1 Reyes 16 - Qheshwa Biblia DC

^1-2 Hananej wawan Jehúman Señorpa palabran jamorqa, Baasaj contrampi, nerqataj: Imaraykuchus noqa qanta jallp'amanta oqharerqayki Israel llajtaypi kamachej kanaykipaj, qantaj Jeroboampa ñankunasnimpi purikapunki, Israel llajtaytataj juchallicherqanki, chay juchasniykiwan phiñachiwaspa.

³ Chayrayku kunanqa Baasa, qanta mirayniykitawan llimphuta tukuchisaj, wasiykitataj Nabatpa wawan Jeroboampata kikintapuni ruwasaj.

⁴ Baasaj ayllunmanta llajtapi wañojkunataqa alqos mikhuykonqanku, paykunamanta campopi wañojkunatataj suwintus mikhonqanku.

⁵ Baasaj waj ruwasqasnin, tukuy ima ruwasqasnin, atiyniyoj kasqan imaqa, manachu qelqasqa kashan Israelmanta reyespa ruwasqasninku libropi?

⁶ Baasa wañupojtintaj Tirsapi p'amparqanku, paypa cuentampitaj wawan Ela kamacherqa.

⁷ Señorpa palabranqa Hananej wawan profeta Jehunejta jamorqa Baasaj contrampi, ayllumpa contrampiwan, chay jina sajrata Señorpa ñaupaqempi ruwasqanrayku, makisnimpa ruwasqasninwan phiñachispa Jeroboampa wasin jinallataj tukuchisqa kanampaj, mayqentachus pay tukucherqa ajinata.

Elawan, Zimriwan Israelpi kamachinku

⁸ Rey Asa Judapi iskay chunka sojtayoj watataña kamachishajtin, Baasaj wawan Elaqa Israelpi kamachiyta qallarerqa; iskay watata Tirsapi kamacherqa.

^9-10 Paypa contrampitaj khuskan carretasninmanta kamachejnin Zimri oqharikorqa. Tirsapi mayordomon Arsaj wasimpi Ela ujyaspa machasqa kashajtin, Zimri jamuspa wañucherqa, Judamanta rey Asa iskay chunka qanchisniyoj watataña kamachishajtin, Zimritaj Elaj cuentampi kamacherqa.

¹¹ Paytaj kamachina tronompi tiyaykukuytawanqa, Baasaj tukuynin mirayninta wañucherqa, manataj ni uj qharillapis, wauqe masillampis, ni kausaqempis qhepakorqachu.

^12-13 Ajinata Zimreqa, Baasaj tukuy ayllunta tukucherqa, imaynatachus Señorqa sut'incharqa Baasaj ayllumpa contrampi profetan Jehunejta chayman jina, Baasaj tukuy juchasninrayku wawan Elaj juchasninraykupiwan, mayqenkunawanchus Israelta juchallicherqanku, Israelpa Señor Diosninta chay qhasi mana kaj lantista ruwasqasninkuwan phiñachispa.

¹⁴ Elaj waj ruwasqasnin, tukuy ima ruwasqasnimpiwan, manachu qelqasqa kashan Israelmanta reyespa tukuy ruwasqasninku libropi?

¹⁵ Judamanta rey Asa iskay chunka qanchisniyoj watataña kamachishajtin, Zimreqa Tirsapi kamachiyta qallarerqa, chaypitaj qanchis p'unchayta kamacherqa. Israelmanta soldadostaj, Filisteospa llajtanku Gibetompa contrampi muyuykusqas kasharqanku.

¹⁶ Soldadostaj jarasqas kasharqanku chaypi uyarerqanku, Zimri oqharikuspa reyta wañuchisqanta. Chanta tukuynin Israelmanta runastaj chay kikimpacha Omrita churarqanku Israelpi kamachinampaj, payqa maqanakoj soldadospa kurajninku karqa.

¹⁷ Gibetonmanta Omreqa tukuynin israelitaswan llojsimuspa Tirstat muyuykorqanku maqanakunankupaj.

