1 Reyes 17 - Qheshwa Biblia DC

Elías sut'inchan mana para kananta

¹ Chanta Galaadpi, Tisbemanta profeta Eliasqa Acabman nerqa: Israelpa Señor Diosnimpa sutimpi, pejpa ñaupaqempichus noqa kashani niyki: Kay wataspi mana paramonqachu nitaj chhullamonqachu noqa ujtawan ninaykama.

^2-3 Señorpa palabrantaj Eliasman jamorqa, nispa: Karunchakuy kaymanta, inti llojsimuy ladoman riy, Querit wayq'omantaj pakaykakamuy, Jordanmanta chay chimpaman.

⁴ Chay wayq'omanta yakuta ujyanki, noqataj kamachini qharqañasta jaqhaypi mikhuchisunankupaj.

⁵ Eliastaj Señorpa palabranman jina, rispa Querit wayq'o qhayllapi tiyakamorqa, Jordán chimpanejpi.

⁶ Qharqañastaj tutamanta chanta tardempis t'antata aychatawan apamporqanku; chay wayq'omantataj yakuta ujyaj.

⁷ Pisi p'unchaykunamantataj chay wayq'opi yakoqa ch'akiporqa, chay nacionman mana paramusqanrayku.

Eliasqa Sareptapi warmi sapaj wasimpi

^8-9 Señorpa palabranqa ujtawan Eliasman jamullarqataj, nispa: Sidompi Sarepta llajtaman jatarikuspa ripuy, chaypitaj tiyakamuy; noqa kamachiniña uj warmi sapata pay mikhuchisunampaj.

¹⁰ Chanta paytaj jatarikuytawan riporqa Sareptaman. Llajta punkuman chayashaspataj, chaypi uj warmi sapata llant'ata pallakushajta rikorqa; Eliasqa payta wajyaspa nerqa: Mañakuyki ujyanaypaj yakuta uj vasopi apampunawaykita.

¹¹ Warmi apamunampaj rishajtinña, watejmanta wajyallarqataj: Mañakullaykitaj makiykipi uj chheqan t'antatawan apampunawaykita, nispa.

¹² Paytaj kutichispa nerqa: Señor Diosniykipis yachan, mana chayasqa t'antay kanchu; uj chhika jak'ullay tiyapuwan uj wich'ipi, uj yurupi uj chhika aceitepiwan; kunantaj uj iskay llant'ata pallakusharqani, yaykuspataj noqapaj wawaypajwan ruwarqonaypaj, chayta mikhuykuspataj yarqhaywanchá wañupusqayku.

¹³ Eliastaj, nerqa: Ama chaymantaqa llakikuychu; rillay, nisqaykita jina ruwamullay, chaywampis ñaupajta uj t'antata ruwarqospa nina k'ajajpi chayachispa apamuway; chantá ruwallanki wawaykipaj qampajpis.

¹⁴ Imaraykuchus Israelpa Señor Diosnenqa kay jinata nin: Wich'ipi jak'oqa, yurupi aceitepis mana tukukonqachu Señor kay jallp'a pataman parachimunankama.

¹⁵ Chanta paytaj rispa ruwamorqa imaynatachus Elías nisqanman jina; unayta mikhorqanku Eliaswan chay warmiwan, wawampiwan.

¹⁶ Wich'ipi jak'utaj mana tukukoj karqa, aceitepis chay yurupi mana pisiyarqachu, imaynatachus Señorqa parlarqa Elías profetanejta chayman jina.

¹⁷ Chaymanta aswan unaymantaqa viudaj wawan anchatapuni onoykorqa. Manaña samariytapis aterqachu.

¹⁸ Paytaj Eliasman nerqa: Diospa runan, ima ruwanay tiyan noqa qanwanri? Juchasniymanta yuyarichiwajchu kayman jamunki, wawaytapis wañuchej?

¹⁹ Eliastaj nerqa: Kayman chay wawaykita apamuway. Chanta payqa ichurisqa kasharqa, chaymanta oqhariytawan patapi puñuna wasinman ichuspa caman pataman churaykorqa.

²⁰ Señorman qhaparispataj, nerqa: Señor Diosníy, kay warmi sapaj wasimpi tiyashajtiy llakichinkirajchu, wawanta wañuchispa?

²¹ Chay wawaj patanmantaj kinsa kutita winkuykorqa, Señorta qhaparispataj nerqa: Señor Diosníy, mañakuyki kay wawata kausarichinaykita.

²² Señortaj Eliaspa mañakusqanta uyarispa chay wawata kausaricherqa.

²³ Chanta Eliastaj chay wawata uraykuchimorqa mamampa chayman, jaywaporqataj: Qhaway, wawaykeqa kausashan, nispa.

²⁴ Chantataj chay warmeqa Eliasta nerqa: Kunanqa yachani cheqamantapuni Diospa runan kasqaykita, Señorpa palabrantaj cheqapuni qampa simiykipeqa kasqanta.