1 Samuel 23 - Qheshwa Biblia DC

David kacharichin filisteosmanta Keila llajtata

¹ Uj kutipi filisteosqa Keila llajtaman yaykuykamorqanku, suwakaporqankutaj erasmanta trigosta. Chaytataj Davidman willarqanku.

² Davidtaj Señorta tapurerqa: Saqewankimanchu rispa filisteoswan maqanakamojta?, nispa. Señortaj kuticherqa: Arí, maqanakamuy; Keila llajtataj kacharichiy.

³ Davidpa soldadosnintaj nerqanku: Kay Judá jallp'apiraj manchachikushankichej chayqa, astawanrajchari Keilaman rispa chay filisteospa contrampi rispaqa manchachikusunman, nispa.

⁴ Chaypacha Davidqa watejmanta Señorta tapullarqataj, Señortaj kay jinata nerqa: Rillayña Keilaman, noqataj chay filisteosta makisniykiman churasaj, nispa.

⁵ David chay soldadosninwan Keilaman kachaykukorqanku, chaypitaj maqanakorqanku filisteospa contrampi, may jinatataj atipaykorqanku, uywasninkutapis qhechukaporqanku. Ajinamanta Davidqa Keilapi tiyakojkunata filisteosmanta kacharicherqa.

⁶ Chaykamataj Ahimelecpa wawan Abiatarqa ayqekoj risharqa, Davidwan Keilapi tinkukamunanrayku, efod p'achata oqhariykukuspa.

⁷ Chay jawataj Saulman willasqanku Davidqa Keilapi kashasqanta. Chayta uyarispa Saulqa sonqompi nerqa: Dioschá kaytaqa munan, imaraykuchus Davidqa llajtaman yaykuspa, pay kikin punkuswan, trancanasnintinwan ima wisq'aykukun.

⁸ Chay rato Saulqa tukuy soldadosninta wajyacherqa, Keila llajtaman rerqanku, chaypitaj Davidta soldadosninta ima, tukuyninkumanta muyuykuspa jap'inankupaj.

⁹ Davidtaj Saul jap'ichej jamunayashasqanta yachaspa, chaypacha Abiatar sacerdoteta kamacherqa efod p'achata apamunanta Señorta tapunanta.

¹⁰ Davidqa Señorman nerqa: Señor, Israelpa Diosnin; kay kamachiyki yachan Saul kayman jamunayashasqanta kay Keila llajtaman, noqaraykutaj kayta thuñej jamushasqanta.

¹¹ Saulqa mask'awaj jamonqapunichu? Kay Keila llajtapi tiyakojkunaqa payman jaywaykuwanqankuchu? Señor, Israelpa Diosnin, kay kamachiykeqa mañakusunki willarinawaykita!, nispa. Chaypitaj Señor kuticherqa: Saulqa jamonqa.

¹² Chaypitaj Davidqa tapullarqataj: Kay Keila llajtapi kajkunari, noqata soldadosniyta ima Saulman jaywaykuwasqaykuchu?, nispa. Señortaj kuticherqa: Arí, jaywaykusonqachej, nispa.

¹³ Chaypacha Davidqa tukuy soldadosnimpiwan khuska tukuyninkupi sojta pachaj jina llojserqanku Keila llajtamanta, purerqankutaj kaynejman jaqaynejman rispa. Saulmanrí willasqanku Davidqa Keila llajtamanta ayqesqanta. Saultaj manaña munarqachu mask'achej riyta.

David ch'in pampapi

¹⁴ Ajinamanta Davidqa Zif ch'in pampaj pakakunasniyoj orqosnimpi tiyakorqa. Saultaj tukuy p'unchaypi mask'allarqapuni. Chaywampis Diosqa mana munarqachu makisninman urmananta.

¹⁵ Chaywampis Davidqa Saulta manchachikorqapuni, wañuchiyta munaspa payta mask'asqanrayku. Davidqa chayrayku Horespi qhepakorqa, chay Zif ch'in pampasnejpi.

¹⁶ Uj kutipi Saulpa wawan Jonatanqa Horesman rerqa Davidta watukoj, astawan kallpachanampaj Diospi astawan atienikunampaj.

¹⁷ Nerqataj: Ama manchachikuychu, tatay Saulqa mana taripayta atisonqachu. Qanqa Israelpa reynin kanayki tiyan. Noqataj qanta qhepaykipi yanapasunaypaj kasaj. Chaytaqa tatay Saulpis yachan.

¹⁸ Chaypacha iskayninku uj tratota ruwarqanku, Señortataj testigopaj churakorqanku. Chaymanta Jonatanqa wasinman kutiporqa. Davidtaj Horespi qhepakaporqa.

¹⁹ Zif llajtapi tiyakojkunataj Gabaa llajtaman rerqanku Saulwan parlaj, nerqankutaj: Davidqa noqaykoj jallp'aykupi pakasqa kashan, pakakuna Haquila orqopi Hores chhankapi, ch'in pampamanta uranejpi.

²⁰ Chayrayku qan reyníy jamuyta munanki chayqa, jamullay, noqaykutaj qanman jaywasqayku, nispa.

²¹ Saultaj kuticherqa: Dios bendicisonqachej qankunata, noqata khuyakuwasqaykichejmanta!

²² Kunanqa riychej yachamuychejtaj maynejpipunichus David kashasqanta, pichus rikusqantawan yachamuychej. Niwanku payqa sinch'i vivo kayninwan ch'aukiyaj kasqanta.

²³ Sumajta qhawankichej tukuy pakakunan jusk'usta, chaymantataj allinta yachasparaj jamuwankichej, chantataj noqa qankunawan risaj. Chaynejpipuni kashanman chayri, noqa mask'asaj tukuynin ayllumanta ayllu Judá jallp'api.

²⁴ Zif llajtamanta kajkunaqa Saulwan parlaytawan llajtankuman kutiporqanku. Davidqa chaykama chay runasninwan ima Maón ch'in pampapiña kasharqanku, chay ch'in pampanmanta uranej pampampi.

²⁵ Saulwan runasninwantaj mask'amoj rerqanku. Kayta Davidman willajtinkutaj payqa uraykorqa Maón ch'in pampapi chhanka kashan chayman. Chayta yachaspataj Saulqa kachaykukorqa Maón ch'in pampaman Davidta mask'amunampaj.

²⁶ Chay ujnin orqoj kinrayninta Saulqa runasnimpiwan risharqanku, chay orqoj wasantataj Davidwan runasninwan, usqhay usqhayta Saulmanta karunchanankupaj risharqanku. Chaywampis Saulwan chay runasninwan ima Davidta chay runasnintawan ima jap'inankupaj muyuykorqanku.

²⁷ Chaypacha uj runa jamorqa Saulman willaj kay jinata: Reyníy, kunampacha kutinayki tiyan, filisteos jallp'anchejman junt'aykamushanku!

²⁸ Chaypacha Saulqa Davidta qhatiykachayta saqerparispa kutiporqa filisteoswan maqanakoj. Chayrayku chay chhankaj sutin, T'aqanakuna chhanka, nisqa.

David perdonan Saulpa kausayninta

²⁹ Chaymanta Davidqa En-gadipi tiyakoj riporqa pakakuna chhankaman.