1 Samuel 16 - Qheshwa Biblia DC

Davidta ajllarqa rey kanampaj

¹ Señorqa Samuelman nerqa: Mayk'ajkamataj llakikunki Saulmantari?, nispa. Noqaqa manaña munanichu Israel ukhupi pay reyllapuni kanantaqa. Wajraykita aceitewan junt'achiy, riytaj Isaejpa wasinman Belén llajtaman, paypa ujnin kaj wawanta rey kanampaj ajllaniña.

² Samuelqa kuticherqa: Imaynatataj riymanri?, nispa. Saulchus yachanman chayqa wañuchiwanmanchari! Señortaj kuticherqa: Uj waka uñata jap'iy, niytaj: Señorpaj uj rikuchikuta jaywaj jamuni nispa.

³ Chaymantaqa Isaita wajyay chay rikuchiku jaywasqaykiman, noqataj nisqayki imatachus ruwanaykita. T'aqay pitachus noqa nisqayki chayta rey kanampaj aceitewan jawispa.

⁴ Imastachus Señor nisqanta Samuelqa ruwarqa. Maypachachus Belenman chayajtinñaqa, chay llajtamanta kurajkuna uj chhika mancharisqa taripaj llojsimorqanku, taporqankutaj: Allin sonqowanchu jamushawayku?, nispa.

⁵ Samueltaj kuticherqa: Arí, nispa. Jamushani Señorman uj rikuchikuta jaywaj. Llimphuchakuychej, noqawan khuskataj Señorman jamuychej rikuchikuta jaywaj. Chaymantataj Samuelqa Isaita wawasnintawan llimphucharqa, wajyarqataj Señorpa rikuchikunman.

⁶ Chayamojtinkutaj Samuelqa rikorqa Eliabta, yuyarqataj: Kaychá kanqa Señorpa ajllasqan reyqa, nispa.

⁷ Señortaj nerqa: Ama allin rijch'ayninta qhawaychu, nitaj jatun kaynintapis, paytaqa noqa qhesachani. Runaqa k'acha kaynillanta qhawan, noqaqa mana runa jinachu qhawani, manachayqa sonqonta qhawani, nispa.

⁸ Chaypacha Isaeqa Abinadabta ajllarqa, Samuelmantaj pusarqa. Chanta Samuelqa nillarqataj: Nillataj kaytapis Señorqa ajllanchu, nispa.

⁹ Chaymanta Isaeqa Samatañataj pusarqa; chaytapis Samuelqa nillarqataj: Manallataj kaypis Señorqa ajllanchu, nispa.

¹⁰ Isaeqa, qanchis qhari wawasninta Samuelman chimpacherqa. Samueltaj nerqa ni mayqenta Señor ajllasqanta.

¹¹ Samueltaj ujtawan tapullarqataj: Manachu astawan wawasniyki tiyan?, nispa. Uj aswan juch'uy kaj kanraj, payqa ovejasta michishan, nispa Isaeqa kuticherqa. Samuel nerqa: Kachay mask'amojta, chay mana chayamunankamaqa mana rikuchikutaqa jaywasunmanchu.

¹² Isaitaj payta wajyachimorqa. Chay ch'itataj k'acha pukalu, k'acha ñawisniyoj, sumaj rijch'ayniyojtaj karqa. Chaypacha Señorqa nerqa Samuelman: Kaymá chay ajllasqayqa, jatarikuy rey kanampajtaj aceitewan jawiykuy.

¹³ Chay ratopacha Samuelqa chay ch'itita aceiteyoj carneroj wajranta jap'ispa jawiykorqa wauqesnimpa ñaupaqempi. Chay p'unchaymantapachataj Señorpa Espíritun Davidman jamorqa. Chaymanta Samuelqa Ramá llajtaman kutiporqa.

Davidqa Saulta sirvin

¹⁴ Señorpa espírituntaj Saulmanta t'aqakaporqa. Uj sajra espíritu Señorpa kachamusqan payta ñak'arichisharqa.

¹⁵ Saulpa kamachisnintaj nerqanku: Qhaway wiraqochíy, Diospa kachamusqan sajra espíritu qanta ñak'arichishasunki.

¹⁶ Chayrayku wiraqochíy, kay kamachisniykita niy, uj arpa tocay yachaj runata mask'amunankuta, maypachachus chay sajra espíritu ñak'arichisojtin arpata tocanampaj qan walejyanaykipaj.

¹⁷ Saultaj kamachisninman nerqa: Mask'ampuwaychej ari pillatapis sumajta arpata tocayta yachajta; pusampuwaychejtaj kayman, nispa.

¹⁸ Chaypacha paykunamanta ujnin kamachin, nerqa: Noqa rikuni Belén llajtapi, Isaejpa ujnin wawan sumajta tocayta yachasqanta. Payqa maqanakunapajpis wapu, maychus kajta parlaj, allin rijch'ayniyoj, Señortaj paywan kashan.

¹⁹ Chaymanta Saulqa Isaíman kachasta kacharqa kay jinata ninankupaj: Kachamuway wawayki Davidta, ovejasta michin chayta, nispa.

²⁰ Isaitaj wawan Davidta Saulman kacharqa. Paywantaj apacherqa uj burropi chajnaykuspa t'antasta, uj bota vinota, uj chivitotawan ima.

²¹ Ajinamanta Davidqa Saulpa ñaupaqenman chayarqa, paypa kamachiynimpitaj qhepakorqa. Saulqa maytapuni munakorqa, armasninta apaykachanampajtaj payta churarqa.

²² Saultaj uj willajta Isaíman kacharqa, David paywan qhepakunanta mañachispa, payta kusichisqan kasqanrayku.

²³ Ajinaqa maypachachus Diospa apachimusqan sajra espíritu jamojtinkama Davidqa arpanta oqharispa tokapoj. Chaymantataj Saulqa yuyayninman kutirej, walejyajtaj. Chay sajra espiritutajri paymanta t'aqakapoj.