1 Reyes 4 - Qheshwa Biblia DC

Salomompa yanapajkunasnin

¹ Kamacherqataj Salomonqa tukuynin Israel jallp'api.

² Chanta kurajkunasnin kajkunataj karqanku: Sacerdote Sadocpa wawan Azarías;

³ Sisaj wawasnin Elihorefwan, Ahiaswan qelqeris karqanku; Ahiludpa wawan Josafat reypa kuraj kaj yanapajnin karqa.

⁴ Joiadaj wawan Benaía soldadospa kuraj kajnin karqa; Sadoctaj, Abiatarwan sacerdotes karqanku.

⁵ Natampa wawan Azarías kurajkunaspa qhawajninku karqa, sacerdote Natampa wawan Zabudtaj reypata kuraj kaj yuyaychajnin karqa.

⁶ Ahisartaj reypa palaciompi mayordomo karqa; Abdaj wawan Adoniramtaj mit'api llank'ajkunaj kamachejninku karqa.

⁷ Chunka iskayniyoj kamachejkunasnin karqa Salomompata tukuynin Israel jallp'api, chaykunataj tukuy ima mikhunasta reypaj familiampajwan churachimoj kanku. Sapa ujtaj sapa watapi uj killata churamoj kanku.

⁸ Kaykunataj paykunaj sutinninku karqa: Ben-Hurpa wawan Efraín orqospi;

⁹ Ben-Decarpa wawantaj Macazpi, Saalbimpi, Betsemespi, Elompi, Bet-hanampiwan;

¹⁰ Ben-Hesedpa wawantaj Harubotpi, payllataj karqa Socopi tukuynin Hefer jallp'aspiwan.

¹¹ Ben-Abinadadpa wawantaj tukuynin Dor jallp'aspi. Paypa warmintaj Salomompa wawan Tafat karqa.

¹² Ahiludpa wawan Baanataj Taanacpi, Meguidopiwan, tukuynin Bet-seampi, Saretán qayllapi, Jezreelmanta aswan urapi, Bet-seanmanta Abel-meola chaykama, Jocmeanmanta chay uj ladonkamataj.

¹³ Ben-Geberpa wawan Ramot Galaadpi, paypa kamachiynillampitaj karqa Galaadpi Manasespa wawan Jairpa llajtasnimpis, Basanmanta Argob cheqapis paypa kamachiynillampitaj karqa, chaypi karqanku sojta chunka jatuchej llajtas sumaj muyuykusqa perqasniyoj, punkusnimpis broncemanta chapasniyoj karqa.

¹⁴ Idoj wawan Ahinadabtaj Mahanaimpi karqa.

¹⁵ Neftalipitaj karqa Ahimaas, paytaj warmichakusqa Salomompa wawan Basematwan;

¹⁶ Husaejpa wawan Baanataj, Aserpi Alotpiwan karqa.

¹⁷ Parúaj wawan Josafattaj, Isacarpi karqa.

¹⁸ Elaj wawan Simeitaj, Benjamimpi karqa.

¹⁹ Urej wawan Gebertaj, Galaad jallp'api karqa, Amorreospa reyninkoj Sehompa jallp'ampi, Basanmanta rey Ogpata jallp'ampiwan. Chanta kallarqataj uj kuraj kamachej tukuynin naciompaj.

Salomompa yachaynin qhapajyaynintaj

²⁰ Judamanta Israelmantawan ashkha runaspuni karqanku, mar qochaj cantompi t'iya jina, mikhuspa ujyaspa kusikuspataj.

²¹ Salomontaj chay tukuynin waj nacionesta kamacherqa, Eufrates mayumantapacha Filisteospa jallp'ankukama, mojonesnimpis Egipto chaykamataj karqa; paymantaj apamoj kanku tukuy allin imasta, rey Salomón kausanankama atiynin urapi karqanku.

²² Salomompa mikhunampaj sapa p'unchay churamoj kanku kinsa chunka cargasta ñut'u jak'uta, sojta chunka cargas jak'utawan.

²³ Chunka sumaj wira kaj torosta, iskay chunka toros pastoswan wirayachisqasta, pachaj ovejastawan, tarukasmanta mana yupaspalla, ciervosta, gacelasta, corzostawan, allin wira wallpastawan.

²⁴ Imaraykuchus Salomonqa chay tukuynin llajtasta kamacherqa, Eufratesmanta inti yaykuy ladopi, Tifsamanta Gaza chaynejkama, chay tukuy llajtaspa muyuynimpitaj allin tiyakuylla karqa.

²⁵ Judamanta Israelmantawan runasqa may allimpi tiyakorqanku Salomón kausanankama, sapa ujninku uvas sach'anku urapi, higos sach'anku urapipis, Danmantapacha Beerseba chaynejkama.

²⁶ Chay jawataj Salomompata tiyaporqa tawa waranqa kanchasninpi carretasnimpa caballosnimpaj, chunka iskayniyoj waranqa soldadostaj caballospi montasqas rinankupaj.

²⁷ Chay kamachejkunataj rey Salomompaj tukuy mikhunasta churamoj kanku, rey Salomompa wasinman rejkunapajwan, sapa kamachej sapa wata uj killatakama, manataj imatapis pisichejchu kanku.

²⁸ Apachimullajtaj kanku caballospaj cebadata, pajatawan, cargasta chajnana uywaspaj, rey maypicha kashaj chaykama apaj kanku, sapa ujninku mit'ankupi.

²⁹ Salomonmantaj Diosqa ashkha yachayta, yuyayta, sumaj sonqotawan qorqa, imaynachus mar qocha cantopi, t'iyu kashan jinatapuni.

³⁰ Salomompa yachaynenqa inti llojsimuy ladomanta yachayniyojkunamanta, Egipciospamantapis astawampuni karqa.

³¹ Tukuy yachaysapasmantapis aswan yachayniyoj karqa: Etán esraitamanta, Meholpa wawasninmantapis: Hemán, Calcol, Darda ima. Tukuynin muyuynin nacionespi yachaynenqa may rejsisqapuni karqa.

³² Rimarerqataj kinsa waranqa nisqasninta, waranqa phisqhayoj takiykunastawan.

³³ Jinallatataj parlarqa sach'asmantapis, Libanopi cedro sach'amanta qallarispa chay juch'uy qhoras perqaspi wiñanku chaykunamantawan. Parlallarqataj tukuy animalesmanta, p'isqosmanta, pampata qhatatakuspa purejkunamanta, challwasmantawan.

³⁴ Salomompa yachayninmanta uyarinankupaj tukuy llajtasmanta, tukuy nacionesmanta jamoj kanku, maykamachus Salomompa yachaynin uyarikoj chaymantapacha.