1 Samuel 20 - Qheshwa Biblia DC

Jonatanqa Davidta yanapan

¹ Chaymantaqa Ramapi Naiotmanta Davidqa ayqerqa, rerqataj Jonatán kasharqa chayman. Paymantaj nerqa: Imatataj noqa ruwarqaniri? Imataj juchay kasqari? Imapitaj tataykej contranta juchallisqani wañuchiyta munaspa mask'anawampajri?, nispa.

² Jonatantaj kuticherqa: Mana imaynamantapis jinachu kanqa, qanqa mana wañunkichu! Yachanayki tiyan, tatayqa mana imatapis ruwanchu, juch'uypis kachun, chayri jatumpis kachun mana noqaman willawaspaqa. Imaraykutaj tatayqa kayta pakawanmanri? Kayqa mana jinachu kanqa.

³ Davidqa ujtawan nerqa: Tataykeqa sumajta yachan, qan maytapuni noqata munakuwasqaykita, payqa mana munanqachu kayta yachanaykita ama llakikunaykipaj. Señorpa sutinrayku qanrayku jurani, wañuy patapi kashasqayta!

⁴ Chaypacha Jonatán taporqa: Imatataj qanrayku ruwanayta munankiri?, nispa.

⁵ Davidtaj kuticherqa: Q'aya p'unchayqa mosoj killa fiesta kanqa, chaypitaj reywan khuska tiyaykuspa mikhunay kashan. Qanqa saqeway campoman rispa, minchha tardekama pakakamunayta.

⁶ Tatayki noqamanta watukojtenqa, ninki: Mañarikuwarqa saqenayta Belén llajtaman usqhayllata rinampaj, chaypi tukuy ayllun wata rikuchikuta jaywananku kasqanrayku, nispa.

⁷ Sichus walej nisonqa chayqa, niyta munan walejlla kanayta. Sichus phiñakunman chayqa, qan yachanki wañuchiytapuni munawasqanta.

⁸ Ajinaqa khuyaspa yanapaway kamachiyki kasqayrayku, Señorpa ñaupaqempi noqawan qanwan tratota ruwasqanchejrayku. Noqajtapuni juchay kashan chayri, qan kikiyki wañuchiway. Jinamanta tataykimanta manaña apawankichu.

⁹ Jonatantaj payman kuticherqa: Ama chaytaqa yuyallaypischu! Tatay wañuchiytapuni munasusqanta yachasaj chayqa, willasqayki.

¹⁰ Chaypacha David taporqa: Pitaj willawanqa tatayki phiñasqa parlasojtinri?

¹¹ Jonatantaj kuticherqa: Jaku campoman llojsina, nispa. Iskayninkutaj campoman llojserqanku.

¹² Chaypitaj Jonatanqa Davidman nerqa: Israelpa Señor Diosnimpa ñaupaqempi jurayki. Q'aya minchhakama kay kikin horasta jina waillasqayki, tatayta tapuspa yachasajña imastachus yuyashasqanta. Sichus qampaj walejllata parlanqa chayqa, waillachisqayki.

¹³ Tatay wañuchiytapuni munasonqa chayqa, noqataj chayta mana willaykimanchu, nitaj ayqeyta yanapaykimanchu chayqa, Señor sinch'ita jasut'iwachun. Señortaj yanapasuchun imaynatachus tatayqa yanaparqa ajinata!

^14-15 Chaykama kausasajraj chayqa, imaynatachus qanta Señor khuyakusunki, ajinallatataj qampis khuyakuwanki. Wañusaj chayri, aylluyta khuyallankipuni. Señortaj cuentata mañawachun enemigosniykimanta, tukuyninkutataj tukuchichun!

¹⁶ Ajinamanta Jonatanqa Davidwan tratota ruwarqa.

¹⁷ Jonatanqa ujtawan Davidta juracherqa mayta munakusqanrayku, imaraykuchus sinch'itapuni pay kikinta jina munakorqa.

¹⁸ Jonatanqa nillarqataj: Q'ayaqa mosoj killa fiesta kanqa qampa tiyanayki ch'usajlla kajtin qanmanta watusonqanku.

¹⁹ Kinsa kaj diapiraj astawan watukusonqanku. Chayrayku ripuy chay ñaupaj kutipi maypichus pakakamorqanki chayman. Jaqay Ezel rumi kashan chay wasaman pakaykakamuy.

²⁰ Noqataj, kinsa kutista flechasta chay ladoman kacharisaj, uj imatapis jap'ichiyta munashayman jina.

²¹ Uywasqaytataj nisaj: Riy chay flechasta mask'amuy, nispa. Qanmanta aswan kaynejllapi kashanku chay flechasqa, oqharispa apamuway, niyman chayqa, ama manchachikuspa jamullanki, manataj imapis kasonqachu. Kaytaqa Señorpa sutinrayku jurayki.

²² Sichus uywasqayta nisaj: Chay flechas aswan jaqaypi kashanku nispa chayqa, sayarispa ripunki, Señorpuni munan qan ripunaykita.

