1 Reyes 18 - Qheshwa Biblia DC

Eliasqa kutimun Acabwan tinkukoj

¹ Unay p'unchaykunamanta, Señorpa palabran Eliasman jamorqa, kinsa kaj watapi, nerqataj: Acabman rikuchikamuy, ñapis parachimusajña jallp'a pataman.

² Eliastaj rispa Acabwan tinkumoj rerqa. Yarqhaytaj anchapuniña Samariapeqa karqa.

³ Acabtaj Abdías mayordomonta wajyarqa. Abdiasqa maytapuni Señorta tukuy sonqonwan yupaychaj.

⁴ Señorpa profetasninta Jezabel wañuchishajtin, Abiasqa pachaj profetasta chhanka jusk'usman pakaykamorqa, phishqa chunkamanta phishqa chunka. Chaypitaj paykunaman qoj mikhuyta yakutawan.

⁵ Acabtaj Abdiasta nerqa: Jaku rinachej Israel jallp'ata purimusunchej tukuynin wayq'osta yaku juturistawan, ichapis tarisunman q'omer pastosta chaykunawan caballosninchejta kausachinapaj mulastawan, amataj mana uywasniyoj qhepakunanchejpaj.

⁶ Israel jallp'ata purimunankupajtaj paykunaqa t'aqanakorqanku; Acabqa waj ñanta rerqa, Abdiastaj waj ñantataj.

⁷ Abdiastaj ñanta rishaspa, Eliaswan tinkukorqa; payta rejsispataj pampaman k'umuykurorqa, nerqataj: Manachu qanqa wiraqochiy Elías kanki?

⁸ Eliastaj kuticherqa: Noqa kani, kunanqa rispa willamuy reyniykiman, kaypi Elías kashan, nispa.

⁹ Abdiastaj kuticherqa: Imapitaj noqa juchallikusqani kay kamachiykita Acabpa makinman jaywanawaykipaj, wañuchinawampajtaj?

¹⁰ Señor Diosniykej sutimpi jurayki, tukuy nacionesta reinosta ima mask'achisunki wiraqocheyqa, tukuypis chanta ninku: Mana kaypichu. Chay jawataj tukuy nacionesta reinostawan juracherqa manapuni rikhususqankuta.

¹¹ Kunantaj qanqa ninki: Rispa, willamuy wiraqochiykiman, Elías kaypi kashan, nispa?

¹² Noqa ripojtiytaj, Señorpa Espíritun wajnejman mana yachasqayman apasonqa. Noqa rispa Acabman willamojtiy, qanta mana taripasuspataj payqa wañuchiwanqa ari. Kay kamachiykeqa Señorta manchachikun juch'uyninmantapacha.

¹³ Manachu pipis, wiraqochíy, qanman willasorqa noqa ruwasqayta, maypachachus Jezabel Señorpa profetasninta wañuchishajtin; noqa pachaj profetasta chhanka jusk'uspi pakaykorqani, phishqa chunkamanta phishqa chunka, chaypitaj mikhuyta yakutawan qorqani, chayta?

¹⁴ Kunantaj qanqa niwashanki willamuy wiraqochiykiman: Kaypi Elías kashan nispa; pay noqata wañuchinawampaj.

¹⁵ Eliastaj kuticherqa: Tukuy Atiyniyoj Señorpa sutimpi, mayqempa ñaupaqempichus kashani chaypa sutimpi jurayki, kunampacha Acabwan tinkumusaj.

¹⁶ Chaymantataj Abdiasqa rerqa Acabwan tinkumoj, ajinatataj willarqa; chanta Acabqa Eliaswan tinkukoj jamorqa.

¹⁷ Acabqa Eliasta rikhuspa, nerqa: Qanchu kanki Israelta musphachejqa?, nispa.

¹⁸ Paytaj kuticherqa: Mana noqachu Israeltaqa musphachini, aswampis qanwan tataykej ayllunwan ima musphachishankichej Señorpa kamachisqasninta saqerpayaspa, baalestataj yupaychaspa.

¹⁹ Kamachiy ari kunanqa, tukuynin israelitas Carmelo orqoman tantakamunankuta, Baalpa tawa pachaj phishqa chunkayoj profetasninta, Aseraj tawa pachaj profetasnintawan ima, pikunachus Jezabelpa mesanmanta mikhunku chaykunata.

Eliaswan Baalpa profetasninwan

²⁰ Chantaqa Acabqa tukuynin israelitasta wajyacherqa, Carmelo orqopitaj chay profetastawan tantaykorqa.

²¹ Eliastaj tukuynin runasman chimpaykuytawan nerqa: Mayk'ajkamataj iskay yuyayniyojllapuni qankuna kankichejri? Señorpuni Dios kajtenqa qhatiychej, chayri Baal dios kajtenqa qhepanta riychej. Runastaj mana imatapis kuticherqankuchu.

²² Eliasqa watejmanta runasta nillarqataj: Señorpa profetasninmanta noqalla qhepakuni, Baalpa profetasninrí tawa pachaj phishqa chunkayoj kanku.

²³ Kayman iskay torosta aysamuwayku, ujnintataj paykuna ajllakuchunku, ñak'aspataj juch'uy juch'uyta kuchuraspa llant'a pataman churachunku, uranmantaj ama ninata jap'ichichunkuchu, chanta noqañataj chay ujnin torota ñak'amushaspa llant'a pataman churallasajtaj, uranmantaj mana ninata jap'ichispalla.

²⁴ Chaymantataj dioskunasniykichejpa sutisninkumanta qhapariychej, noqataj Señorpa sutinta qhaparisaj, mayqen dioschari ninata apachimonqa, chaymin Diosqa kanqa. Tukuy runastaj kuticherqanku, kosapacha, nispa.

