampamusqanku, chayqa paypa llajtampuni karqa. Chaypaj Saulqa chay yatirista wijch'usqaña, wañusqasman qhaparikoj kanku chaykunata.

⁴ Filisteosqa tantakorqanku, Sunem chaypitaj jarakorqanku. Saultaj tukuy Israelta tantaykorqa, Gilboa chaypitaj jarakorqanku.

⁵ Filisteos jarakushasqankuta rikuspataj sinch'ita mancharikorqa, kharkatitiylla jap'isharqa.

⁶ Chaypacha Señorta taporqa. Señortaj mana kuticherqachu, ni mosqoypi, nitaj Urimnejtapis, profetasnejtapis.

⁷ Chayrayku chay yanapajkunasninta nerqa: Mask'aychej ari wañusqaswan parlaj warmista, payman rispa tapurikamunaypaj, nispa. Yanapajkunasnintaj nerqanku: Endorpi uj warmi tiyan, payqa wañusqaswan parlan, nispa.

⁸ Saultaj waj jinata p'achalliykukuspa, iskay runastawan pusariykukuspa ch'isillan chay warmita watoj rerqa. Nerqataj: Mañarikuyki suerteyta qhawaripunawaykita, wajyaripuwaytaj pejpa espirituntachus noqa wajyanaykita nisqayki chayta.

⁹ Chay warmitaj kuticherqa: Qan aswan allinta yachanki, Saulqa jallp'amanta wijch'uchisqanta chay yatirista wañusqaswan parlajkunatapis. Imasmantaj churashawankiri, wañuchiytachu munashawanki?

¹⁰ Saultaj Señorpa sutimpi juraspa nerqa: Señorpa sutimpi jurayki, mana ima sajrapis kayraykoqa qhatirisonqachu.

¹¹ Pitataj munanki wajyapunasuytari?, nispa nerqa chay warmeqa. Saultaj nerqa: Samuelta wajyapuway, nispa.

¹² Jinallamanta chay warmeqa Samuelta rikorqa. Sinch'ita qhaparispataj Saulman nerqa: Imapajtaj llullakuwankiri? Qan Saul kasqankeqa!

¹³ Chaypitaj reyqa nerqa: Ama mancharikuychu. Imatataj rikunkiri? Chay warmitaj kuticherqa: Uj diosta jallp'amanta wicharishajta rikuni, nispa.

¹⁴ Saultaj taporqa: Imayna rijch'ayniyojtaj kasqari?, nispa. Warmitaj kuticherqa: Uj unayniyoj runaman rijch'akun, rey qhatanawan p'achallisqa, nispa. Saultaj chay ratopacha yacharqa Samuel kasqanta, pampamantaj k'umuykukorqa.

¹⁵ Chaypitaj nerqa Samuelqa: Imapajtaj qhasita jamuchiwankiri?, nispa. Saultaj kuticherqa: Sinch'i llakisqa kashani, filisteos junt'aykamushawanku, noqatarí Dios qonqarpariwan. Manaña kutichiwanchu, ni profetasnejta, nitaj mosqoynejtapis. Chayrayku wajyacherqayki imatachus ruwanayta ninawaykipaj.

¹⁶ Chaypi Samuelqa kuticherqa: Imaraykutaj noqaqa tapuwanki, Señor saqerparisojtinña, enemigoykimantaj tukupojtinñari?

¹⁷ Señorqa imatachus noqanejta nisorqa chaytaqa junt'anña. Rey kanaykita qhechusunki. Chaytataj wajman qopun, Davidman.

¹⁸ Qan mana kasorqankichu Señorpa kamachisqanta, chay amalecitasta tukuchinaykita kamachishasojtimpis nillataj kasorqankichu. Chayrayku Señorqa ajinata qanta ruwasunki.

¹⁹ Chay jawataj Señorqa filisteosman jaywaykusonqachej, qanta chanta israelitastapis. Q'ayataj qan, wawasniykiwan ima noqawanña kankichej. Ajinallatataj Señorqa Israelitasta jarantinta filisteospa atiyninman urmachenqa.

²⁰ Jinallamanta Saulqa may jatumpacha pampaman laq'akorqa. May sinch'itataj mancharikorqa Samuelpa palabrasninta uyarispa; chayrayku yuyayninta chinkacherqa. Chay jawari, chay diantinta, chay ch'isintintawan mana imatapis payqa mikhorqachu.

²¹ Chay warmitaj Saulta sinch'i mancharisqata rikuspa nerqa: Kay kamachiyki warmeqa mañasqaykiman jina ruwarqa. Kausayniyta yaqha wañuyman enqhaykuni kamachiykunasniykita junt'anayrayku.

²² Ajinaqa kunan mañakuyki kasunawaykita: Uj chhika mikhuyta qorisqayki, tumpata kallpacharikunaykipaj, chanta ripunaykipajtaj, nispa.

²³ Saulqa mana mikhuyta munarqachu, chaywampis jap'ikorqapuni chay warmi, jinataj yanapajkunasnin ima apurajtinku. Chay ratotaj chay pampamanta jatarikuspa, uj cama pataman tiyaykorqa.

²⁴ Chaykamataj chay warmeqa, wasimpi karqa chay wira waka uñata ñak'acherqa, jak'umanta wakichispa mana levadurayoj t'antata.

²⁵ Chaytataj Saulman, chay yanapajkunasninman ima qorqa. Paykunataj mikhuykuytawankama, chay ch'isipacha riporqanku.