1 Samuel 17 - Qheshwa Biblia DC

Davidqa Goliatta atipan

¹ Filisteosqa soldadosninkuta tantaykorqanku ch'ajwapi maqanakamunankupaj. Tantakorqankutaj Soco llajta chaynejpi. Judá jallp'api jarankuta sayacherqanku, Efes-damim llajtapi, chayqa kashan Socowan, Azecawan tinkuypi.

² Chaypachallataj tantakorqanku Saulwan israelitaswan ima, jarakorqankutaj Ela nisqa vallepi. Chaypitaj wakichikorqanku filisteospa contrampi maqanakunankupaj.

³ Filisteosqa uj orqopi kasharqanku, israelitastaj chimpan orqopi kasharqanku, chaupinkupitaj uj valle karqa.

⁴ Jinallamanta chay filisteos ukhumanta uj maqanakoj runa llojsimorqa kinsa metros jina sayayniyoj, Goliat nisqa sutiyoj. Payqa Gat nisqa llajtamanta karqa.

⁵ Umampeqa broncemanta ruwasqa monterayoj karqa, cuerpompitaj broncemanta ruwasqa pechoquera nisqa chalecoyoj. Chayqa phishqa chunka phishqayoj kilos jina pesarqa.

⁶ T'ususninta jark'anasnimpis broncellamantataj karqa, jinataj wasampi apaj chay t'ojsinasnimpis.

⁷ T'ojsina lanzampa wajrantaj awana khiwinampa k'aspi jinapuni karqa, puntanmantaj fierromanta karqa. Chaytaj sojta kilomanta astawanraj pesarqa. Ñaupaqentataj yanapajnin rej.

⁸ Goliatqa sayaykuspa israelita soldadosta qhaparerqa: Imapajtaj llojsimunkichej maqanakoj churakunaykichejpajri? Noqaqa filisteo kani, qankunataj Saulpa kamachiynimpi kashankichej. Qankuna ukhumanta ujta ajllaychej noqawan maqakoj uraykamunampaj.

⁹ Sichus noqawan maqanakoj llojsimunman, atipawanman chayqa, noqayku qankunaj kamachisniykichej kasqayku. Noqachus atipasaj chayri, qankuna noqaykoj kamachisniyku kankichej.

¹⁰ Chay filisteoqa nillarqataj: Kay p'unchaypi noqa israelitaspa soldadosninman yaykuspa mañani. Qowaychej runata noqawan maqanakunampaj.

¹¹ Chay filisteoj nisqasninta uyarispa Saulqa, tukuy israelitaspis iskayrayarqanku, sinch'itataj mancharikorqanku.

¹² Chaypacha Judamanta Belempi tiyakorqa uj runa Isaí sutiyoj. Payqa Saul kausashajtin ashkha watasniyojña karqa. Kay runajtataj pusaj qhari wawasnin tiyaporqa, ujnin kaj wawanqa David sutiyoj karqa.

¹³ Isaejpa kinsa kuraj qhari wawasnin Saulta qhaterqanku maqanakuman. Chay kinsantin wawasnimpa sutisninkutaj karqanku kaykuna: Kurajpata Eliab, sullk'ampatataj Abinadab, kinsa kajpatataj Sama.

¹⁴ Davidtaj aswan sullk'a kaj karqa. Kinsantin kurajkunaqa Saulta qhaterqanku.

¹⁵ Davidtaj sapa kuti rej Saul kasharqa chayman, kutimojtaj Belenman tatampa ovejasninta michimoj.

¹⁶ Chaykamataj chay filisteo jatun runaqa paqarimpi, tardempitaj llojsimoj israelitasta maqanakuman wajyaspa. Ajinallatapuni ruwarqa tawa chunka p'unchay junt'ata.

¹⁷ Uj p'unchaytaj Isaeqa David wawanman nerqa: Kunanqa oqhariykukuy kay iskay chunka libra trigo jank'ata, kay chunka t'antastawan, apaytaj usqhayllata maqanaku jarapi kashanku chay wauqesniykiman.

¹⁸ Apallaytaj kay chunka quesosta waranqa soldadosta kamachishan chaypaj. Yachamuytaj imaynachus wauqesniyki kashasqankuta. Apamuwankitaj imallankutapis allillan kashasqankuta yachanaypaj.

¹⁹ Chaykamataj Saulwan Davidpa wauqesninwan, chanta tukuy israelitaspiwanqa Ela nisqa vallepi filisteoswan maqanakuspa kasharqanku.

²⁰ Chay q'ayantintaj Davidqa tutamanta jatarikorqa, ovejasninta wajman mink'arikuspataj rerqa, tatan Isaí mikhunasta wakichisqanta apaspa. Maqanaku jaraman chayashajtintaj, soldadosqa maqanakupaj wakichikusharqanku, maqanaku qhaparqakaykunasta qhaparispa.

