1 Reyes 6 - Qheshwa Biblia DC

Salomonqa Diospa wasinta ruwachin

¹ Israelitas, Egipto jallp'amanta llojsimpusqankumanta tawa pachaj pusaj chunkayoj watasña kashajtin, Salomontaj Israel jallp'api tawa watataña kamachishajtintaj, Zif nisqa iskay kaj killapi, chaypacha Salomonqa qallarerqa Señorpa wasinta ruwaytaqa.

² Chay wasita Salomonqa Señorpaj ruwacherqa, chaytaj kay jina karqa: Sayt'unman iskay chunka qanchisniyoj metros, anchontaj isq'on metros, patamantaj chunka kinsayoj metros khuskanniyoj.

³ Diosta yupaychana wasej ñaupaqempi corredorqa anchonman isq'on metrosniyoj karqa, chay wasej anchon kikillantaj. Chay wasej ñaupaqenqa anchonman tawa metro khuskanniyoj karqa.

⁴ Chay wasej ventanasninta rejillasniyojta ruwacherqa.

⁵ Temploj puraj lado muyuynimpi, Diospa tiyakunan cheqapiwan cuartosta muyurisqata ruwacherqa, chay wasej perqallanmantaj k'askasqasta.

⁶ Ura kaj waseqa iskay metro uj cuarta kurajniyoj anchonman karqa; chaupi wasitaj iskay metro kinsa cuarta kurajniyoj karqa, pata wasitaj kinsa metro iskay t'ajlliyoj. Chayqa jawannejman juch'uychachisqa karqa, temploy perqanta jatuchej k'aspista churaspa ama jusk'uramunankupaj.

⁷ Chay wasita ruwashajtinkutaj, fierromanta mana ima herramientaj sonasqallampis uyarikorqachu, ni martillos, ni hachas, imaraykuchus chay tukuy rumista ruwasqallataña apamorqanku, churaykunatapacha.

⁸ Ura kaj wasej punkonqa temploj paña ladompi karqa, chaymanta iskay kaj wasiman kinsa kajmampis llojsinapajqa uj muyurisqa sarukunasniyoj escalera karqa.

⁹ Salomontaj templota tukuchaytawan, chay wasi ukhoj patanta cedro tablaswan mast'aykorqa.

¹⁰ Ruwallarqataj jatun wasita, chaytaj aposento sutiyoj karqa, temploj tukuynin muyurisqata, pataman iskay metro uj cuarta kurajniyoj karqa, chaytaj cedro k'aspiswan temploj perqanman jap'ichisqa karqa.

^11-12 Chaymantaqa Señorpa palabran Salomonman jamorqa, nerqataj: Kunanqa qan kay wasita ruwashanki, sichus leyesninman jina purinki, nisqasniyman jina ruwanki, kamachisqasniytataj waqaychanki chayqa, noqapis junt'allasqaykitaj tatayki Davidman parlasqayta.

¹³ Israelitaspa chaupimpitaj tiyakusaj, manataj Israel aylluytaqa saqerpayasajchu.

¹⁴ Ajinata Salomonqa templota ruwayta tukucherqa.

¹⁵ Wasej ukhuntataj cedromanta sillp'a tablaswan k'asqaykucherqa tukuynin perqasninta, pampamanta pata k'aspisman taripanankama, pampantapis pinomanta sillp'a tablaswan mast'aykorqa.

¹⁶ Ajinallatataj temploj ukhu k'uchunejman ruwarqa cedro tablaswan pampamanta patakama, t'aqarqa chay ukhoqa isq'on metroyoj karqa, chayqa Diospa tiyakunampaj ruwasqa karqa.

¹⁷ Diospaj t'aqasqa cheqaqa sayt'unman chunka pusajniyoj metroyoj karqa, chay kasharqa Diospa tiyakunampa ñaupaqempi.

¹⁸ Chay wasi ukhu cedro tablaswan qhatasqaqa, k'acha ruwasqas monte lakayusniyoj t'ikasniyoj jinataj k'achanchasqa karqa. Tukuynin cedro tablaswan ajina qhatasqa kaspaqa mana ima rumipis rikukorqachu.

