1 Reyes 20 - Qheshwa Biblia DC

Acabqa siriosta atipan

¹ Siriamanta rey Ben-adadqa tukuy soldadosninta tantaykorqa, paywan kinsa chunka iskayniyoj reyes rerqanku ashkha caballoswan, carretaswan ima; kaykunawan rispataj Samariata muyuykuspa, maqanakorqataj.

^2-3 Israelmanta rey Acabmantaj kachasta kacharqa, nichispa: Ben-adadqa ajinata nin: Qolqeykiwan, qoriykiwan noqajta, k'acha kaj wawasniyki, warmisniykipis noqajta.

⁴ Israelmanta reytaj kutichispa, nerqa: Imaynatachus nisqaykiman jina wiraqochi reyníy, noqa, tukuy ima kapuwajniypis qampata.

⁵ Watejmanta chay kachasqa kutimullarqankutaj kay jinata nispa: Ben-adadqa kayta nisunki: Noqa kachamorqayki nisunankupaj: Qan, qolqeykita, qoriykita, warmisniykita, wasasniykitawan noqaman qopunawaykita.

⁶ Chay jawaqa, q'aya kay horasta kamachisniyta qanman kachamusqayki, qampatataj tukuy ima wasiykipi kajta, kamachisniykej wasimpi kajkunatawan; tukuyninkuta qhawaykonqanku, apakaponqankutaj tukuy imachus k'acha kajkunata.

⁷ Chanta Israelmanta reyqa, nacionmanta tukuynin kurajkunasta wajyacherqa, nerqataj: Tanteaychej qankuna, reparaychejtaj imaynatachus kayqa noqanchejpa sajrallanchejtapuni mask'an; payqa noqaj warmisniyta, wawasniyta, qolqeyta, qoriytawan mañachimuwan, noqatajrí mana, mana nispaqa ninichu.

⁸ Chanta, tukuynin kurajkuna, tukuynin runaspiwan payman nerqanku: Ama kasuta ruwaychu, nitaj imatachus mañasusqantapis qoychu.

⁹ Acabtaj, Ben-adadpa kachamusqasninman kutichispa nerqa: Wiraqochi reyniyman kay jinata niychej: Ñaupaj kajta niwasqaykita kay kamachiykeqa ruwanqa; kunan kay nichimuwasqaykitaqa mana ruwayta atiymanchu. Kachasqa kajkunataj kutiytawan ajinata willamorqanku.

¹⁰ Ben-adadtaj watejmanta kachamullarqataj, Onejta: Dioskunasniy sinch'ita jasut'iwachunku, chay tukuy noqata qhatimuwajkunaj makisninkuman kay Samaria llajtaj jallp'anqa mana kanqachu uj jich'ikamallapis.

¹¹ Israelmanta reytaj kutichispa, nerqa: Amaraj atipani nispa takichunrajchu manaraj maqanakushaspaqa.

¹² Ben-adadqa wajkuna reyeswan toldospi ujyaspa kasharqa, kay palabrasta uyariytawantaj, kamachisninta nerqa: Wakichikuychej. Paykunataj chay llajtaj contrampi maqanakunankupaj wakichikorqanku.

¹³ Chaypachataj Israelmanta rey Acabman uj profeta jamorqa, nerqataj: Señorqa ajinata nin: Rikhunkichu chay chhika runasta? Kunantaj makiykiman noqa jaywaykusqayki, yachanaykipaj noqa Señor kasqayta.

¹⁴ Acabtaj kuticherqa: Mayqempa makinnejta? Paytaj nerqa: Señorqa ajinata nin: Provinciasmanta kurajkunaspa kamachisnimpa makisninnejta. Acabtaj nerqa: Pitaj maqanakuyta qallarenqari? Profetataj payman nerqa: Qan qallarinki.

¹⁵ Chanta Acabqa chay provinciaspa kurajkunasninkoj kamachisninta qhawarqa, chaykunaqa iskay pachaj kinsa chunka iskayniyoj karqanku. Chay jawaqa qhawallarqataj israelmanta tukuynin runasta, chaykunataj qanchis waranqa karqanku.

¹⁶ Paykunataj llojserqanku khuskan p'unchaypi, Ben-adadtaj ujyaspa machasharqa chay toldospi, chay kinsa chunka iskayniyoj reyes payta yanapaj jamorqanku chaykunawan.

¹⁷ Provinciasmanta kurajkunaspa kamachisnintaj ñaupajta llojsimorqanku. Ban-adadmantaj Samariamanta runas llojsimusqankuta willarqanku.

¹⁸ Payqa chanta nerqa: Sichus paykuna allimpaj llojsimunku chayqa, kausashajta jap'iraychej, sitajchus maqanakoj llojsimunku chaypis kausashajta jap'iraychej.

¹⁹ Provinciasmanta kurajkunaj kamachisnintaj llajtamanta llojsimorqanku, paykunaj qhepantataj soldados jamorqanku.

²⁰ Sapa ujtaj wañucherqa paypa contrampi jamojta; sirios ayqerejtinkutaj Israelmanta kajkunaqa qhatiykorqanku. Siriamanta rey Ben-adadtaj caballompi lloq'aykuspa, caballospi purejkuna wakin soldadosninwan ayqekorqa.

²¹ Israelmanta reytaj llojsispa caballosta, carretastawan qhechorqa, ajinamanta siriosta sumajtapuni atipaykorqa.

²² Chaypachataj Israelpa reyninman uj profeta jamorqa, nispa: Riy, sumajta wakichikamuy, umallikuytaj imatachus ruwanaykita; imaraykuchus uj wata pasasqanmanta Siriamanta reyqa, ujtawan qampa contraykipi jamonqa.

