1 Reyes 3 - Qheshwa Biblia DC

Salomonqa Faraompa wawanwan casarakun

¹ Salomonqa Egiptomanta rey Faraomwan aylluchakorqa, imaraykuchus Faraonpa warmi wawanwan casarakorqa, pusamorqataj Davidpa llajtanman, wasinta ruwayta tukuchinankama, Señorpa wasinta, Jerusalempa tukuynin perqasnintawan muyuykuchinankamantaj.

² Chaykamataj runasqa chay lomas patapi altaresllapiraj uywa ñak'asqasta jaywaj kanku, imaraykuchus manaraj karqachu Señorpa sutimpi uj wasi ruwasqa chay p'unchaykunaskamaqa.

Salomonqa sumaj yachayta Diosmanta mañakun

³ Salomonqa Señorta munakoj, tatan Davidpa kamachisqasninman jina purispa, chaywampis payqa lomas pata altarespi uywa ñak'asqasta jaywaj, inciensota ima q'osñichej.

⁴ Salomontaj Gabaón lomaman rerqa, imaraykuchus chaypi jatun kaj altar kasharqa, chaypitaj uywasta ñak'aspa jaywaj. Salomonqa waranqa uywasta ñak'aspa chay altar patapi q'olachej.

⁵ Uj ch'isitaj Señorqa Gabaompi, Salomonman mosqoypi rikhurerqa; Diostaj payta nerqa: Mañakuway imatachus munasqaykita, noqataj qosqayki.

⁶ Chanta Salomonqa nerqa: Qanqa khuyarqanki jatun khuyakuyniykiwan tatay David kamachiykita, imaraykuchus payqa purerqa qampa ñaupaqeykipi cheqanta, cheqa kaypi, cheqan sonqowantaj, qantaj mayta khuyakorqanki, uj wawatapis qorqanki tronompi tiyakunampaj, imaynachus kunan p'unchay kashan jina.

⁷ Kunantaj, Señor Diosníy, qanllataj churawanki kay kamachiykita rey jina kamachinaypaj tatay Davidpa cuentampi, noqataj waynallaraj kani, manataj yachanirajchu imaynatachus kamachinayta.

⁸ Noqa kamachiykitaj kay ajllasqa llajtaykej chaupimpi kashani, kay chhika llajtaqa mana yupay atina, nitaj mashkhachus kasqankupis yachana jinachu, ashkha kasqankurayku.

⁹ Kay kamachiykimanqa allin sonqota qoway llajtaykita allinta kamachinaypaj jina, sajra kajta allin kajtapis reparanaypaj, mana jina kajtenqa, pitaj kay chhikan llajtaykita kamachiyta atenqari?

¹⁰ Salomompa mañakusqanqa Señorman may allimpuni rijch'arqa.

¹¹ Señortaj nerqa: Qanqa mana mañakuwankichu unayta kausayta, nitaj qhapaj kaytachu, nitaj enemigosniykej contrantachu, manachayrí allin yuyayllata mañakuwanki, kay llajtayta sumajta kamachinaykipaj.

¹² Chayrayku imatachus mañakusqaykita ruwaniña, qoykiña jatun yachayniyoj sonqota, yuyayniyoj kaytapis, imaraykuchus mana ujpis karqachu qan jinaqa, nitaj qanmanta qhepamampis kanqañachu qan jinaqa.

¹³ Chaywampis mana mañasqaykitapis qollaykitaj, qhapajyayta atiytawan, qan jawataj mana uj reypis qan jinaqa kanqañachu tukuy kausayniykipi.

¹⁴ Sitajchus ñankunasniypi purinki, leyesniyta, kamachisqasniytapis waqaychaspa, imaynatachus tatayki David purerqa ajinata chayqa, ashkha watasta kausachisqayki.

¹⁵ Maypachachus Salomón puñuyninmanta rijch'arerqa chaypacha repararqa mosqoylla kasqanta. Jerusalenman jamuspataj, chaypi Señorpa trato ruwasqa cajonninman chimparqa, chaypitaj uywasta ñak'aspa q'olacherqa, jaywarqataj allinyakuy nisqa uywa ñak'asqastapis. Jinaspataj tukuynin kamachisninman uj sumaj mikhuyta qorqa.

Salomón sumaj yachaysapa

¹⁶ Chay p'unchaykunapitaj iskay mana allin puriyniyoj warmis reyman jamorqanku, paypa ñaupaqenmantaj chimparqanku.

¹⁷ Chaymanta ujnin kaj warmeqa nerqa: Uyariway, wiraqochíy, noqawan kay warmiwan uj wasillapi tiyakuyku, chanta noqaqa wawayta nacechikorqani, pay noqawan wasipi kashajtin.

¹⁸ Onqokusqaymanta kinsa p'unchayninman kay warmipis onqokullarqataj. Iskaynillayku kasharqayku, manataj pipis chay wasipeqa karqachu, manachayqa noqayku iskaynillayku.

¹⁹ Uj ch'isita kay warmej wawan wañuporqa imaraykuchus pay kikin wawan pataman puñuykusqa.

²⁰ Chanta chaupi tutata jatarispa, noqa kamachiyki puñunaykama, noqaj wawayta puñunanman apakapusqa, chay wañusqa wawantataj puñunayman churaykamusqa.

²¹ Tutamanta rijch'arejtiytaj wawayman ñuñuta qonaypaj wañusqallataña rikorqani. Chanta allinta sut'iyamojtintaj qhawaykorqani, manataj chay nacechikorqani chay wawachu karqa.

²² Chay ujnin kaj warmitaj nerqa: Mana, noqaj waway chay kausajqa, qampatataj chay wañusqaqa. Ñaupaj kaj warmitaj kuticherqa: Mana, qampata wañusqa wawaqa, noqajtataj chay kausaj wawaqa. Ajinata churanakorqanku reypa ñaupaqempi.

²³ Chayrayku reyqa nerqa: Kay warmeqa nin: Noqajta kausaj wawaqa qampatataj wañusqa wawaqa; chay ujnimpis kikillantataj nin: Mana, qampata wañusqa wawaqa, noqajtataj kausaj wawaqa.

²⁴ Chanta reyqa nerqa: Apamuychej uj espadata. Reymantaj apamorqanku uj espadata.

²⁵ Jinaspataj reyqa nerqa: Chay kausaj wawata iskayman khuchuychej, sapa ujninmantaj khuskantakama qopuychej.

²⁶ Chanta, chay kausaj wawaj mamanqa maytapuni llakikorqa wawanrayku, reymantaj nerqa: Wiraqochi reyníy! Ama wañuchiychejchu chay kausasqaj wawata, kay warmiman qopuychej. Chay uj warmitaj nerqa: Wañuchiychej, ni paypaj ni noqapaj kachunchu, iskayman khuchurpariychej.

²⁷ Chaymanta reyqa kutichispa nerqa: Jaqay warmiman chay kausaj wawata qopuychej, imaraykuchus paypuni mamanqa.

²⁸ Israelmanta tukuynin runastaj astawan manchachikorqanku, rey chay jina k'achatapuni justiciata ruwasqanta uyarispa, imaraykuchus paykuna rikorqanku Diospa yachaynin paypi kasqanta justiciata ruwanampaj.