¹⁹ Wasej ukhumpitaj wakicherqa Diospa tiyakunan cheqata, Diospa trato ruwasqa cajonninta chayman churanampaj.

²⁰ Diospa tiyakunan chay cheqaqa, pataman, anchonman, sayt'unmampis isq'on metrosniyoj karqa, chaypa ñaupaqempitaj Salomonqa ruwarqa cedromanta uj altarta, chaytataj sumaj qoriwan lluch'iykorqa.

²¹ Ajinata Salomonqa tukuy wasej ukhunta qoriwan lluch'iykorqa, Diospa tiyakunampa ñaupaqenman qorimanta cadenaswan wisq'aykorqa.

²² Tukuynin wasitataj patamanta urakama qoriwan lluch'iykorqa, ajinallatataj ruwarqa Diospa tiyakunan ñaupaqempi kaj altartapis.

²³ Diospa tiyakunan cheqapi ruwallarqataj iskay querubines nisqa angelesta, olivo k'aspimanta, sapa ujtaj pataman tawa metro khuskanniyoj karqa.

²⁴ Querubimpa sapa uj lijrantaj iskay metro cuarta kurajniyoj karqa, ajinamanta ujnin kaj lijrampa puntanmanta ujnin kajpa puntankamaqa tawa metro khuskanniyoj karqa.

²⁵ Ajinallatataj chay ujnin kaj querubimpis tawa metro khuskanniyoj karqa, chaykunaqa kikinkamallataj ruwasqas karqanku.

²⁶ Ajina iskaynimpa sayayninku tawa metro khuskanniyojllataj karqa.

²⁷ Chaykunata Diospa tiyakunan ukhuman churarqa. Lijrasninkutaj sapa ujnimpata aysarparisqas karqanku. Ujnimpata uj lado lijranqa perqaman chayarqa, chay ujnimpa lijranqa uj lado perqaman chayarqa. Ajinamanta iskayninkoj lijrasninkoqa khuskan wasipi tinkunakorqanku lijrapura.

²⁸ Chay querubinestaqa qorillawantaj lluch'iykorqa.

²⁹ Chay wasej tukuy perqasnimpitaj muyurisqata ruwarqa querubinesta, palmerasta, t'inkastawan, ukhumpitaj j awampitaj ajinata ruwarqa.

³⁰ Wasej pampantataj qoriwan lluch'erqa jawannejta ukhunnejtapis.

³¹ Diospa tiyakunanman yaykunaj wisq'anasninta monte olivo k'aspimanta ruwarqa, punku pata k'aspisnin sayashaj quejosnimpis phishqa esquinasniyoj karqa.

³² Iskaynin punkus olivo k'aspismanta karqa, chaykunapitaj ruwarqa querubinesman rijch'akojta, palmerasta, t'ikastawan, chay tukuynintataj qoriwan lluch'iykorqa.

³³ Jinallatataj olivos k'aspismanta tawa esquinasniyoj kurkusta temploj punkunman yaykunapaj ruwacherqa.

³⁴ Chanta wisq'anastaj pino maderamanta iskaynin karqa, iskaynin punkustaj kikillampi muyurej kanku mayqen ladomampis.

³⁵ Kikin wisq'anaspitaj ruwarqa querubinesman rijch'asqasta, palmerasta t'ikastawan, chaykunatapis sillp'a qoriwan k'asqaykucherqa.

³⁶ Ruwallarqataj ukhu patiopi uj perqata kinsa filayojta ch'eqosqa rumiswan, chay patanmantaj uj sinruta cedro tablaswan muyuykucherqa.

³⁷ Tawa watataña Salomón kamachishajtin, Zif nisqa chay killapi, wasej ñaupaj kaj cimientosninta churakuyta qallarikorqa.

³⁸ Chunka ujniyoj watataña kamachishajtintaj, Bul nisqa pusaj kaj killapi, tukuy imasnimpis ruwakuyta tukukorqa. Salomonqa qanchis watapi chay wasita ruwarqa.