1 Samuel 21 - Qheshwa Biblia DC

David ayqekun Saulmanta

¹ Davidqa Nob llajtaman rerqa sacerdote Ahimalecpaman. Payqa mancharisqa llojsimorqa Davidwan tinkoj, nerqataj: Imaraykutaj sapallayki jamunkiri, nitaj pipis qanwan jamunchuri?

² Davidtaj Ahimelecman kuticherqa: Rey kachamuwarqa uj kamachiyninta junt'anaypaj, niwarqataj ni pi yachananta, imapajchus kachamuwasqanta, ima kamachiykunasninwanchus jamusqaytapis. Pischus kamachiypi kashanku chay runastaqa uj cheqanman tantakunankuta nini.

³ Kunanqa, imastaj mikhunapaj tiyapusunkiri? Qoway phishqa t'antasta, chayri imachus kapususqanta.

⁴ Sacerdotetaj Davidman nerqa; Tiyapuwan chay t'antaqa mana mikhunapaj nisqa t'antachu, manachayqa Diospaj t'aqasqa t'antalla. Jinatapis qosqayki sichus runasniyki warmiswan mana karqankuchu chayqa.

⁵ Davidtaj sacerdoteman kuticherqa: Cheqamanta sapa maqanakuman llojsispaqa warmismanta karunchakunkupuni. Kay jamusqaykoqa mana maqanakupaj nisqapischu karqa, chaywampis runasneyqa llimphuchakorqankuña llojsimunaykupajqa, jinamanta kunanqa aswan llimphuchasqas kashayku.

⁶ Chaypacha sacerdoteqa chay llimphuchasqa t'antata jaywarqa, Señorpaj llimphuchasqa t'antaslla chaypi kasqanrayku. Chay diallaraj chayman orqhomusqanku waj q'oñi t'antasta churanankupaj.

⁷ Saulpa ujnin kaj kamachenqa, Diosta yupaychana wasipi chay kikin diallapitaj qhepakusqa. Chay kamachejpataqa sutin karqa Doeg, payqa Saulpa michejkunasnimpa kurajninku karqa.

⁸ Davidqa Ahimelecman nerqa: Manachu kaypi tiyapusunki uj lanza, chayri uj espadallapis? Reypa kamachisqan usqhayllata kasuna kasqanrayku mana tiempo karqachu espadayta, nitaj waj armasniytapis oqharikamunaypaj.

⁹ Sacerdotetaj kuticherqa: Arí, Ela nisqa vallepi atiparqanki chay filisteo Goliatpa espadallan kaypi kashan. Chay efod p'acha wasapi uj qhatanawan mayt'usqa kashan. Munanki chayqa atinki apakuyta, aswan armasneyqa mana kanchu. Chaypitaj Davidqa kuticherqa: Chay walej kanqa tukuyninmanta astawanqa, chayta qoway ari, nispa.

¹⁰ Chay kikin diapacha Davidqa ayqellarqapuni Saulmantaqa. Rerqataj Gat llajtamanta rey Aquispaman.

¹¹ Chanta Aquispa kamachisnintaj nerqanku: Manachu payqa chay jallp'aj reynin David? Manachu paymanta takispa tusoj kanku: Saulqa waranqa runasta wañucherqa, Davidtaj chunka waranqasta, nispa?

¹² Davidpa sumajta umachakorqa chay parlasqasninkuta. Gat llajtamanta rey Aquispa ñaupaqempitaj sinch'ita mancharikorqa.

¹³ Chayrayku ñaupaqenkupi maychus kananmanta uj jinaman tukorqa. Loco locoman tukuspataj punkuspi qelqaraj churakorqa, llausasnintataj sunkhasnin chaynejta surucherqa.

¹⁴ Chaymanta rey Aquisqa chay kamachisninman nerqa: Kay runata locota rikushaspaqa imapajtaj pusamuwarqankichejri?

¹⁵ Loco runatachu mask'ashasqani kay runata pusamunawaykichejpaj, kay kikin wasiypi locoykachanampaj?, nispa.