1 Reyes 22 - Qheshwa Biblia DC

Acabpa urmananta Micaías sut'inchan

¹ Israelwan sirioswantaj kinsa watata mana maqanakorqankuchu.

² Jinataj kinsa watanman, Judamanta rey Josafatqa Israelpa reyninta watukoj uraykorqa.

³ Israelmanta reytaj kamachisninta nerqa: Manachu yachankichej Galaadmanta Ramotqa noqanchejpata kasqanta, noqanchejtajrí mana imatapis ruwashanchejchu siriospa makinmanta qhechukapunanchejpaj?

⁴ Josafattataj taporqa: Munankichu noqawan jamuyta Galaadmanta Ramotpa contrampi maqanakoj? Josafattaj Israelpa reyninman kuticherqa: Noqaqa qan jinallataj kani, soldadosniypis soldadosniyki jina, caballosniypis caballosniyki jinallataj.

⁵ Chay jawataj Josafatqa, Israelpa reyninman nerqaraj: Mañarikuyki Señorpa palabranta tapurinaykita.

⁶ Chanta Israelpa kamachejnin tukuynin profetasta tantaykorqa, tawa pachajta jina, chaykunamantaj nerqa: Galaadmanta Ramotpa contrampi risajchu maqanakoj manachu? Paykunataj nerqanku: Rillay, imaraykuchus Señorqa reypa makinman jaywanqa.

⁷ Josafattaj nerqa: Kaypi Señorpa waj profetan kanrajchu paynejta tapurichinapaj?

⁸ Josafatmantaj Israelpa reynenqa kuticherqa: Arí, uj kanraj, paynejta Señorta tapurinapaj, Imlaj wawan Micaías sutiyoj; payta noqaqa chejnini manapuni jayk'ajpis cheqanta sut'inchawasqanrayku, manachayqa sajrallatapuni. Josafattaj nerqa: Ama jinata parlaychu.

⁹ Chantaqa Israelmanta reyqa ujnin kamachinta wajyaspa, nerqa: Imlaj wawan Micaiasta usqhayllata pusamuway.

¹⁰ Israelmanta reywan Judamanta rey Josafatwan sapa ujninku sillonninkupi tiyasharqanku rey p'achasninkuwan, Samaria llajtaman yaykuna plazapi; tukuynin profetastaj sut'inchasharqanku paykunaj ñaupaqenkupi.

¹¹ Quenaanaj wawan Sedequiastaj fierromanta wajrasta ruwakusqa, nerqataj: Señorqa ajinata nin: Kaykunawan siriostaqa wajranki tukuchinaykikama.

¹² Tukuynin profetastaj ajinallatapuni sut'inchasharqanku, nispa: Galaadmanta Ramotman riy, allintaj risonqa, imaraykuchus Señorqa reypa makinman jaywanqa.

¹³ Pitachus kacharqanku Micaiasta wajyamunampaj chayqa, payman kay jinata nerqa: Chay tukuynin profetas uj similla reyman sut'inchanku allin imasllatapuni, qampis paykuna jinallataj allinta sut'inchay sumaj imasta.

¹⁴ Micaiastaj nerqa: Señorpa sutimpi jurani, imatachá Señorqa niwanqa, chayta noqaqa nisaj.

¹⁵ Paytaj reypaman jamorqa, reytaj payta nerqa: Micaías, Galaadmanta Ramot llajtaj contrampi maqanakoj risqaykuchu, amarajchu? Paytaj kutichispa nerqa: Wichariy, allintaj risonqa, Señorqa reypa makinman jaywaykonqa.

¹⁶ Reytaj payta nerqa: Mayk'a kutitataj nisqayki Señorpa sutimpi cheqa kajllata ninawaykitari?

¹⁷ Chantá Micaiastaj nerqa: Noqaqa israelitasta rikorqani orqospi ch'eqerasqasta, mana michejniyoj ovejasta jina; Señortaj nerqa: Kaykunajtaqa mana dueñonku kanchu, sapa ujninku wasinkuman sonqo tiyasqalla ripuchunku.

