1 Samuel 13 - Qheshwa Biblia DC

Filisteoswan maqanakunku

^1-2 Saulqa Israelpi kamachiyta qallarishajtin ñapis machu runaña karqa, ña mashkha watastaña kamachisqanmantataj, ajllarqa Israel ayllumanta kinsa waranqa soldadosta. Iskay waranqa Micmaspi paywan qhepakorqanku, chay Betel orqospi ima, chay uj waranqa kajkunataj Jonatanwan qhepakorqanku Benjamín jallp'aspi Gabaá llajtapi. Chay puchoj runastataj Saulqa kamacherqa wasisninkuman ripunankuta.

³ Jonatanqa Gabaapi qhawasharqanku chay tukuy filisteo soldadosta wañuracherqa, chaytataj filisteos yacharqanku. Chaypacha Saulqa kamacherqa putututa waqachimunankuta tukuynin jallp'api hebreo runasman willarachispa.

⁴ Israelitasmanta kajkuna tukuyninku yacharqanku Saul filisteospa qhawaj soldadosninta tukuchisqantaña, chaymantataj filisteosqa paykunapaj may phiñasqas kasqankuta. Jinamanta israelitasqa Gilgalpi Saulwan tantakorqanku.

⁵ Ajinallatataj filisteospis israelitaswan maqanakunankupaj tantaykukorqanku. Paykunajtaqa kinsa chunka waranqa maqanaku carretasninku karqa, sojta waranqa soldadostaj caballospi maqanakojkuna; chakillapi rej soldadostaj mar qochaj t'iyusnin jina may chhikapuni karqanku. Chay qhepatataj kachaykukorqanku Micmas llajtaman, chaypitaj jarakorqanku Bet-avenmanta inti llojsimuyejpi.

⁶ Israelitasqa sinch'i llakiypi rikukorqanku filisteoswan maqanakupi, chayraykutaj pakakamorqanku chhanka jusk'usman, t'oqosman, chhanka k'ajllusman, allasqa jusk'usman, allasqa yaku jusk'usman ima.

⁷ Paykunamanta wakinkunaqa Jordán mayuta pasarqanku Gabaaman chayanankukama, jinataj Galaad chaynejmampis. Chaywampis Saulqa Gilgalpi qheparikorqaraj, tukuy soldadosnintaj sinch'i mancharisqas kasharqanku.

⁸ Chaypi Saulqa qanchis p'unchaykunastaraj suyarqa, imaynatachus Samuel nisqanman jina. Samueltaj Gilgalmanqa mana chayamorqachu, chaykamataj soldadosqa ripusharqankuña.

⁹ Chaypacha Saulqa kamacherqa: Uywasta apamuwaychej ruphachinanchejpaj, Dioswan allinyakuna rikuchikustawan jaywananchejpaj, nispa. Chanta pay kikin chay rikuchikuta ruphacherqa.

¹⁰ Chay kikimpacha Saul ruphachiyta tukusqantawantaj Samuelqa chayamorqa. Chaypacha Saulqa llojserqa taripamoj, napaykoj ima.

¹¹ Chaypacha Samuelqa nerqa: Imaraykutaj kayta ruwarqankiri?, nispa. Saultaj kuticherqa: Runas ripurashasqankuta rikorqani, qampis chay señalasqa p'unchaypaj mana chayamusqaykita. Chaykamataj filisteosqa tantasqasña kasharqanku Micmaspi.

¹² Noqataj yuyarqani paykuna Gilgalman maqaj jamunawankuta, Señormanta manaraj yanapayninta mañakushajtiy, chayrayku yuyarqani walej kasqanta, usqhayllata noqa kikiy Señorpaj chay rikuchikuta ruphachipusqayta.

¹³ Samueltaj kuticherqa: Kaytaqa wampu jina ruwanki. Sichus Señorpa kamachisqanta ruwawaj karqa chayqa, payqa wiñaypaj kamachiyniykita sayachinman karqa.

¹⁴ Chayrayku kunanqa kamachiyniykeqa mana unaypajchu kanqa. Señorqa mask'anña pitachus munasqanta, payta churanqa ayllunta kamachinampaj, qan mana kasusqaykirayku imatachus Señor kamachisusqanta.

¹⁵ Chay ratopacha Samuelqa Gilgalmanta riporqa. Saultaj chay puchoj soldadoswan Benjamín jallp'api Gabaa llajtaman riporqa. Chaypitaj Saulqa paywan rejkuna soldadosta yuparqa sojta pachajta jina.

¹⁶ Saulwan wawan Jonatanwan, paykunawan risharqanku chay soldadospiwan qhepakorqanku Benjamín jallp'api Gabaa llajtapi. Chaykamataj filisteosqa Micmaspi jarasqas kasharqanku.

¹⁷ Kinsa tropa soldados maqanakoj llojsimorqanku filisteospa jarankumanta, ujnin tropaqa Oframan rerqa, Saul nisqa chaynejman.

¹⁸ Ujnin tropataj Bet-horon chaynejman rerqa. Kinsa kaj tropataj Zeboim valle qhawarisqa lomaman rerqa, chayqa kashan ch'in pampa qayllapi.

¹⁹ Israel tukuynin jallp'aspi herrerosqa mana karqankuchu, chayrayku filisteosqa yuyarqanku, israelitasqa espadasta, lanzastapis mana ruwachikuyta atisqankuta.

²⁰ Chayrayku tukuy israelitasqa filisteosmampuni rinanku karqa ausachikupaj: Rejankuta, azadonninkuta, hachankuta, chayri chujchukankutapis.

²¹ Ausasqankumantaqa pagachikoj kanku uj siclo nisqa qolqeta kinsaman t'aqaspa iskay kaj t'aqanta, hachasta, jinataj chay t'ojsinasmantapis uj siclo qolqeta.

²² Chayrayku pischus Saulwan rerqanku chaykunamantaqa ni mayqempis espadayojchu, nitaj lanzasniyojchu karqanku chay maqanakuna p'unchaypeqa, manchayqa Jonatampallata kaporqa.

²³ Chaypachataj filisteosmanta uj tropa soldados jamusharqanku Micmas cheqata jark'anankupaj.