²³ Siriamanta reypa kamachisnenqa nerqanku: Paykunaj dioskunasninkoqa orqosmanta dioskuna kanku, chayrayku paykunaqa atipawanchej; sichus paykunawan llano pampapi maqanakusunman chayqa, cheqamantapuni atipasunman.

²⁴ Ajinata ruway ari: Reykunata orqhoy, cuentankupitaj soldadospa kurajkunasninta churay.

²⁵ Qantaj waj soldadosta tantay, chay maqanakupi chinkacherqanki ajinata, caballomanta caballollatataj, carretamanta carretallatataj sayachiy. Chanta paykunawan uj pampapi maqanakusunchej, qhawanki cheqamanta atipasumpuni paykunata. Ben-adadtaj chayta uyarispa kikinta ruwarqa.

²⁶ Uj wata pasasqanmantataj, Ben-adadqa siriospa soldadosninta waturerqa, chanta Afecman Israelpa contrampi maqanakoj jamorqa.

²⁷ Israelitaspis soldadosninkuta waturillarqankutaj, chanta wakichikusqankuta oqharikuspataj rerqanku sirioswan maqanakoj. Israelitasqa paykunaj ñaupaqenkupi jarakorqanku iskay cabra tropas jinalla, siriostaj tukuynin pampata junt'aykorqanku.

²⁸ Chaypacha Diospa profetan Israelpa reyninman jamorqa, nerqataj: Señorqa ajinata nin: Imaraykuchus siriosqa ninku: Señorninkoqa orqosmanta Dios, manataj pampasmanta Dioschu, chayrayku kunanqa makisniykiman jaywaykullasqaykitaj, chay chhika manchay ashkha runasta. Yachankichejtaj, noqa Señor kasqayta.

²⁹ Qanchis p'unchayta israelitaswan sirioswan chimpan chimpampi jarasqas kasharqanku, chanta qanchis kaj p'unchaypi maqanaku karqa; israelitastaj siriostaqa uj p'unchaylla wañuracherqanku pachaj waranqa runasta chakipi rejkuna soldadosta.

³⁰ Wakintaj Afec llajtaman ayqekorqanku; chay llajtaj perqasnintaj chay iskay chunka qanchisniyoj waranqa ayqekojkuna runaspa patanman urmaykamorqa. Ben-adadpis chay llajtaman ayqekamorqa, wasimanta wasi pakakuspataj purerqa.

³¹ Chanta kamachisnenqa Ben-adadman nerqanku: Noqaykoqa uyariyku Israelmanta reyesqa, khuyakoj reykuna kasqankuta; ukhunchejman qhashqa p'achasta churakunachej, wasqhastawan kunkasninchejman, chanta rinachej Israelpa reyninman, ichapis ajinamanta kausajta saqewasun.

³² Qhashqa p'achasta churakorqanku, wasqhastataj kunkasninkuman, chanta Israelpa reyninman jamorqanku, nerqankutaj: Kamachiyki Ben-adadqa nin: Mañakuyki ama wañuchinawaykita. Acabtaj kuticherqa: Pay kausashanraj chayqa, wauqey jina, nispa.

³³ Chay runastaj chayta uyarispa yuyarqanku allin kananta, chayrayku chay palabrasta uyariytawan usqhayllata nerqanku: Wauqeyki Benadadqa kausashan. Acabtaj nerqa: Riychej pusarimuychej. Chanta Ben-adadqa Acabman chimparqa, paytaj carretanman wicharicherqa.

³⁴ Ben-adadtaj payman nerqa: Tataykimanta chay llajtasta tatay qhechusqasninta noqa kutichipusqayki, Damascopi qhatu wasista qampaj ruwakuy imaynatachus tataypis Samariapi ruwakorqa jinata. Acabtaj nerqa: Noqataj kunan saqesqayki kay tratowan ripojta. Ajinata paywan tratota ruwarqa, ripojtataj saqerqa.

³⁵ Señorpa palabrannejta profetasmanta ujnin kaj profeta masinman nerqa: Maqaway. Chay ujtaj mana maqayta munarqachu.

³⁶ Chay profetataj nerqa: Kunanqa Señorpa palabranta mana kasusqaykimanta, uj león wañuchisonqa. Paymanta karunchakusqantawan uj león chimpaytawan wañucherqa.

³⁷ Chanta profetaqa uj runawanñataj tinkorqa, paytataj nerqa: Maqaway. Chay runataj sumajta maqarparerqa.

³⁸ Chanta profetaqa llikha trapowan ñawisninta wataykuspa ñampi reyta suyamoj rerqa.

³⁹ Rey ñanta pasashajtintaj, profetaqa jatunmanta qhaparispa, nerqa: Kay kamachiykeqa maqanaku chaupimanta llojsimuspa jamushajtiy, uj soldado chimpamuwaspa, uj runata pusamuwarqa, nispa: Kay runata qhaway, sichus ayqekunman chayqa, qan kausayniykiwan paganki, mana chayrí kinsa waranqa qolqesta paganki.

⁴⁰ Kay kamachiyki waj imasta ruwanankamataj chay runaqa chinkapusqa. Chanta Israelmanta reyqa nerqa: Chaymanta juchachasqa kanki, qanllataj rimarinki.

⁴¹ Paytaj chay rato ñawisninmanta traponta qhechukojtin, Israelmanta reyqa rejsirparqa profetasmanta ujnin kaj kasqanta.

⁴² Chanta profetaqa reyman nerqa: Señorqa ajinata nin: Makiykimantaña chay wañunan karqa chay runata ayqechisqaykirayku, kunanqa qan kausayniykiwan paganki, kausayninmanta, llajtaykiwantaj paypa llajtanmanta.

⁴³ Israelmanta reytaj Samariapi wasinman may llakisqa phiñasqataj riporqa.