1 Samuel 24 - Qheshwa Biblia DC

¹ Saulqa filisteosta qharqosqanmanta kutimushajtinña willarqanku, Davidqa En-gadi ch'in pampapiña kashasqanta.

² Chaymanta Saulqa tukuy israelitasmanta kinsa waranqa soldadosta ajllarqa. Kachaykukorqataj Davidta chay runasnintawan mask'amoj monte cabraspa purinan orqo puntasnintinta.

³ Chay risqampitaj chayarqa ovejaspa kanchanman, chay qayllanejpitaj karqa uj jatun qaqa jusk'u, chaypitaj Davidwan chay runasninwan pakakusharqanku. Saultaj chay jusk'uman yaykuykorqa samarikunampaj. Chayllapitaj Davidwan chay runasninwan pakakusharqanku.

⁴ Chaypacha Davidpa runasnenqa payman nerqanku: Kunan junt'akun enemigosniykita Señor urmachisaj nisusqanqa. Kunanqa ruway imachus allin rijch'asunki chayta, nispa. Chaypacha Davidpa sayarispa allinsitullawan qayllaykuspa Saulpa qhatakunan p'achampa cantonta uj chhikanta k'uturparerqa.

⁵ Chaymantari Davidqa sonqonta nanachikorqa chay k'utusqanmanta.

⁶ Chay runasninmantaj nerqa: Señor amapuni munachunchu reyniypa contrampi oqharikunayta. Payqa rey kashan Señor payta ajllasqanrayku.

⁷ Ajinamanta Davidqa runasninta jark'arqa Saulta ama wañuchinankupaj. Saultaj chay jusk'umanta llojsimuspa ñanninta riporqa.

⁸ Chay ratopacha Davidqa qhepanta jusk'umanta llojsimuspa qhaparerqa: Reyníy, reyníy!, nispa. Saul qhepaman qhawarejtintaj Davidqa tukuy munakuywan pampaman k'umuykorqa.

⁹ Davidtaj Saulman nerqa: Reyníy, imaraykutaj creenki wañuchinasuypaj mask'asusqaytari?

¹⁰ Reyníy, qan kikiyki rikuwanki, Señorqa qanta imaynatachus makisniyman churawasqanta. Chay jusk'upi kashajtiyki noqaqa mana wañuchiyta munarqaykichu, manachayqa kausayniykita perdonarqani, sonqoypitaj nerqani qan reyníy kasqaykita, Señor ajllasusqanrayku.

¹¹ Qhawariy reyníy, makiypi jap'ishasqayta: Qampa qhatakunayki p'achamanta uj chhikanta llik'isusqayta, munaspaqa wañuchiykiman karqa. Kaywan qanqa umachakuy, reyníy, noqaqa mana ima sajratapis ruwasuyta yuyasqayta, nitaj wasanchasusqaytapis, nitaj imatapis contraykipi juchallerqanichu. Chaywampis, reyníy, qan mask'awanki wañuchinawaykipaj.

¹² Señorlla justiciata ruwawasuchun iskayninchejta, qan reyniymantataj aynita kutichichun. Noqamantaqa mana jayk'ajpis qan reyniypa contrantaqa makiyta oqharisajchu.

¹³ Imaynatachus ñaupa runas nej kanku: Sajra ruwayqa sajra runasllamantataj jamun!, nispa. Chayrayku noqaqa ni jayk'aj makiytaqa contraykipi oqharisajchu.

¹⁴ Chaywampis pejpa qhepantataj Israelpa reynenqa llojsimorqari? Pitataj qhatiykachashanri? Uj alqo wañusqatachu? Uj pikitachu?

¹⁵ Señorqa iskayninchejta cheqanchawasuchun. Pay yachachun noqamanta, paytaj jark'awachun qan reyniymantapis!

¹⁶ David parlayta tukojtintaj, Saulqa qhaparispa nerqa: Manachu qan parlawajqa waway David kankiri?, nispa; waqayta qallarerqa.

¹⁷ Davidmantaj nerqa: Qanqa aswan cheqan runa kanki noqamanta nisqaqa, sajrata ruwasusqaymanta allin kajwan kutichishawanki.

¹⁸ Qanqa kunan rikuchishawanki noqaj allinniyta mask'asqaykita, makisniykiman Señor churashawajtin mana wañuchiwaspa.

¹⁹ Cheqamanta ni pipis kanchu enemigonta taripaspaña mana imanaspalla kausashajta kacharipojqa. Chayrayku Señorqa kutichipusuchun allin kajwan, noqawan kunan imastachus ruwasqaykimanta.

²⁰ Kunanqa cheqamanta yachani qan rey kanaykita, qan rey kashajtiykitaj tukuy imapi Israelpaj allin rinanta.

²¹ Juraway ari Señorpa sutimpi mirayniyta ama chinkachipunawaykita, nitaj sutiytapis aylluy ukhumanta chinkachipunawaykita.

²² Davidtaj Saulman jurarqa, chaymantataj Saulqa palacionman kutiporqa. Davidwan runasninwantaj chay pakakuna chhankasman riporqanku.