¹⁸ Zimritaj llajtata jap'isqata rikhuspa, reypa palacionman yaykuspa pakaykakamorqa, wasiman ninata jap'iykuchispa chay kikimpi wañorqa.

¹⁹ Chayqa karqa jucha ruwasqanrayku, Señorpa ñaupaqempi sajrata ruwasqanmanta, Jeroboampa ñankunasnimpi ima juchawanchus Israelta juchallichej chaykunapi purispa.

²⁰ Zimrej waj ruwasqasnin, oqharikusqasnin ima, manachu qelqasqa kashan Israelmanta reyespa ruwasqasninku libropi?

Omreqa Israelpi kamachin

²¹ Chanta israelitasqa iskayman t'aqakorqanku; Ginatpa wawan Tibnita khuskan runas reyta churanankupaj qhaterqanku, khuskantaj Omrita qhaterqanku.

²² Omrita qhatejkunaqa atiparqanku Ginatpa wawan Tibnita qhatejkunata; Tibni wañorqa, Omritaj kamachej karqa.

²³ Judamanta rey Asa kinsa chunka ujniyoj watataña kamachishajtin, Omreqa Israelpi kamachiyta qallarerqa, kamacherqataj chunka iskayniyoj watata, sojta watataqa Tirsapi kamacherqa.

²⁴ Omritaj Semermanta Samaria orqota sojta chunka sojtayoj kilos qolqewan ranterqa, chaypitaj uj llajtata ruwacherqa Samaria sutiyojta, chay orqoj ñaupa dueñon Semer sutiyoj kasqanrayku.

²⁵ Omritaj Señorpa ñaupaqempi sajratapuni ruwarqa, paymanta aswan ñaupajta kamacherqanku chaykunamanta nisqaqa astawanraj.

²⁶ Nabatpa wawan Jeroboampa ñankunasnimpi purerqa, mayqenkunawanchus Israelta juchallicherqa chaykunapi, Israelpa Señor Diosninta lantisninkuwan phiñachispa.

²⁷ Omrej waj ruwasqasnin, tukuy ruwasqasnin, wapu kaspa atiyninmantawan, manachu qelqasqa kashan Israelmanta reyespa ruwasqasninku chay libropi?

²⁸ Omri wañojtintaj Samariapi p'amparqanku, paypa cuentampitaj wawan Acab kamacherqa.

Acabqa Israelpi kamachin

²⁹ Judapi rey Asa kinsa chunka pusajniyoj watataña kamachishajtin, Omrej wawan Acab Israelpi kamachiyta qallarerqa, payqa Israelta Samariapi iskay chunka iskayniyoj watata kamacherqa.

³⁰ Omrej wawan Acabqa ancha sajratapuni Señorpa ñaupaqempi ruwarqa, paymanta aswan ñaupajta kamacherqanku chaykunamanta nisqaqa astawanraj.

³¹ Imaraykuchus Nabatpa wawan Jeroboampa ñankunasnimpi usqhayllata purerqa, casarakorqataj sidoniospa reyninku Et-baalpa wawan Jezabelwan, chaymantaqa Baalta yupaychamorqa sirverqataj.

³² Baalpaj uj altarta yupaychana wasitawan Samaria llajtapi ruwaporqa.

³³ Acabqa Asera nisqa uj lantita ruwallarqataj, paymanta aswan ñaupajta kamacherqanku chaykunamanta nisqaqa astawampuni payqa ruwarqa, ajinamanta Israelpa Señor Diosninta phiñachispa.

³⁴ Acabpa p'unchaykunasnimpitaj, Betelmanta Hielqa Jericota watejmanta jataricherqa, chay llajtata jatarichiyta qallarishajtin kuraj kaj wawan Abiram wañorqa; llajtaj punkusninta churashajtintaj, sullk'a kaj wawan Segub wañorqa, imaynatachus Señorpa palabran, Numpa wawan Josuenejta nisqa karqa chay junt'akunampaj.