1 Samuel 10 - Qheshwa Biblia DC

Samuelqa Saulta Israelpa reynin kanampaj ajllarqa

^1-2 Chaypacha Samuelqa aceite botellata jap'ispa Saulpa uman pataman jich'aykorqa, much'aykuspataj nerqa: Kunanmanta Señorqa t'aqasunki, Israel ayllumpa reynin kanaykipaj. Qan kamachinki atipachinkitaj chay muyuynimpi kaj enemigosninmanta. Kay uj señal kanqa qanta Señorqa ayllumpa reynin kanaykipaj t'aqasusqanmanta: Kunanqa kaymanta ripushaspa iskay runaswan tinkukunki Raquel maypichus p'ampasqa kashan, Selsa llajta qayllapi. Chayqa kashan Benjamimpa jallp'asnin chaypi. Paykunataj nisonqanku mask'asharqanki chay chinkaj burrosta tarisqankutaña, chanta nisonqanku tataykeqa manaña burrosmantachu llakisqa kashasqanta, manachayqa qankunamanta llakikushan, tapurakushantaj: Imanasajtaj wawaymantari?, nispa.

³ Aswan jaqaymantaj, Taborpi encina sach'a nisqa chayman chayajtiyki tinkukunki kinsa runaswan, Diosta yupaychaspa Betelman rejkunawan. Ujnenqa apashanqa kinsa chivosta, ujnintaj kinsa t'antasta, ujnintaj qara bota vinota.

⁴ Paykunaqa napaykuspa iskay t'antasta jaywarisonqanku. Chaytataj jap'ikunki.

⁵ Chay qhepantataj chayanki Diospa loman Gabaapi nisqaman, maypichus filisteokunaj soldadosnin kashanku chayman. Chay llajtaman yaykushaspataj tinkukunki uj t'aqa profetaswan, paykunaqa musphaypi jina parlaspa loma patapi Diosta yupaychana wasimanta uraykamushanqanku. Paykunaj ñaupaqenkutataj runas rishanqanku tamboresninkuta tocaspa, chanta cajasta, quenasta, arpasta ima tocaspa.

⁶ Chaypacha Señorpa espíritun atiynin ima jamusonqa, chanta paykuna jinallataj parlanki. Waj jina runamantaj tukurparinki.

⁷ Kay imas qhatirisojtenqa, imachus allin rijch'asonqa chayta ruway, Diostaj yanapasonqa.

⁸ Gilgal llajtaman ñauparishay, chaypi aswan qhepata tinkukusunchej, Señorman jaywanapaj ruphachinasta, allinyakunapaj nisqa rikuchikustawan. Chaypi qanchis diata suyawanki chayamunaykama, imatachus ruwanaykitataj nisqayki.

⁹ Samuelmanta ripunampaj Saul t'aqakapojtinkamataj Diosqa Saulpa sonqonta waj jinaman tukucherqa. Chay kikin p'unchaypitaj chay tukuy señales junt'akorqanku.

¹⁰ Saulwan chay kamachinwan Gabaa llajtaman chayajtinkutaj, profetasqa paykunawan tinkukorqanku. Chaypacha Señorpa Espíritun atiyninwan ima Saulman jamorqa. Saultaj chay profetas jina parlarqa.

¹¹ Pischus payta rejsejkunaqa, chay profetas jina parlajta rikuspa ujkuna ujkunawan ninakorqanku: Imanakuntaj jaqay Cispa wawanri? Saulpis profetallatajchu?

¹² Paykunamantaj ujnin nillarqataj: Pitaj paykunaj tatankuri?, nispa. Chaymantapacha uj parlay rikhurerqa: Saulpis profetallatajchu?, nispa.

¹³ Ñapis chay profeta jina parlanan pasapojtinñaqa, Saul loma patapi Diosta yupaychanaman rerqa.

¹⁴ Ujnin tiontaj tapurerqa payta chay kamachinta ima: Maymantaj rerqankichejri?, nispa. Saultaj kuticherqa: China burrosta mask'aj, mana tariyta atispataj rerqayku Samuelta watukoj, nispa.

¹⁵ Saulpa tiontaj tapurerqa: Ima nisorqachejtaj Samuelri? Willariway ari, nispa.

¹⁶ Saultaj kuticherqa tionman: Sut'inta willawarqayku chinkaj burrosta tarisqankutaña. Saultaj mana imatapis parlarqachu rey kananmantaqa Samuel payman parlasqanmantaqa.

¹⁷ Chay qhepantataj Samuel wajyacherqa tukuy israelitasta Señorqa yupaychanankupaj, Mizpa llajtapi.

¹⁸ Chaypitaj nerqa: Señor, Israelpa Diosnenqa nin: Qankuna israelitasta noqa Egiptomanta orqhomorqaykichej, egipciospa atiyninmantataj kacharicherqaykichej, jinataj tukuy naciones ñak'arichisorqachej chaykunamantapis.

¹⁹ Kunantaj Diosniykichejta qhesachankichej qankunaqa, tukuy laya llakiykunasmanta, nanaykunasmantapis orqhosorqachej chay Diosta qankunaqa qhesacharqankichej kamachinasuykichejpaj uj reyta mañakuspa. Chayrayku kunanqa qayllaychej Señorpa ñaupaqenman, sapa ayllu, jinataj sapa familia ima.

²⁰ Chaymantataj Samuelqa kamacherqa Israelmanta tukuynin ayllus chimpaykunankuta. Chanta Benjamimpa aylluntaj ajllasqa karqa.

²¹ Chaymantataj kamacherqa Benjamimpa ayllunmanta kajkunata. Chaypitaj ajllasqa karqa Matrej familian, chay familiamantataj ajllasqa karqa Cispa wawan Saul. Payta mask'arqanku, manataj tarerqankuchu.

²² Chayrayku Señorta ujtawan taporqanku, chaypi paykunawanchus manachus Saul kashasqanta. Señortaj paykunaman kuticherqa: Chaypi Saulqa q'epis chaupipi pakasqa kashan, nispa.

²³ Chaypacha usqhayta rispa q'epis chaupimanta orqhoytawan pusamorqanku. Paykuna ukhuman rejtintaj, rikorqanku ni mayqempis paykuna ukhumantaqa lijrallantapis sayaypi pasasqanta.

²⁴ Samueltaj tukuyta tapurerqa: Rikunkichejñachu Señor ajllapusorqachej chay reyta? Mana mayqen israelitaspis paymanqa jap'ikunchu! Kausachun reyqa nispa israelitasqa qhaparerqanku.

²⁵ Chay ratopacha Samuelqa israelitasman yachacherqa reypa kamachiykunasninta, ruwanasninta ima. Chay tukuytataj uj libroman qelqaykorqa, Señorta yupaychanaman jallch'arqa. Chaymantataj Samuelqa kamacherqa tukuyninku wasisninkuman kutipunankuta.

²⁶ Saulpis ripullarqataj Gabaapi wasinman. Paywantaj rerqanku ashkha wapu runas pikunatachus Señor sonqosninkuta kuyucherqa chaykuna.

²⁷ Wakin sajra runas parlarerqanku: Kaychu noqanchejta salvayta atiwasunman?, nispa. Qhesacharqankutaj mana ni ima t'inkata qospa. Chaywampis Saulqa paykunata mana rikojman tukorqa.