²¹ Israelitaswan filisteoswanqa, ujnin uj chimpapi, ujnintaj uj chimpapi sayaykorqanku maqanakunankupaj.

²² Davidqa chay apasqan q'episninta saqerqa, pichus armasta mikhuykunastapis qhawaj chay runaman. Usqhayta rispataj maqanakoj soldados ukhuman yaykuykorqa, tapunampaj imaynachus wauqesnin kashasqankuta.

²³ Paykunawan parlashajtintaj Gat llajtamanta chay maqanakoj filisteo Goliatqa llojsimorqa filisteospa chaupinmanta. Sayaykuspataj israelitasta ujtawan wajyarqa paywan maqanakoj llojsinankupaj, imaynatachus sapa p'unchay ruwaj kikillantapuni. Davidtaj chayta uyarerqa.

²⁴ Tukuy israelitasqa chay runata rikuytawan mayta mancharikuspa ayqej kanku ñaupaqenmantaqa.

²⁵ Chanta israelitasqa ninakoj kanku: Rikunkichejchu chay llojsimoj runata? Payqa Israelpa contrampi sayaykuspa parlaj jamun. Pichus chay runata atipajmanqa rey qonqa ashkha qolqeta, ususintapis warmin kanampaj qollanqataj, chanta tukuy ayllumpis impuestota mana paganqankuchu.

²⁶ Chaypacha David tapurerqa chay ladompi kajkunata: Imatataj qonqanku kay filisteo runata wañuchejman, Israelta k'umuykachachejta qhechojmanri? Pitaj kasqa Diosta mana rejsej runari, kausaj Diospa soldadosnimpa contrampi sayaykojri?, nispa.

²⁷ Davidmantaj kuticherqanku, imaynatachus ñaupajpi nerqanku ajinallatataj imatachus qonankuta, pillapis Goliatta wañuchejmanqa.

²⁸ Eliabqa Davidpa kuraj kaj wauqenqa phiñarikorqa chay waj soldadoswan parlasqanta uyarispa, nerqataj: Imamantaj kayman jamorqankiri? Pimantaj chay pisi ovejasta ch'in pampapi saqerqankiri? Noqa rejsiyki wapuykachajpuni kasqaykita, sajra yuyasqasniykitapis. Qanqa jamorqanki maqanakuta qhawakunaykiraykulla, nispa.

²⁹ Davidtaj kuticherqa: Kunan imatataj noqa ruwasqaniri parlarispalla?, nispa.

³⁰ Chaymantaqa wauqenmanta ithirispa wajkunatañataj tapurerqa. Chay soldadospis ñaupajta nerqanku chay kikillantataj kuticherqanku.

³¹ Davidpa parlasqanta uyarejkunaqa Saulman rispa willaykamorqanku; Saultaj wajyacherqa.

³² Chaypacha Davidqa Saulman nerqa: Ama pipis sonqompi manchachikuchunchu kay filisteoraykoqa. Noqa kamachiyki risaj chay runawan maqanakamoj.

³³ Saulqa Davidman nerqa: Qan sapallaykeqa mana riyta atiwajchu chay filisteowan maqanakoj riytaqa. Qanqa waynallaraj kanki, chay filisteoqa wayna kasqanmantapacha maqanakuyman yachasqa.

^34-35 Davidtaj kuticherqa: Kay kamachiykeqa tatampa ovejasninta michishaspa, león, chayri osopis jamuspa ovejasta apakapojtenqa, qhepanta rispa siminmantaña orqhoj kani, noqaman phinkiykamuwajtintaj, quijadanmanta jap'ispa wajtaj kani wañunankama.

³⁶ Ajinata kay kamachiykeqa wañuchej leontapis, chayri osotapis. Kay Diosta mana rejsej runatapis kikillantataj ruwasaj, kausaj Diospa soldadosnimpa contrampi sayaykusqanrayku.

³⁷ Señorqa librawarqa leonmanta, chayri osomantapis, kikillantataj librawanqa kay filisteoj makinmantapis, nispa. Chaypacha Saulqa nerqa: Riy ari, Señortaj qanwan kachun, nispa.

³⁸ Chaymantataj Saulqa kamacherqa Davidman p'achallichinankuta, paypa churakunan p'achasnillanwantaj. Umanman broncemanta ruwasqa monterata churaykunankuta, chaymantataj uj pechoqueratawan churaykorqanku.

³⁹ Chay qhepantataj Davidpa chumpinman uj espadata wataykorqanku p'achan pataman. Ajina p'achallisqa kaspataj puriyta munarqa. Mana chayman yachasqa kaspataj chay ratopacha Saulman nerqa: Mana puriyta atinichu kay jina p'achawanqa, mana chayman yachasqachu kasqayrayku, nispa. Chaymantataj Davidqa chay tukuy p'achasta lluch'ukaporqa.

