1 Samuel 27 - Qheshwa Biblia DC

David filisteospa jallp'ampi

¹ Chaywampis Davidqa sonqompi nerqa: Mayk'ajpis Saulqa atin wañuchiwayta. Chayrayku, noqapajqa aswan allin kawanman filisteospa jallp'anman ayqekunay. Jinamanta Saulqa saqewanqa, amaña tukuy Israel jallp'api mask'anawampaj, jinamanta Saulpa makinmanta llusp'isaj, nispa.

² Ajinamanta Davidqa chay sojta pachaj runasninwan ima rey Aquispaman rerqanku. Aquisqa Moacpa wawan karqa, Gat llajtaj reynintaj.

³ David chay runasninwan imaqa Gat llajtapi Aquiswan tiyakorqanku, sapa ujpis ayllusninkuwan. Davidqa iskaynin warmisninta pusariykukorqa: Jezreel llajtamanta Ahinoam warminta, chanta Abigailtawan Carmelpi wañoj Nabalpa warmin karqa chayta.

⁴ Maypachachus Saul yacharqa David ayqesqanta Gat llajtaman chaypacha, manaña payta qhatiykacharqachu.

⁵ Davidtaj Aquisman nerqa: Ichapis qan, reyníy, khuyakuwankiman, qoriwaspa tiyakunaypaj uj cheqata mayqen llajtallaykipipis. Mana walejchu kanman noqa kamachiyki kikin llajtaykipi qanwan khuska kausanayqa.

⁶ Chay kikin diapacha Aquisqa Siclag nisqa llajtata qorqa. Chayrayku kunankamapis Siclag llajtaqa Judá reyespa kamachinankuraj kashan.

⁷ Davidqa uj wata killayojta filisteospa jallp'ampi tiyakorqa.

⁸ Chay runasninwantaj llojsej kanku chay qayllasman Telaimmantapacha Egiptokama Shur cheqanejpa. Qhechuramoj kanku Gesurpi tiyakojkunata, Gezerpi kajkunata amaleckunata ima. Paykunaqa unaymantaña chay cheqaspi tiyakorqanku.

⁹ Chay cheqapi kajkunawan maqanakuspaqa, mana saqejchu kanku qharista, nitaj warmistapis mana wañuchispaqa. Chay jawari apakoj kanku ovejasta, wakasta, burrosta, camellosta, p'achasta ima. Chaymantataj kutipoj kanku Aquispa chayman.

¹⁰ Aquistaj tapurerqa: Ima llajtamantataj qhechuramorqankichejri?, nispa. Davidtaj kuticherqa: Judamanta uranejpi, chayri Jerusalenmanta uranejpi, chayri quenitaspa jallp'ankumanta uranejpi, nispa.

¹¹ Davidqa mana ujniyojta wañurachej qharista warmista, ama pipis Gatman rispa willamunampaj. Davidqa filisteo jallp'api tiyakusqanmantapacha ajinallatapuni ruwarqa.

¹² Aquistaj Davidpi atienikoj, sonqompitaj nej: Davidqa israelitasta astawan chejnishan, jina chayqa kamachillaypuni kanqa, nispa.