1 Reyes 9 - Qheshwa Biblia DC

Diosqa uj tratota Salomonwan ruwan

^1-2 Maypachachus Salomonqa Señorpa wasinta, reypa wasintapis, tukuy imastachus Salomón ruwayta munarqa chaykunatawan tukuchasqantawan, Señorqa Salomonwan uj kutitawan rikhurerqa, imaynatachus ñaupajpi Gabaompi rikhurerqa ajinallatataj.

³ Señortaj payman nerqa: Noqaj ñaupaqeypi mayta mañakuwasqaykita uyariykiña. Kay ruwapuwasqayki wasitapis llimphuchaniña, chaypi sutiy wiñaypaj kanampaj, chayllapitaj ñawisniy sonqoypis tukuy p'unchay kanqa.

^4-5 Sichus qan ñaupaqeypi purinki tatayki David jina, cheqan sonqowan mana k'aminataj, ruwaspataj tukuy imata nisusqayta, waqaychaspa kamachisqasniyta nisqasniytawan chayqa, noqa Israelpa tronoykita sumajta wiñaypaj sayachisaj, imaynatachus tatayki Davidman parlarqani: Mirayniykimanta Israelpa tronompi tiyakoj qhareqa kallanqapuni, nispa.

^6-7 Sichus qankuna wawasniykichejpis, mana kasukoj sonqowan noqamanta karunchakuwajchej, mana waqaychaspa kamachisqasniyta, leyesniyta ima, qankunaman qorqaykichej chaykunata, manachayqa waj dioskunaman rispa sirvimuwajchej, qonqorikamuwajchejtaj chayqa, noqaqa orqhosqaykichej tukuynin israelitasta kay jallp'ata qorqaykichej chaymanta; sutiypi kay wasita llimphuchasqaytapis wijch'ullasajtaj ñaupaqeymanta, Israelqa cuentopaj asipayanapajtajqhepakunqa, tukuy nacionespaj.

⁸ Kay wasitaj chhika sumaj qhawasqa kashaspapis chayninta tukuy pasajkuna t'ukonqanku asikonqankutaj: Imajtintaj Señorqa kay wasita jallp'antapis kay jinata ruwanrí?, nispa.

⁹ Nenqankutaj: Paykunaqa ñaupa tatasninkuta Egiptomanta orqhomorqa chay Señor Diosninkuta saqerparisqankurayku, waj dioskunaman makisninkuta oqharispa, qonqorikuspa yupaychaspataj, chaymantamá Señorqa paykunaman kay tukuy sajra imasta apachimun.

Salomompa waj imastawan ruwasqasnin

^10-11 Iskay chunka watas kasqanmantaña, maypachachus Salomón iskaynin wasista ruwayta tukuchisqanmanta, Señorpa wasinta paypa wasintawan ima, chaykunapaj Tiromanta rey Hiramqa apachimusqa k'aspista cedromanta pinomantawan, mashkhatachus munasqanta qoritapis. Chaymanta rey Salomonqa Hiramman iskay chunka llajtasta Galilea chaynejpi qorqa.

¹² Tiromanta rey Hiramqa Salomón qorqa chay llajtasta qhawarej rerqa, manataj payman allinchu rijch'arqa.

¹³ Chanta nerqa: Imapaj kay jina llajtasta noqaman qowankiri, wauqéy?, nispa. Suticharqataj Cabul jallp'as nispa, chay sutiwampuni kunankama qhepakunku.

¹⁴ Hiramtaj reyman apachimorqa kinsa waranqa isq'on pachaj sojta chunkayoj kilos qorita.

¹⁵ Rey Salomonqa llank'ajkunata mit'aman churarqa, Señorpa wasinta paypa wasintawan, Milota, Jerusalempa perqasnintawan ruwanankupaj; chanta Hazorat, Meguidota, Gezer llajtastawan, kayrayku.

¹⁶ Rey faraontaj Egiptomanta llojsimuspa Gezerta jap'ispa, ninawan kanaykorqa, tukuynin cananeos chay llajtapi tiyakojkunatataj wañuracherqa. Chay llajtatataj chayaqeta jina qoporqa warmi wawan, Salomompa warminman.

¹⁷ Salomontaj Gezerta ura kaj Bet-horón llajtatawan jallch'acherqa,

¹⁸ chantá Judá ch'in jallp'anejpi Baalatta, Tadmortawan;

¹⁹ ajinallatataj maypichá Salomón mikhuykunasta waqaychaj chay llajtasta jallch'acherqa; chantá carretaspaj, caballospi purejkuna soldadospaj llajtastawan. Imastachá Salomón ruwayta munarqa chay tukuyninta ruwacherqa Jerusalempi, Libanopipis, maykunastachá kamacherqa chay tukuynimpipuni.

²⁰ Kay llajtasmanta qhepakojkunata: Amorreosmanta, heteosmanta, fereseosmanta, heveosmanta, jebuseosmantawan, chay mana israelitaschu kajkunata;

²¹ chaykunaj mirayninkumanta chay jallp'api qhepakojkunata, israelitasqa mana tukuchiyta aterqankuchu, chay tukuyninkuta Salomonqa sinch'i llank'aykunasman churarqa, kunankamataj chay jinapi qhepakunku.

²² Salomonqa israelitaspa wawasninmanta mana mayqenninkutapis kamachismanta churarqachu. Paykunataqa churarqa soldadospaj, yanapajkunaspaj, kurajkunaspaj, soldadosta kamachejkunapaj, maqanakupi carretasninta kamachejkunapaj, caballospi purejkuna soldadosnimpajwan.

²³ Salomompa churasqasnintaj qhawajkuna karqanku phishqa pachaj phishqa chunkayoj, chaykunaqa llank'ajkunasta qhawaj kanku chay tukuynin ruwanaspi.

²⁴ Faraompa warmi wawantaj Davidpa llajtanmanta astakamporqa wasinman, Salomón ruwachiporqa chayman. Chantaqa Milo nisqatañataj ruwachimorqa.

²⁵ Salomontaj jaywanata sapa wata kinsa kutita jaywaj allinyakuy jaywana ñak'asqa uywasta, q'olachinastawan jaywaj Señorpaj altarta ruwasqan patapi, chay patallapitaj inciensota q'osñichej Señorpa ñaupaqempi. Ajinata Diospa wasin ruwakuyta tukukorqa.

²⁶ Salomonqa ruwallarqataj jatuchej buquesta Ezión-geberpi, Puka Mar qochaj cantompi, Elat nisqa chaypi, chaytaj Edom jallp'api kashan.

²⁷ Hiramtaj chay jatuchej buquesnimpi kamachisninta kacharqa, qochata sumaj rejsejkunasta, Salomompa kamachisnintawan khuskata.

²⁸ Paykunataj Ofirman rispa chunka tawayoj waranqa kilos qorita rey Salomonman apamorqanku.