¹⁸ Israelmanta reytaj Josafatta nerqa: Manachu noqaqa nerqaykipuni, ni ima allintapis noqapajqa pay sut'inchananta, mana chayqa sajrallatapuni?

¹⁹ Micaiasqa nillarqataj: Señorpa palabranta uyariy ari: Noqaqa Señorta rikorqani tronompi tiyasqata, janaj pachamanta tukuynin angelestataj paywan khuska kashajta, paña makinnejpi lloq'e makinnejpipis.

²⁰ Señortaj nerqa: Pitaj Acabta ch'aukiyaspa pusanman Galaadmanta Ramotpa contrampi maqanakoj rispa urmanampaj? Ujnin uj jinamanta nerqa, ujtaj uj jinamantañataj nerqa.

²¹ Uj espiritutaj Señorpa ñaupaqempi sayaykuspa nerqa: Noqa pusarisaj. Señortaj nerqa: Imaynapitaj pusawajri?

²² Chay espiritutaj nerqa: Noqaqa rispa reypa tukuynin profetasnimpa siminkupi llullata sut'inchasaj. Señortaj nerqa: Qanqa atinki pusayta, rispa ajinata ruwamuy.

²³ Kunantaj Señorqa llulla espirituta tukuynin profetasniykej siminman churan, Señortaj ninña qampaj mana allin kananta.

²⁴ Chantaqa Quenaanaj wawan Sedequiasqa chimpaykuspa, Micaiasta; uj lado uyampi lak'arqa, nispa: Maynejtataj Señorpa espíritun llojserqa qanman parlasunampajri?

²⁵ Micaiastaj kuticherqa: Kayta yachanki jaqay p'unchaypi, mayk'ajchus wasimanta wasi pakakuspa ayqaykachanki chaypacha.

²⁶ Chanta Israelmanta reytaj nerqa: Micaiasta jap'ispa presota apaychej llajtata kamachej Amompaman, reypa wawan Joaspamanwan.

²⁷ Ninkitaj, reyqa ajinata nin: Kaytaqa carcelman churaykuychej, chaypitaj pisi t'antawan pisi yakuwantaj kachiychej, allimpi noqa kutimunaykama.

²⁸ Micaiastaj nerqa: Sichus allimpi kutimunki chayqa, Señor manamin noqaj simiynejtachu parlarqa. Chay ratotaj nerqa: Uyariychej tukuy llajtas.

²⁹ Israelmanta reyqa, Judamanta rey Josafatwan khuska rerqanku Galaadpi Ramot llajtaj contrampi maqanakoj.

³⁰ Israelmanta reyqa Josafatta nerqa: Noqaqa waj p'achata churakuspa maqanakuman yaykusaj; qantaj kikin p'achallaykiwan yaykuy. Israelpa reynintaj waj p'achata churaykukuspa maqanakuman yaykorqa.

³¹ Siriamanta reytaj chay carretaspa kinsa chunka iskayniyoj kurajkunasninta kamachisqa: Ama jatunwampis juch'uywampis maqanakunkichejchu, mana chayqa Israelmanta reypa contrallampipuni.

³² Carretaspa kamachejkunanqa Josafatta rikhuspa, nerqanku: Israelmanta reyqa kaypunichá kanqa nispa, paypa contrampi maqanakoj chimpaykorqanku; chanta rey Josafatqa qhaparikorqa.

³³ Chay carretasta kamachejkunaqa Israelpa mana reyninchu kasqanta rikuspa, waj ladoman riporqanku.

³⁴ Ujnin soldadotaj wayrallaman flechanta kacharerqa, chaytaj Israelpa reyninta jap'irparerqa maqanakuna p'achasnimpa tinkuynin cheqapi. Reytaj carretanta aysajta nerqa: Kutirichiway, orqhowaytaj kaymanta imaraykuchus sinch'i nanasqa kashani.

