1 Samuel 26 - Qheshwa Biblia DC

Davidqa Saulta mana wañuchinchu

¹ Zif llajtapi tiyakojkunaqa Gabaaman rerqanku Saulta watukoj, nerqankutaj: Davidqa pakasqa kashan, ch'in pampamanta inti llojsimuynejpi Haquila orqopi, nispa.

² Chaypacha Saulqa rerqa kinsa waranqa soldadosta Israel ukhupi kajkunamanta aswan allichaj kajkunata pusariykukuspa, Zif ch'in pampaman Davidta mask'aj.

³ Saultaj Haquila orqopi jarakorqa. Chayqa kashan ñan patapi ch'in pampamanta inti llojsimuynejpi. Davidtaj ch'in pampapi kashaspi reparakorqa Saulqa chaypi payta mask'ashasqanta.

⁴ Jinamanta Davidqa wateqajkunata kacharqa. Yacharqataj cheqamanta Saul chayamusqantaña.

⁵ Chaymantaqa rerqa maypichus Saul jarasqa kasharqa chaykama. Qhawarqataj maynejpichus puñushasqankuta Saulwan Nerpa wawan Abnerwan chayta. Abnerqa Saulpa soldadosnimpa kamachin karqa. Saulqa kikin jara chaupipi puñusharqa, soldadosnintaj paypa muyuynimpi jarasqas kasharqanku.

⁶ Chaypacha Davidqa parlarqa hitita Ahimelecwan Abisaiwan ima. Abisaeqa Sarviaj wawan karqa, Joabpa wauqentaj. Tapurerqataj: Pitaj noqawan jaraman rinman Saulwan tinkumunakama?, nispa. Abisaeqa kuticherqa: Noqa qanwan uraykusaj, nispa.

⁷ Chay ch'isipacha Davidwan Abisaiwan khuska jaraman rerqanku. Saultaj chay jara chaupipi puñusharqa. Uman chaynejpitaj lanzan pampaman sat'isqa kasharqa. Abnerwan soldadosninwan imataj chay muyuynimpi puñushasqanku.

⁸ Chanta Abisaeqa Davidman nerqa: Dios makisniykiman enemigosniykita churan. Saqeway kunan, kay kikin lanzallanwantaj pampaman tinkuchispa wañuchinayta. Payqa uj takayllapaj kashan.

⁹ Davidtaj kuticherqa: Ama wañuchiychu. Señorqa jasut'enqapuni, Señorpaj aceitewan jawispa ajllasqan reyta wañuchinampaj qhawajta.

¹⁰ Jurani Señornejta, Paylla Saulpa kausaynintaqa qhechonqa, wañuyman chayajtimpis, chayri maqanakuman yaykushajtimpis.

¹¹ Señor jark'awachun, Paypa ajllasqan reyta wañuchiyta munanaymanta. Ajinaqa chay uman chaypi kashan chay lanzata, yaku yuruntawan oqhariykukuy, ripunataj, nispa.

¹² Ajinamanta Davidqa lanzata, chay yurutawan Saulpa uman chaynejmanta oqhariykukuspa riporqanku. Mana pipis rikorqachu, nitaj repararqachu; manataj pipis rijch'arerqachu, Señor paykunaman sinch'i puñuyta apachimusqanrayku.

¹³ Chaymanta Davidqa, chay vallemanta chimpaman riporqa, wicharerqataj uj orqo puntakama. Davidmanta paykunamanqa karuraj karqa.

¹⁴ Chaypacha Davidqa Abnerman, soldadosninmanwan sinch'ita qhaparerqa: Abner uyarimuway! Abnertaj uyarispa nerqa: Pitaj qan kanki reyta qhaparimunaykipajri?

¹⁵ Davidtaj kuticherqa: Manachu qanqa kanki, pitachus Israel ukhupi ni pitawan kikinchachiyta atinapaj jina runa? Imaraykutaj mana jark'arqankichu Señor reyniykitari? Kay llajtamanta uj runa, wañuchiyta munaspa jaraman yaykumorqa.

¹⁶ Mana walejchu kay ruwasqaykeqa. Noqa juraykichej Señornejta qankunaqa wañuchinapaj jina kasqaykichejta, aceitewan jawispa Señorpa ajllasqan reyniykichejta mana jark'akusqaykichejrayku. Kunanqa mask'ay ari maynejpichus kasqanta reypa lanzanta, uman chaynejpi kasharqa chay yaku yuruntawan.

¹⁷ Saulqa Davidpa qhaparimusqanta rejsiytawankama taporqa: Qan parlamuwajqa waway Davidsina kankeqa! Davidtaj kuticherqa: Arí, reyníy, parlamusojqa noqa kani.

¹⁸ Reyníy, imapajtaj noqa kamachiykita qhatiykachawankiri? Imatataj ruwarqaniri? Ima sajratataj ruwarqaniri?

¹⁹ Noqa mañayki qan reyniyta noqa kamachiykita uyarinawaykita. Señorchus noqaj contraypi kanaykita nisorqa chayqa, jap'ichun rikuchikuta jaywasqayta. Runasllamantachus kanman chayri, Señor paykunata maldicichun. Paykunaqa Señorpa llajtanmanta wijch'uwanku, chaywantaj waj dioskunata yupaychanayta munaspa jinanku.

²⁰ Noqaqa mana munaymanchu Señormanta karupi wañuchisqa kaytaqa. Qan Israelpa reynenqa mask'awaj llojsinki uj pikita jina, montesnejtataj uj yuthutapis qhatiykachashawaj jina.

²¹ Saultaj kuticherqa: David wawáy! Noqa juchayoj kani! Uj wampu runa jina kasharqani, may jatunta pantaspa! Chaywampis kutimpuy. Manaña chay sajra ruwayta qampaj mask'asajchu, kunan qan rikuchiwanki kausayniyta munakuywan jatumpi qhawasqaykita.

²² Davidtaj kuticherqa: Kayqa reypa lanzanqa. Ujnin kaj kamachiyki apakapoj jamuchun.

²³ Señortaj qopuchun sapa ujman maychus cheqa kayninman, jinataj sonqoyoj kasqanman jina. Señorqa makisniyman qan reyniytaqa churawarqapis, manataj munarqanichu Señorpa ajllasqan reyta ima sajratapis ruwaytaqa.

²⁴ Imaynatachus kunan noqa kausayniykita mana qhechorqaykichu, ajinallatataj munayman Señorqa waqaychanawanta, jinallataj tukuy llakiymantapis.

²⁵ Saulqa chaypacha qhaparerqa: Dios bendicisuchun qan David wawayta! Qanqa may jatuchaj ruwanasman churakunki, tukuy imapitaj allimpuni risonqa! Chaymantataj Saulqa wasinman kutiporqa, Davidtaj maymanchus ripunanta ripullarqapuni.