1 Samuel 19 - Qheshwa Biblia DC

Saulqa Davidta wañuchiyta munan

^1-2 Saulqa, wawan Jonatanta, tukuy yanapajkunasnintawan kamacherqa Davidta wañuchinankuta. Jonatanrí Davidta mayta munakusqanrayku, payman chayta willamorqa, nerqataj: Tatay Saulqa wañuchiyta munashasunki. Q'aya allinta qhawakuspa purinki. May pakaynejpipis pakakuspa qhepakuy.

³ Noqataj tataywan khuska llojsisaj, maypichus qan kashanki chay campoman. Qanmanta paywan parlasaj, imaynachus kanqa chayta, chaytataj qanman willasqayki.

⁴ Jinataj Jonatanqa Davidmanta allinta Saulman parlarqa, nerqataj: Reyníy, ama ima sajratapis ruwaychu kamachiyki Davidtaqa, payqa mana ima sajratapis qantaqa ruwasunkichu, astawampis tukuy ruwasqasnenqa allimpuni qampaj karqa.

⁵ Payqa wañuyta mana manchachikuspa filisteosta wañucherqa, jinamanta Señorqa paynejta tukuy israelitasman jatun atipayta qorqa, chaytaqa rikorqanki kusikorqankitaj. Imaraykutaj qan uj mana juchayoj runata wañuchiyta munankiri, Davidta mana imallamanta wañuchiyta munaspari?

⁶ Saulqa wawan Jonatampa nisqasninta uyarispa, qhaparerqa: Señorpa sutinrayku jurani, Davidqa mana wañonqachu.

⁷ Chaypacha Jonatanqa Davidta wajyaspa willarqa chay tukuy parlasqankuta. Chaymantaqa Saulman payta pusarqa. Ajinamanta ñaupajpi jina Davidqa Saulpa kamachillampipuni qhepakorqa.

⁸ Watejmanta maqanaku qallarikullarqataj, Davidtaj filisteospa contrampi llojserqa maqanakunampaj, paykunatataj atipaykorqa, filisteostaj mayta atipaykuchikuspa Davidpa ñaupaqenta ayqerqanku.

⁹ Saulman watejmanta jamorqa uj sajra espíritu Señormanta. Saulqa wasimpi tiyasqa kasharqa, makimpi uj lanza jap'irisqa, Davidtaj arpata tocapusharqa.

¹⁰ Saultaj Davidta lanzawan perqapi choqayta munarqa, Davidtaj uj ladoman ithirikorqa, jinamanta Saulpa lanzanqa perqallaman sat'ikorqa. Chay kikin ch'isi pachataj Davidqa llojsispa ayqerqa.

¹¹ Chay rato Saulqa kamacherqa runasninta, Davidpa wasinman rispa sumajta wateqamunankuta, q'ayantin paqarintaj wañuchinankuta. Warmin Micaltaj Davidman willarqa: Manachus kunan ch'isi ayqekunki chayqa, q'ayapaj wañusqa rikhurinki.

¹² Chay rato Micalqa Davidta ventanannejta uraykucherqa, jinamanta ayqerqa.

¹³ Chaymantataj Micalqa Davidpa camanman uj lantita churaykorqa, saunanmantaj cabra millmamanta ruwasqata churaykorqa, chaytataj uj qhatanawan qhataykorqa.

¹⁴ Maypachachus Saul kamacherqa Davidta presota jap'inankuta chaypacha, Micalqa nerqa Davidqa onqosqa kashasqanta.

¹⁵ Saulqa watejmanta kacharqa runasninta Davidta jap'imunankupaj, kamacherqataj kay jinata: Onqosqapis camampi kashan apamuwaychej wañuchinaypaj!, nispa.

¹⁶ Saulpa runasnintaj Davidpa wasinman yaykorqanku, camampitaj uj lantillata tarerqanku, saunampitajri cabra millmamanta ruwaspa churaykusqata.

¹⁷ Chaypacha Saulqa Micalman nerqa: Imaraykutaj kay jinata ch'aukiyawanki, chay enemigoyta ayqechispari?, nispa. Micaltaj kuticherqa: Pay niwarqa: Saqeway ayqejta, manachayqa qanta wañuchisqayki, nispa.

¹⁸ Ajinamanta Davidqa ayqerqa. Rerqataj Ramá llajtaman Samuelta watukoj, willakorqataj imastachus Saul paywan ruwasqanta. Chay qhepantataj Davidwan Samuelwanqa Naiotman tiyakoj rerqanku.

¹⁹ Saulman willarqanku, Davidqa Naiotpi Ramá llajtapi kashasqanta.

²⁰ Chaypacha Saulqa runasninta kacharqa Davidta jap'imunankupaj. Saulpa kacha runasnintaj Ramaman chayaspa uj t'aqa profetasta musphaypi jina parlashajta rikorqanku, chaykunatataj Samuel pusaykachashajta. Jinallamanta chay kacha runasmampis Diospa Espíritun junt'aykorqa. Chanta paykunapis chay profetas jina parlarqanku.

²¹ Saul chayta yachaspa waj runasnintañataj kacharqa. Paykunapis profetas jinallataj parlarqanku. Kinsa kaj kutita Saulqa waj runasninta kachallarqataj. Paykunapis profetas jinallataj parlarqanku.

²² Chaymantaqa kikin Saulñataj kachaykukorqa Ramá llajtaman. Secupi uj jatun pujyu chaynejpi Saulqa tapurikorqa Samuelmanta Davidmantawan. Willarqankutaj Ramá llajtapi Naiotpi kashasqankuta.

²³ Saultaj Ramá llajtapi Naiotman kachaykukorqa. Paymampis Diospa Espíritun junt'aykullarqataj. Chanta Saulqa profeta jina parlaspa rillarqapuni Ramá llajtapi Naiotman chayanankama.

²⁴ Chay jawaqa p'achanta lluch'ukuspa, ukhu p'achallawanwan qhepakorqa tukuy p'unchaynintin, jinataj ch'isimpis Samuelpa ñaupaqempi profeta jina parlaspa. Chaymantapacha kay jina nisqa karqa: Saulpis profetallatajchu kashan?, nispa.