1 Reyes 21 - Qheshwa Biblia DC

Nabotpa huertan

¹ Kay tukuy imasmanta qhepatataj, Jezreelmanta Nabotpata Samariaj reynin Acabpa wasin qayllapi uvas huertan tiyaporqa.

² Acabtaj Nabotman nerqa: Uvas huertaykita q'omerkunata tarpukunaypaj qoway, wasiy cantopi kasqanrayku. Noqataj wajnejpi kay huertaykimanta aswan sumaj huertata qopusqayki; munajtiykeqa huertaj valorninta qolqeta pagapusqayki.

³ Nabottaj Acabman kutichispa, nerqa: Señor librawachun, tatasniypa qowasqan chayaqe huertata qanman qopusunaymantaqa.

⁴ Acabtaj wasinman llakisqa phiñasqataj jamporqa, Jezreelmanta Nabot chay jinata payman nisqanmanta: Tatasniypa qowasqan huertaytaqa mana qanman qoykimanchu nispa. Puñunanman siriykukuspataj uyanta perqa ladoman churaspa, mana mikhorqachu.

⁵ Jezabel warmintaj payman jamorqa, nerqataj: Imaraykutaj chay jina llakisqa kashanki, nitaj mikhunkichuri?

⁶ Acabtaj kuticherqa: Jezreelmanta Nabotwan parlarqani, nerqanitaj huertanta qopunawanta qolqepipis, chayri munajtenqa wajnejpi uj sumaj huertata qonayta; payta kutichiwarqa: Mana atiymanchu huertayta qopusuytaqa, nispa.

⁷ Warmin Jezabeltaj nerqa: Manachu qanqa kamachej kanki? Jatarikuy, kusikuspa mikhuy; noqataj Jezreelmanta Nabotpa huertanta qosqayki.

⁸ Chantataj Jezabelqa Acabpa sutimpi cartasta qelqarqa, Acabpa anillonwan sellaykuspataj, tukuynin kurajkunasman kamachejkunasninmanwan Nabotpa llajtanman apaykucherqa.

^9-10 Chay qelqasqapitaj kay jinata nerqa: Ayunoman wajyaychej Nabotta tukuy runaspa ñaupaqenman churaspa, iskay sajra runasta mask'aychej paypa contrampi llullakuspa sut'inchanankupaj, nispa: Qanqa Diospa contrampi sajrata parlanki reypa contrampi ima. Chanta jawaman orqhospataj, rumiwan ch'anqaspataj wañuchiychej.

¹¹ Nabotpa llajtampi kurajkuna kamachejkunapiwan ima, imaynatachus Jezabelpa kamachisqanman jina ruwarqanku, chay cartaspi qelqaspa apacherqa chayta junt'aspa.

¹² Ayunoman wajyaspa Nabotta runaspa ñaupaqenman churarqanku.

¹³ Chantataj iskay sajra runas jamorqanku, Nabotpa ñaupaqempitaj tiyaykukuspa chay runasqa, tukuynin runaspa ñaupaqempi llullakuspa jurayta qallarerqanku Nabotpa contrampi, nispa: Payqa Diospa contranta parlan, reypa contrantawan. Llajtamanta jawaman pusaspataj chaypi rumiwan ch'anqaspa wañucherqanku.

¹⁴ Chantataj Jezabelman willajta kacharqanku: Nabottaqa ch'anqaspa wañuchiykuña, nispa.

¹⁵ Jezabelqa Nabotpa wañusqanta uyarispa, Acabman nerqa: Jatariy, Jezreelmanta Nabotpa huertanta jap'ikampuy, mana qolqepipis vendesuyta munarqachu chayta; Nabotqa manaña kausashanchu, ñapis wañusqaña.

¹⁶ Acabtaj Nabot wañusqanta uyarispa, jatarikuytawan Jezreelmanta Nabotpa huertanta jap'ikapoj rerqa.

^17-18 Chantaqa Elías Tisbitaman Señorpa palabran jamorqa, nispa: Jatarikuy, Samariapi Israelmanta rey Acabwan tinkumuy, payqa Nabotpa huertampi kashan jap'ikapunampaj.

¹⁹ Payman parlanki kay jinata: Señorqa ajinata nin: Nabotta wañuchispa paypa kajta qhechusqaykirayku, maynejpichus Nabotpa yawarninta alqos llajwarqanku, chayllapitaj yawarniykitapis alqos llajwanqanku.

²⁰ Eliasmantaj Acabqa nerqa: Qan, enemigoychu tariwanki? Eliastaj kuticherqa: Arí noqa tariyki, imaraykuchus qan kikillaykitaj sajrata ruwaspa enqhaykukunki Señorpa ñaupaqempi.

²¹ Sajrata kunanqa pataykiman noqa apamusaj, qhepaman mirayniykita tukuyninta chinkachisaj; Acabpa wasimpi qharis kajkunata kamachista mana kamachistapis tukuynin Israelpi tukuchisaj.

²² Wasiykitapis Nabatpa wawan Jeroboampa wasinta jina ruwasaj, Ahiaspa wawan Baasaj wasintawan jina, sajrata ruwasqaykiwan phiñachiwasqaykirayku, chaykunawantaj Israelta juchallichisqaykirayku.

²³ Jezabelmantapis Señorqa parlallantaj: Jezabelta Jezreel perqa k'uchupi alqos mikhonqanku.

²⁴ Acabpa wasinmanta pikunachus llajtapi wañojkunataqa alqos mikhonqanku, pikunachus campopi wañojkunatarí aycha mikhoj p'isqos mikhuranqanku.

²⁵ Cheqamantapuni mana ujpis karqachu Acab jinaqa sajrallatapuni ruwaspa Señorpa ñaupaqempi enqhaykukojqa; imaraykuchus Jezabel warmin paytaqa ruwachicherqa.

²⁶ Payqa millaytapuni ruwarqa, lantista yupaychaspa amorreos ruwaj kanku ajinata, chaykunataqa Israelitaspa ñaupaqenkumanta Señor qharkorqa.

²⁷ Chay palabrasta uyarikuspa Acabqa p'achasninta llik'ikorqa, ukhunmantaj qhashqa p'achasta churakorqa, manataj mikhorqachu, ajina qhashqa p'achayojtaj puñorqa, phutisqataj purerqa.

^28-29 Chaypacha tisbita Eliasman Señorpa palabran jamorqa, nerqataj: Manachu rikunki Acabqa ñaupaqeypi k'umuykachasqanta? Ñaupaqeypi k'umuykachasqanrayku mana chay sajrataqa p'unchaykunasnimpichu apachimusaj, manachayqa wawampi p'unchaykunasnimpi chay sajrataqa tukuy mirayninman apachimusaj.