1 Reyes 5 - Qheshwa Biblia DC

Salomonqa Hiramwan tratota ruwan

¹ Tiromanta rey Hiramqa kamachisninta Salomompaman kacharqa yachaytawankama payta jawiykusqankuta, tatan Davidpa cuentanmanta kamachinampaj, imaraykuchus Hiramqa Davidta munakojpuni.

^2-3 Chanta Salomonqa rey Hiramman kay jinata nichimorqa: Qanqa yachankiña imaynatachus tatay David uj wasita Señor Diosnimpaj mana ruwayta atisqanta, ch'ajwaslla paypa muyuynimpi kasqanrayku, tukuy enemigosninta Señorqa paypa chakisnin uraman churanankama.

⁴ Kunanqa Señor Diosneyqa sonqo tiyasqata qowayku tukuynejpi, manañataj enemigospis kanachu, nitaj ima sajrapis kanchu manchachikunapaj jina.

⁵ Kunanqa noqaqa ruwasaj niniña uj wasita Señor Diosniypaj, tatay Davidman Señor nisqanman jina: Qampa wawayki, pitachus cuentaykimanta tronoman churasaj, paymin ruwapuwanqa noqaj sutiypi uj wasita.

⁶ Kunanqa kamachiy ari Libanomanta cedro sach'asta k'utupunawankuta. Noqaj kamachisneyqa qampa kamachisniykita yanapanqanku, noqataj pagasqayki kamachisniykimanta mashkhatachus niwasqaykita. Imaraykuchus qanqa yachanki, noqaykoqa sach'asta k'utuyta mana yachasqaykuta sidonios jinaqa.

⁷ Hiramtaj chay jinata Salomón nichimusqanta uyarispa, may jatuntapuni kusikorqa, nerqataj: Kunantaj, Señorqa bendicisqa kachun, sumaj yachayniyoj wawata Davidman qosqanmanta, chay chhika jatun nacionta kamachinampaj.

⁸ Hiramtaj Salomonman nicherqa: Uyariykiña imatachus nichimuwasqaykita, chay tukuy nisqaykiman jina ruwachisaj, k'aspista cedromanta pinomantawan.

⁹ Noqaj kamachisneyqa, Libanomantapacha mar qocha cantokama uraykuchimonqanku, chaymantataj apachimusqayki balsaspi mar qochanejta maymanchá qan nimuwanki chaykama. Chaypitaj phaskaraspa qanqa jap'ikapunki, qantaj junt'anki nisusqayta aylluypaj mikhunata apachimuspa.

¹⁰ Hiramqa Salomonman qorqa k'aspista cedromanta, pinomantawan, mashkhatachus munasqanta.

¹¹ Salomompis Hiramman ayllumpaj mikhunasta qorqa, iskay chunka waranqa cargas trigota, tawa waranqa tawa pachajniyoj litrosta sumajnin kaj olivo aceitetawan. Chay jinata Salomonqa sapa wata Hiramman qoj.

¹² Ajinata Señorqa nisqanman jina Salomonmanqa sumaj yachayta qorqa. Hiramwan, Salomonwan uj tratota ruwarqanku, ajinamanta paykuna ukhupeqa mana ima ch'ajwapis karqachu.

¹³ Salomontaj kamacherqa tukuynin Israelmanta kinsa chunka waranqa ajllasqa runas mit'api llank'anankupaj.

¹⁴ Chay ajllasqa kajkunamanta Libanoman kacharqa, chunka waranqa chunka waranqamanta sapa killa, mit'ankuman jina. Chaykunaqa uj killata Libanopi qhepakamoj kanku, iskay killatataj wasisninkupi. Adoniramtaj chay ajllasqas runasta qhawanampaj churasqa karqa.

¹⁵ Salomompata tiyapullarqataj qanchis chunka waranqa cargasta apamojkuna, pusaj chunka waranqa runastaj orqopi rumista ch'eqojkuna.

¹⁶ Salomompa churasqan kurajkunas kallarqataj chay llank'ajkunata qhawanankupaj, kinsa waranqa kinsa pachajniyoj, pikunachus kamachej kanku tukuynin llank'aj runasta.

¹⁷ Reyqa jatuchej rumista ajllasqasta k'ajtinankuta kamacherqa, Diospa wasimpa qallariynimpi churanankupaj, k'acha ch'eqosqastataj.

¹⁸ Salomompa llank'ajkunasninwan Hirampa llank'ajkunasnimpiwan k'uturqanku wakicherqankutaj tukuy k'aspista, ch'eqorqankutaj rumista Diospa wasinta ruwanankupaj.