²³ Kay tratota ruwasqanchejtaqa Señorlla rikuchun wiñaynintimpaj.

²⁴ Davidqa campopi pakakamorqa. Killa qallarikuy fiesta chayamojtintaj, chaypacha reyqa tiyaykukorqa mesaman mikhunampaj.

²⁵ Reyqa maypichus tiyanan kaj chaypi tiyaykukorqa perqa qayllanejpi. Jonatantaj tiyarqa reypa chimpannejpi. Abnertaj tiyaykukorqa Saulpa ladompi. Davidpa tiyananrí ch'usaj pacha qhepakorqa.

²⁶ Chay p'unchaypi Saulqa mana imatapis nerqachu, jinapis yuyaynimpeqa nisharqa: Ichapis imapi juchallin, mana llimphuchasqa kaspa mana jamunchu, nispa.

²⁷ Q'ayantin p'unchaypis chay fiestapi Davidpa tiyananqa ch'usajllapuni kasharqa. Chaypacha Saulqa wawan Jonatanta taporqa: Imaraykutaj Isaejpa wawan Davidqa mana qayna mikhoj jamunchu, nitaj kunampisri?

²⁸ Jonatantaj kuticherqa: Davidqa maytapuni mañakuwarqa Belenman rinampaj.

²⁹ Mañawarqataj payta rejta saqenayta, imaraykuchus llajtampi ayllun uj ñak'asqa rikuchikuta jaywananku kasqanrayku, chaypajtaj wauqen wajyachisqanta. Nillawarqataj noqa rejta saqejteyqa ayllusninta waturikoj rerqonanta. Chayrayku, reyníy, qanwan mikhojqa mana jamunchu.

³⁰ Chaypacha Saulqa sinch'ita Jonatampaj phiñarikorqa, nerqataj: Qanqa sajra warmej wawan kanki! Manachu noqaqa yachani chay Isaejpa wawampa sinch'i kausaqen kasqaykita, chaytaj qampajqa uj p'enqay, jinataj mamaykipajpis kasqanta?

³¹ Pay kay jallp'api kausashanankamaqa, mana qanqa allimpichu kanki, nitaj reinoykipis. Ajinaqa kunampacha kachay mask'amojta, pusachimuytaj, imaraykuchus wañunampuni tiyan.

³² Jonatantaj tatan Saulman kuticherqa: Imaraykutaj pay wañonqari? Imatataj pay ruwasqari?, nispa.

³³ Saulqa lanzanta oqharispa Jonatanman choqaykorqa wañuchinampaj jina. Jinamanta Jonatanqa repararqa tatanqa Davidta wañuchiytapuni munashasqanta.

³⁴ Chaypacha Jonatanqa may phiñasqa jatarikorqa, manataj fiestamanta chay qhepan kaj p'unchaypi mikhorqachu, Davidmanta sinch'ita llakikusqanrayku; tatan Saul Davidpaj sajrata rimasqanrayku.

³⁵ Q'ayantin paqarintaj Jonatanqa campoman llojserqa uj ch'iti pusarisqa, ima horastachus Davidwan tinkunanku karqa chay horasta jina.

³⁶ Chay ch'ititataj kamacherqa: Kunanqa noqa kacharisaj chay flechasta usqhayta correspa mask'amuy. Chay kamachi correshajtintaj Jonatanqa sinch'iwan kacharerqa paymanta aswan karuman rinampaj jina.

³⁷ Chay kamachi maypichus flechas kasharqa chayman chayashajtinña, Jonatanqa tukuy kallpanwan payman qhaparerqa: Chay flechaqa qanmanta aswan jaqaypiraj kashan, nispa.

³⁸ Uj kutitawan Jonatanqa chay kamachinta qhaparerqa: Apurakuy, usqhayta riy, ama sayaychu!, nispa. Jonatampa kamachenqa chay flechasta oqharispa patronninman apamorqa.

³⁹ Mamataj chay kamacheqa imatapis repararqachu, Jonatanwan Davidllawan chay yachachinakusqankutaqa yacharqanku.

⁴⁰ Jonatanqa chay kamachinman armasninta jaywarqa, kamacherqataj chaykunata apaspa llajtaman kutipunanta.

⁴¹ Chay kamachi ripojtinkamataj Davidqa pakasqa kasharqa chaymanta llojsimorqa. Jonatampa ñaupaqempitaj kinsa kutita k'umuykukorqa pampaman umanta chayachispa. Chaymantataj much'anakuspa iskayninku much'anakorqanku, Davidtaj astawan waqarqa.

⁴² Chaymantataj Jonatanqa Davidman nerqa: Ama llakikuspalla ripuy. Chay jurasqanchejqa Señorpa ñaupaqempimin karqa, Señor kaytaqa rikuchun qanwan noqawan sumajta kausakunanchejpaj. Jinallataj kachun qampa wawasniykiwan, noqaj wawasniywampis wiñaypaj, chaymantataj Davidqa riporqa, Jonatantaj llajtaman kutiporqa.