⁴⁰ Tojnunta oqhariykukuspataj wayq'omanta phishqa llusq'o rumista ajllaspa pallakamorqa, chaykunatataj wayaqanman churaykorqa. Makimpi warak'ata jap'irisqataj filisteowan tinkoj rerqa.

⁴¹ Chay filisteopis pisimanta pisi Davidwan maqanakoj qayllaykamushallarqataj. Yanapajnintaj ñaupaqenta risharqa.

⁴² Goliatqa Davidta rikuytawan pisipaj qhawarqa waynallaraj kasqanrayku, chanta pukalu, allin rijch'ayniyojtaj kasqanrayku.

⁴³ Chaymantataj filisteoqa Davidman nerqa: Noqaqa alqochu kani k'aspiwan jamunawaykipaj, nispa. Chanta filisteoqa diosnimpa sutimpi Davidta maldicerqa.

⁴⁴ Nillarqataj: Jamuy kayman chay aychaykita aycha mikhu p'isqosman qarasaj, monte sajra animalesmanwan, nispa.

⁴⁵ Davidtaj payman kuticherqa: Qanqa espadawan jamushawanki jinallataj lanzawan, jabalinawan ima, noqataj qampa contraykipi jamushani, israelita soldadospa Tukuy Atiyniyoj Señor Diosnimpa sutimpi. Paypajtaj qanqa sajrata rimarqanki.

⁴⁶ Kunampacha qanta Señorqa makisniyman jaywawanqa, kunampacha wañuchisqayki, umaykitataj qholusaj, tukuy filisteospa aychasnintataj chay aycha mikhu p'isqosman, jinataj chay monte sajra animalesman qarasaj. Jinamanta tukuy runas yachanqanku Israel ukhupi uj Dios kasqanta.

⁴⁷ Tukuy tantasqa runaspis yachanqanku, Señorqa mana espadawanchu salvasqanta, nitaj lanzawanchu. Kay tukuy maqanakoyqa Señorpatamin, paytaj qankunataqa makisniykuman jaywawasqayku.

⁴⁸ Chay filisteo runaqa sayariytawan Davidwan tinkoj rerqa. Davidpis usqhayllata chay filisteo runawan tinkoj correrqa.

⁴⁹ Davidqa wayaqanmanta makinwan ujnin rumita orqhorqa. Chay rumiwan warak'aspataj filisteoj uma frentempi jap'erparicherqa. Uma frentempi rumi sat'isqayoj filisteoqa uyamanta pampaman choqakorqa.

⁵⁰ Ajinata Davidqa atiparqa filisteotaqa. Uj warak'allawan uj rumiwantaj Davidqa wañorparicherqa, makimpi mana espadayoj kaspalla.

⁵¹ Davidqa filisteoj patanman phinkiykuspa espadallantataj jallch'ananmanta orqhospa wañuchiyta tukuycharparerqa, chaymanta umanta qholurparerqa. Filisteosqa chay sumaj maqanakoj runankuta rikuspa ayqerikaporqanku.

⁵² Chaypacha Judamanta kajkuna, jinataj Israelmanta kajkunapi qhaparispa qhatiykorqanku Gat llajtaman yaykunakama, Ecronman yaykuna chaynejkamataj. Saaraimantapacha, Gatman, Ecronmampis rina ñan pataspeqa filisteo soldadospa ayasninku wijch'u wijch'ulla kasharqanku.

⁵³ Israelitastaj filisteosta qhatiykusqankumanta kutirimuspa, filisteokunaj jarankupi tukuy imanku kajta jap'ikaporqanku.

⁵⁴ Chaypacha Davidqa filisteoj umanta Jerusalenman aparqa, armasnintataj jarampi saqerqa.

⁵⁵ Chay filisteowan Davidwan maqanakoj rishajtin Saulqa Abnerta soldadospa kuraj kamachejnin tapukorqa: Abner niway, pitaj jaqay waynaj tatanri?, nispa.

⁵⁶ Abnertaj kuticherqa: Jurani reyníy, mana yachanichu, nispa. Reytaj nerqa: Allinta tapuriy pejpa churinchus chay wayna kasqanta, nispa.

⁵⁷ Maypachachus Davidqa kutipusharqa filisteota wañuchisqanmanta, chay runaj umanta aysariykususpa, chaypacha Abnerqa Davidta Saulpa ñaupaqenman pusarqa.

⁵⁸ Saultaj tapurerqa: Niway majt'illu, pejpa wawantaj kankiri?, nispa. Davidtaj kuticherqa: Belempi tiyakoj kamachiykej Isaejpa wawan kani, nispa.