1 Samuel 22 - Qheshwa Biblia DC

¹ Davidqa chaymanta ripuspa Adulam chhanka jusk'uman ayqerqa. Wauqesnin, chanta tukuy ayllumpis chayta yachaspaqa paywan rerqanku, khuska kamunankupaj.

² Paywan tantakullarqankutaj tinkukoj tukuy llakiyniyoj runas, manus kajkuna, mana kusiyniyoj kajkunapiwan. Davidtaj paykunaj kuraj kaj pusaykachajninku karqa. Paywan khuskachakoj runasqa tawa pachaj runas jina karqanku.

³ Chaynejmantapacha Davidqa Moab jallp'api Mizpa llajtaman rerqa. Moabpa reyninmantaj nerqa: Mañarikuyki tataywan mamaywanqa qankunawan qheparikunankuta, imatachus Señor noqawan ruwanqa chayta yachanaykama.

⁴ Ajinamanta Davidqa tatasninta pusarqa Moabpa reyninman. Paykunataj tiyakorqanku, David chay chhanka jusk'upi kanankama.

⁵ Chaypacha profeta Gadqa Davidta yuyaycharqa: Amaña qhepakuychu chay chhanka jusk'upi. Puririy, ripuytaj Judá jallp'aman. Ajinamanta Davidqa riporqa, chayarqataj Haret nisqa monteman.

Saul wañuchin Nobmanta sacerdotesta

^6-7 Chaykamataj Saulqa Gabaapi kasharqa, loma patapi uj tamarisco sach'a urapi tiyasharqa makimpi lanza jap'irisqa, muyuynimpitaj chay kamachisnin kasharqanku. Maypachachus Davidwan chay runasninwan ima maypichus tarikusqankuta yachaspa, Saulqa paywan kasharqanku chaykunaman nerqa: Benjaminmanta kaj runas, uyariwaychej: Creenkichejchu Isaejpa wawanqa qonallasuykichejtataj tukuy qankunaman jallp'asta, uvas huertastapis, tukuyniykichejtataj kamachejkunata, jinataj capitanestapis churanasuykichejta?

⁸ Qankunaqa tukuyniykichej contraypi oqharikunkichej manataj ni mayqenniykichej niwankichejchu, imaynatachus chay Isaejpa wawanwan wawaywan uj tratota ruwasqankumanta. Ni mayqenniykichejtaj noqamanta mana dakuwankichejchu, manataj pipis niwanchu wawallaytaj chay kamachiyta contraypi churasqanta, wañuchiyta munaspa wateqanawampaj, imaynatachus kunan ruwashan ajinata.

⁹ Chaypacha Doeg, Edon llajtamanta Saulpa kamachisninmanta kurajninku kay jinata kuticherqa: Noqa rikorqani Isaejpa wawantaqa Nob llajtaman rispa Ahitobpa wawan Ahimelecwan tinkojta.

¹⁰ Ahimelectaj Señorta Davidpa taporqa. Chanta qorqa mikhunasta, jinallataj filisteo Goliatpa espadanta ima.

¹¹ Chaypacha reyqa wajyachimorqa Ahitobpa wawan sacerdote Ahimelecta, tukuy ayllunta, Nob llajtamanta tukuy sacerdotestawan. Tukuyninkutaj reypa ñaupaqenman jamorqanku.

¹² Saulqa Ahimelecman nerqa: Qan Ahitobpa wawan allinta uyariway. Ahimelectaj kuticherqa: Nillaway reyníy, munasqaykita ruwasaj, nispa.

¹³ Saultaj taporqa: Imaraykutaj qanwan chay Isaejpa wawanwan contraypi oqharikorqankichejri? Qan payman qosqanki t'antasta, uj espadatawan. Davidpajtaj Diosta tapurisqanki, noqaj contraypi oqharikunampaj, wañuchiyta munaspa wateqanawampaj, imaynatachus kunan ruwashan ajinata.

¹⁴ Chaypacha Ahimelecqa reyman kuticherqa: Mayqentaj tukuy yanapajkunasniykimanta David jina cheqan runarí? Payqa tolqayki kampis, chay jawari soldadospa kuraj kamachejnin, palacioykipitaj sumaj runapaj qhawasqa.

¹⁵ Kunanmantachu paypaj Diosta tapuyta qallarisqani? Mana jinachu chayqa! Chayrayku qan reyníy kay kamachiykimanqa, nitaj aylluykimampis; imaraykuchus noqa kamachiykeqa mana pisita, nitaj ashkhatachu yachani chay imasmantaqa, nispa.

¹⁶ Rey Saultaj ujtawan nillarqataj: Yachay allinta qan; Ahimelec, qanwan tukuy aylluykiwan wañunaykichejpuni kasqanta.

¹⁷ Chay rato reyqa muyuynimpi qhawaj soldadosninta kamacherqa: Señorpa sacerdotesninta wañurachiychej! Paykunapis Davidman kutisqas kashanku, paykunaqa David ayqeshasqanta yachashaspa mana willawarqankuchu. Reypa soldadosnintaj mana makisninkuta oqhariyta munarqankuchu Señorpa sacerdotesnimpa contrampeqa.

¹⁸ Chayraykutaj reyqa kamacherqa Edonmanta Doegta: Qan wañurachiy, nispa. Chaypacha Doegqa sacerdotespa contrampi churakorqa, chay kutipeqa pusaj chunka phishqayoj qharista wañuracherqa. Paykunaqa linomanta efod p'achasniyoj kasharqanku.

¹⁹ Chaymantataj Saulqa, sacerdotespa Nob llajtankuman yaykuspa espadawan wañuracherqa: Qharista, warmista, chanta ñuñoj wawastapis. Wañurachillarqataj bueyesta, burrosta, ovejasta ima.

²⁰ Ahimelecpa ujnin kaj wawan Abiatar sutiyoj kaj, chay wañurachishajtinku ayqekorqa, chayarqataj maypichus David kasharqa chaykama.

²¹ Chaypitaj Abiatarqa Davidman willarqa imaynatachus Señorpa sacerdotesninta Saul wañurachisqanta.

²² Davidtaj kuticherqa: Noqa yacharqaniña chaypi Doeg kaspaqa Saulman willanantapuni. Noqa juchayoj tukuy aylluyki wañusqankumanta.

²³ Kunanqa noqawan qhepakuy, amataj manchachikuychu. Pillapis wañuchisuyta munajqa, noqatapi wañuchiyllatataj munan. Ajinaqa noqawan allillanta kakunki.