1 Samuel 1 - Qheshwa Biblia DC

Anaman Dios qon uj qhari wawata

¹ Efraimpa orqosnimpi Ramá nisqa cheqapi, tiyakorqa uj runa Elcana sutiyoj, Payqa Zufpa familianmanta karqa. Jerohampa wawan karqa, Eliojpa allchhintaj. Eliojpa tatantaj Tohu karqa, paytaj Zufpa wawan karqa. Payqa Efraimpa ayllunmanta karqa.

² Elcanaqa iskay warmisniyoj karqa. Ujnimpa sutin karqa Ana, ujnimpatataj Penina. Peninaqa wawasniyoj karqa, Anataj mana wawasniyojchu karqa.

³ Sapa wata Elcanaqa llajtanmanta Siloman rejpuni, chaypi Tukuy Atiyniyoj Señorta yupaychamoj, rikuchikustawan jaywamoj. Silopeqa kasharqanku Elí sacerdotej iskay wawasnin, sutisninkutaj ujnimpataqa Ofni, ujnimpatataj Finees karqa. Paykunapis Señorpa sacerdotesnillantaj karqanku.

⁴ Maypachachus Elcana rikuchikuta jaywaj chaypachaqa, t'aqapoj maychus payman chayasqanta, Penina warmimpaj, jinataj qhari wawasnimpaj, warmi wawasnimpajpis.

⁵ Señorqa Anaman wawasta mana qorqachus; chaywampis Elcanaqa payman aswan allinnin kajkunata qorqa astawan payta munakusqanrayku.

⁶ Chayrayku Peninaqa Anawan chejninakoj, phiñachej, asipayaj, p'enqachejtaj, Señorqa payman wawasta mana qosqanrayku.

⁷ Sapa wata Señorta yupaychana wasinman rejtinku Peninaqa asipayaspa llakichillajpuni. Chayrayku Anaqa waqallajpuni, manataj mikhojchu.

⁸ Qosan Elcanataj nerqa: Ana, imaraykutaj waqankiri? Imaraykutaj llakisqalla kashanki manataj mikhunkichuri? Manachu noqaqa chunka wawasmantapis aswan allinraj kani?

⁹ Uj kutipi Silopi kashaspa Anaqa mikhuykuytawankama jatarikaporqa. Sacerdote Elitaj uj jatun sillapi tiyasharqa, Señorpa wasin punku qayllanejpi.

¹⁰ Anataj waqaspa, sonqon ukhupi may llakisqataj Señormanta mañakoj churakorqa.

¹¹ Señorman kayta nerqa: Tukuy Atiyniyoj Señor: Sichus qan qhawariwaj kay kamachiykej llakiyninta chayqa, noqamanta yuyarikuspa uj wawata qowankiman chayqa, noqa qopusqayki tukuy kausaynimpi qampa kamachiyki kanampaj, manataj jayk'ajpis chujchasnin k'utusqaschu kanqanku.

¹² Anaqa unaytaña Señorpa ñaupaqempi mañakushasqa, Elitaj Anaj siminta qhawasharqa.

¹³ Payqa sonqon ukhullapi mañakusharqa, mana parlasqanqa uyarikorqachu, manachayqa simillan kuyusharqa. Elitaj yuyarqa Anaqa machasqa kashasqanta.

¹⁴ Chanta Eleqa nerqa: Mayk'ajkamataj machasqa kankiri? Saqellayña chay vinota!, nispa.

¹⁵ Mana jinachu, wiraqochíy, nispa Anaqa kuticherqa: Mana ujyarqanichu ima vinotapis, nitaj poqosqa ujyanastapis, manachayqa sinch'i llakisqa kashani; chay llakiyniytataj Señorpa ñaupaqempi waqashani sonqoy tiyaykunampaj.

¹⁶ Ama yuyaychu uj sajra warmi kasqayta, manachayqa mañakusharqani chay tukuy tiempopi phutisqalla, llakisqataj kasqayrayku.

¹⁷ Elitaj kuticherqa: Sonqo tiyaykusqa ripuy, Israelpa Diosnintaj qosuchun chay tukuy mañakusqaykita.

¹⁸ Anataj kuticherqa: Dios pagarapusunki, nispa. Chaymantataj Anaqa kutiporqa maynintachus jamusqanta. Mikhorqataj, manañataj ujtawampis ni jayk'aj llakikorqachu.

¹⁹ Q'ayantin paqarintaj tutamanta, Señorta yupaychaytawankama kutiporqanku Ramapi wasinkuman. Chay qhepantataj Elcanaqa puñuykorqa warmin Anawan, Señortaj yuyarikorqa chay mañakusqanmanta.

²⁰ Ajinamanta Anaqa wijsallisqa rikhurerqa. Nacechikunan tiempo chayamojtinñataj, uj qhari wawata nacechikorqa, suticharqataj Samuelta, nerqataj: Kaytaqa Señormanta mañakorqani, nispa.

²¹ Chaymantataj Elcanaqa tukuy ayllusninwan Siloman rerqa, chaypi Señorman jaywamunampaj sapa wata rikuchikuta qojpuni chayta. Chanta Señorman qosqayki nisqantawan junt'apoj.

²² Anataj mana rerqachu, qosanmantaj kay jinata nerqa: Mana riymanrajchu kay wawata januk'anaykama. Chaymantaraj risaj Señorman jaywamoj, chaypi wiñaypaj qhepakapunam paj.

²³ Qosan Elcanataj kuticherqa: Ruwallay imachus allin rijch'asunki chayta. Qhepakullay wawata januk'anaykikama. Señortaj junt'achun qosaj nisusqanta. Ajinamanta Anaqa qhepakorqa wawata uyawanampaj januk'anankama.

²⁴ Wawata januk'aytawantaj Silopi Señorta yupaychana wasiman aparqa. Wawa juch'uyllaraj kashajtin apallarqataj kinsa waka uñasta, iskay chunka iskayniyoj libra trigo jak'utawan, chanta uj tinaja vinota ima.

²⁵ Chaypacha uj waka uñata ñak'arqanku, wawatataj sacerdote Eliman saqeporqanku.

²⁶ Chaypitaj Anaqa payta nerqa: Uyariway Señorníy, noqa kani chay warmi, qayllaykipi Señormanta mañakusharqani chay.

²⁷ Señormanta mañarqani kay wawata qonawanta. Pay qowan chay mañakusqayta.

²⁸ Noqamantaqa Señorman jaywapuniña, kausanankamaqa Señorpaj kausachun. Chaypacha Eleqa pampakama k'umuykukuspa Señorta yupaycharqa.