³⁵ Maqanakutaj chay p'unchaypi may sinch'ipuni karqa, reytaj carretallampipuni siriospa ñaupaqempi karqa. Ch'isiyaykuynejtataj wañuporqa; yawarnintaj chay carreta ukhuta corresharqa.

^36-37 Inti yaykuytataj uj parlay uyarikorqa soldados ukhupi kay jinata: Sapa uj llajtaykichejman, sapa uj wasiykichejman, reyqa wañupunña nispa. Samariaman apaspataj chaypi p'amparqanku.

³⁸ Carretatataj Samaria qhochapi mayllarqanku; maypichus millay purej warmis mayllakoj kanku chaypi, yawarnintataj alqos llajwarqanku imaynatachus Señorpa nisqanman jina.

³⁹ Acabpa waj ruwasqasnin tukuy ima ruwasqasnin, marfilmanta wasita ruwasqan, tukuy llajtasta ruwachisqampiwan, manachu qelqasqa kashan Israelmanta reyespa ruwasqasninku libropi?

⁴⁰ Acab wañupojtintaj, paypa cuentampi wawan Ocozías kamacherqa.

Judapi Josafatpa kamachisqan

⁴¹ Rey Acab Israelpi tawa watataña kamachishajtin, Asaj wawan Josafat Judapi kamachiyta qallarerqa.

⁴² Josafattaj kamachiyta qallarishaspa kinsa chunka phishqayoj watayoj karqa, Jerusalempitaj iskay chunka phishqayoj watata kamacherqa. Mamanqa Silhej wawan Azuba karqa.

⁴³ Paytaj tatan Asaj tukuy ñankunasnimpi purerqa, mana pantaspa; Señorpa ñaupaqempi cheqanta ruwaspa. Chay tukuywampis lomas patapi yupaychana wasisqa mana qhechusqaschu karqanku; maypichus runasqa uywa ñak'asqasta jaywaj kanku, inciensotawan q'oshnichej kanku.

⁴⁴ Israelmanta reywan Josafatqa uj tratota ruwarqa allinta kausanankupaj.

⁴⁵ Josafatpa tukuy ima waj ruwasqasnin, may mentasqa kasqan, chay chhika ch'ajwasta ruwasqasnin imaqa, manachu qelqasqa kashan Judamanta reyespa ruwasqasninku libropi?

⁴⁶ Jinallatataj Judá jallp'amanta qharqorqa chay warmi jina qenchachakojkuna qharista, tatan Asaj tiemponmantapacha qhepakusqanku chaykunata.

⁴⁷ Chaypacha Edompi mana rey karqachu, uj kuraj kamachejlla karqa.

⁴⁸ Josafattaj jatuchaj buquesta ruwarqa Ofirman rispa qorita apamunampaj; chanta mana rerqankuchu, imaraykuchus Ezión-geberpi phirikusqankurayku.

⁴⁹ Chanta Acabpa wawan Ocoziasqa, Josafatman nerqa: Munankichu qampa kamachisniyki noqaj kamachisniywan buquespi rinankuta, Josafattaj mana munarqachu.

⁵⁰ Josafat wañupojtintaj, ñaupa tatan Davidpa llajtampi p'amparqanku; paypa cuentampitaj wawan Joram kamacherqa.

Ocoziasqa Israelpi kamachin

⁵¹ Judamanta rey Josafat chunka qanchisniyoj watataña kamachishajtin, Acabpa wawan Ocozías Israelta kamachiyta qallarerqa Samaria llajtapi. Iskay watata Israelpa kamacherqa.

⁵² Ocoziasqa Señorpa ñaupaqempi sajratapuni ruwarqa, purispa tatampa ñankunasnimpi, mamampa ñankunasnimpi, Nabatpa wawan Jeroboampa ñankunasnimpiwan, israelitasta juchallichispa.

⁵³ Baalkunata sirverqa, yupaycharqataj; chantaqa ajinamanta Israelpa Señor Diosninta phiñachispa, imaynatachus tatampis ruwarqa ajinata.