1 Reyes 15 - Qheshwa Biblia DC

Abiam Judapi kamachin

¹ Nabatpa wawan Jeroboam, chunka pusajniyoj watataña Israelpi kamachishajtin, Abiamqa Judapi kamachiyta qallarerqa.

² Kamacherqataj Jerusalempi kinsa watata, mamantaj Absalompa Maaca karqa.

³ Ñaupajta tatan juchasta ruwarqa chaykunallapitaj purerqa, manataj paypa sonqon cheqanchu Señor Diosninwan karqa, imaynachus tatan Davidpata karqa jinaqa.

⁴ Señorqa kamachin Davidta munakusqanrayku, Jerusalén llajtapi uj k'anchay kanallampajpuni uj wawata qorqa, Jerusalentataj allinta waqaycharqa.

⁵ Imaraykuchus Davidqa Señorpa ñaupaqempi cheqanta ruwarqa, manataj mayqen kamachisqanmantapis karunchakorqachu tukuy kausaynimpi; mana chayqa hitita Uriaspa contrampi juchachakorqa chaylla.

^6-7 Tukuy kausayninkupitaj Roboamwan Jeroboamwanqa ch'ajwallapi kaj kanku. Abiampa waj ruwasqasnin tukuy ima ruwasqasnimpiwan, manachu qelqasqa kashan Judamanta reyespa ruwasqasninku libropi?

⁸ Abiam wañupojtintaj, Davidpa llajtampi p'amparqanku, cuentampitaj wawan Asa kamacherqa.

Asa Judapi kamachin

⁹ Jeroboam iskay chunka watataña Israelpi kamachishajtin, Judapi Asa kamachiyta qallarerqa.

¹⁰ Jerusalempitaj tawa chunka ujniyoj watata kamacherqa. Jatun mamantaj Absalompa wawan Maaca karqa.

¹¹ Señorpa ñaupaqempitaj Asaqa cheqanta ruwarqa, ñaupa tatan David jina.

¹² Imaraykuchus payqa nacionninmanta qharkorqa tukuy warmi jina qhenchachakojkuna qharista, wijch'ullarqataj chay tukuy lantista ñaupa tatasnimpa ruwasqasninta.

¹³ Ajinallatataj jatun maman Maacatapis manaña reina nisqa kananta saqerqachu, uj k'ullumanta Asera lantita ruwasqanrayku, chay lantitataj Asaqa p'akerqa, Cedrón mayupitaj ruphaykucherqa.

¹⁴ Chaywampis loma pataspi altaresqa mana qhechukorqachu. Chay tukuywampis Asaj sonqonqa tukuy kausaynimpi Señorpaj cheqan karqa.

¹⁵ Tatan jinataj paypis imastachus Señorman jaywarqanku chay tukuyta Señorpa wasinman churaykaporqa: Qorita qolqeta, tukuy laya k'acha kaj imastawan.

Asaqa Ben-adadwan ujchakun

¹⁶ Asawan Israelpa reynin Baazawanqa tukuy kausayninkupi chajwallapipuni karqanku.

¹⁷ Israelmanta rey Baasataj llojsimorqa Judáj contrampi, Ramá llajtatataj astawan jark'achaykorqa Judamanta reyman ama pipis yaykunampaj nitaj llojsimunampajpis.

^18-19 Chanta Asaqa jap'ispa tukuy qolqeta qoritawan Señorpa wasimpi kajta, reypa wasimpi kajkunatawan tantaykuspa kamachisninnejta, Siriamanta Tabrimompa wawan, Heziompa allchhin Ben-adad reyman apacherqa, payqa Damascopi tiyakorqa, nicherqataj: Qanwan noqawan ujchakunachej, imaynatachus qampa tatayki noqaj tataywan karqanku ajinata, kayqa apachimuyki uj t'inkata qolqeta qoritawan; kunanqa Israelmanta rey Baasawan ruwasqayki tratota p'akimuy noqamanta karunchakunampaj.

²⁰ Ben-adadqa rey Asaj nisqanta uyarerqa, Israelpa contrampitaj kacharqa soldadosnimpa kurajkunasninta, jap'erqankutaj kay llajtasta: Ijonta, Danta, Abel-bet-maacatawan, tukuynin Cineretta, tukuynin Neftalí jallp'atawan.

²¹ Baasataj chayta yachaspa, Ramapi manaña ruwacherqachu, Tirsamantaj kutiporqa.

²² Chanta rey Asaqa Judamanta tukuynin runasta wajyacherqa mana ujniyojta, Ramaman rispataj phaskaspa apakamporqanku rumista k'aspitawan, mayqenkunawanchus Baasaqa jark'anata ruwachisharqa chay tukuyta, chaykunawantaj Asaqa ruwacherqa Benjamimpi Geba llajtata, Mizpatawan.

Asaj wañupusqan

²³ Asaj waj tukuy ima ruwasqasnin, tukuy atiynin, imatachus ruwasqan, llajtasta ruwachisqan imaqa, manachu qelqasqa kashan Judamanta reyespa ruwasqasninku libropi? Machuyaynimpitaj chakisninmanta onqoykorqa.

²⁴ Asa wañupojtintaj, tatan Davidpa llajtampi p'amparqanku; paypa cuentampitaj wawan Josafat kamacherqa.

Nadabqa Israelpa kamachin

²⁵ Judapi rey Asa iskay watataña kamachishajtin; Jeroboampa wawan Nadabqa Israelpi kamachiyta qallarerqa, Israelpitaj kamacherqa iskay watata.

²⁶ Señorpa ñaupaqempi sajratapuni ruwarqa, tatampa ñankunasnimpi purispa, ima juchawanchus Israeltapis juchallichej chaykunapi.

²⁷ Isacar ayllumanta Ahiaspa wawan Baasaqa Nadabpa contrampi oqharikorqa, Baasaqa Gibetompi payta wañucherqa, chayqa filisteospa llajtan karqa, imaraykuchus Nadabqa tukuynin Israelwan Gibetonta muyuykusqanku.

²⁸ Judamanta rey Asa kinsa watataña kamachishajtin, Baasaqa Nadabta wañucherqa, chantaqa paypa cuentampi kamacherqa.

²⁹ Kamachiyta qallariytawantaj Jeroboampa wasinmanta kajkunata tukuyninta wañuracherqa, imaynatachus Señorqa parlarqa kamachin Ahías silonitanejta, mana ujniyojtapuni tukuchinanta Jeroboampa wasinmanta kajkunata.

³⁰ Kayqa jina karqa, Jeroboam juchata ruwasqanrayku, chaykunawan israelitasta juchallichispa; ajinamanta Israelpa Señor Diosninta phiñachinankama.

³¹ Nadabpa waj ruwasqasnin, tukuy ima ruwasqasnimpiwan, manachu qelqasqa kashan Israelmanta reyespa ruwasqasninku libropi?

³² Asawan, Israelmanta rey Baasawanqa tukuy kausayninkupi ch'ajwallapipuni karqanku.

Baasaqa Israelpi kamachin

³³ Judamanta rey Asa kinsa watataña kamachishajtin, Ahiaspa wawan Baasaqa Tirsa llajtapi tukuynin Israelta kamachiyta qallarerqa, iskay chunka tawayoj watatataj kamacherqa.

³⁴ Señorpa ñaupaqempi sajratapuni ruwarqa, Jeroboampa ñannimpitaj purerqa, ima juchawanchus Israelta juchallichej chaykunapi.