²⁵ Chanta Eliasqa, Baalpa profetasninta nerqa: Qankuna ujnin torota ajllakuspa ñaupajta wakichiychej, qankuna ashkhas kasqaykichejrayku, diosniykichejpa sutinmanta qhapariychej, amataj ninata uranman jap'ichinkichejchu.

²⁶ Paykunataj ujnin torota jap'iytawan wakicherqanku, sut'iyaymantapacha khuskan p'unchaykama Baalpa sutinta qhaparerqanku, kay jinata: Baal uyariwayku, nispa. Manataj ima parlayllapis, nitaj kutichejpis karqachu; chaykamataj paykunaqa, altar ruwarqanku chay qayllampi phinkirispa purisharqanku.

²⁷ Chanta khuskan p'unchayta Eliasqa paykunamanta asikorqa: Astawan jatunmanta qhapariychej, imaraykuchus payqa dioscharí. Ichapis umachakushan, chayri imatachus ruwashan, ñampichus kashan. Ichapis puñushan, rijch'arichiychej ari!

²⁸ Paykunataj jatunmanta qhaparerqanku, imaynachus paykuna ukhupi ruwana kasqanman jina, cuchilloswan, jatuchej cuchillospiwan t'ojsirakuspa, yawarpurulla kanankukama.

²⁹ Khuskan p'unchaypis pasarqaña, paykunatajri phinkiykachaspa aswan jatunmanta qhaparishallarqankupuni, jaywana rato chayamunankama, manataj ima parlayllapis uyarikorqachu, nitaj pipis kutichej nitaj uyarejpis karqachu.

³⁰ Chanta Eliasqa tukuynin runasta nerqa: Chimpamuychej noqaman. Tukuy runastaj payman chimpaykorqanku; paytaj Señorpa altarnin urmasqa kasharqa chayta jallch'aykorqa.

^31-32 Eliastaj chunka iskayniyoj rumista oqharerqa Jacobpa wawasnin mashkha aylluchus karqanku chayman jina, Jacobta Señorqa nerqa Israel sutiyki kanqa nispa, chay rumiswantaj uj altarta ruwarqa Señorpa sutimpi; chay jawataj uj lark'ata ruwarqa altarpa muyuynimpi, chaymantaj kinsa chunka litros yaku jina yaykoj.

³³ Chanta llant'ata altar pataman tauqaykorqa, torota ñak'aspataj juch'uy juch'uyta kuchuraspa chay llant'a pataman churaykorqa.

³⁴ Nerqataj: Tawa p'uñu yakuwan jich'akipaychej q'olachinaman, llant'a patamampis. Nillarqataj: Ujtawan jinata ruwallaychejtaj, chanta ujtawan jinata ruwallarqankutaj. Nillarqapuni: Kinsa kutita jinata ruwaychej; kinsa kutitataj ruwarqanku.

³⁵ Ajinamanta yakoqa altar muyuyninta purerqa, chay lark'ata ruwarqa chaymampis junt'aykorqa.

³⁶ Chanta q'olachispa jaywana rato chayamojtin, profeta Eliasqa chimpaykuspa nerqa: Abrahampata, Isaacpata, Israelpatawan Señor Diosnin, kunan yachachunku qan Israelpa Señor Diosnin kasqaykita, noqataj kamachiyki kasqayta, qampa kamachisqaykiwantaj kay tukuy imasta ruwasqayta.

³⁷ Uyariway Señor, uyariway ari, yachanankupaj kay runas, qanlla Señor Dios kasqaykita, qantaj paykunaj sonqonkuta qanman kutirichisqaykita.

³⁸ Chantaqa Señormanta nina uraykamuspa q'olaykorqa chay ñak'asqa torota, llant'ata rumista, jallp'ata, lark'api yakutapis ch'akirpayacherqa.

³⁹ Tukuy runastaj chayta rikuspa, qonqorikuspataj pampakama k'umuykorqanku; nerqankutaj: Señorlla Diosqa, Señorlla Diosqa!, nispa.

⁴⁰ Chanta Eliasqa nerqa: Baalpa profetasninta jap'iychej, amataj ujpis ayqechunkuchu. Paykunataj jap'erqanku; Eliastaj Cisón wayq'oman pusaspa chaypi qholurarqa.

Elías mañakun paramunampaj

⁴¹ Chanta Eliasqa Acabman nerqa: Riy, mikhumuy ujyamuytaj: imaraykuchus paraqa uyarikamushanña.

⁴² Chanta Acabqa mikhoj ujyajtaj riporqa, Eliastaj Carmelo orqoman wicharerqa, pampaman k'umuykuspataj, uyanta moqosnin pataman chayacherqa.

⁴³ Kamachinmantaj nerqa: Llojsispa mar qochanejta qhawarimuy. Paytaj wicharispa qhawarerqa, nerqataj: Mana imapis kanchu. Eliastaj ujtawan nillarqataj: Qanchis kutita qhawarimuy.

⁴⁴ Qanchis kaj kutipi kamachenqa nerqa: Uj juch'uy phuyuta noqa rikuni runaj maki t'ajllinta jina, mar qochamanta llojsimojta. Eliastaj nerqa: Riy, Acabman willamuy: Carretaykiman wicharispa ripuy, ñampi para ama jark'asunampaj, nispa.

⁴⁵ Ajina kashajtintaj, ujllata phuyus laqhayaykamorqa wayrawan ima, sinch'itataj paraqa jich'akorqa. Acabtaj carretanman wichariytawan Jezreelman jamorqa.

⁴⁶ Señorpa makintaj Eliaswan karqa; payqa p'achasninta sumajta chumpiykukuytawan, Jezreelman chayanankama Acabpa ñaupaqenta correrqa.