1 Reyes 14 - Qheshwa Biblia DC

Ahiasqa sut'inchan Jeroboam urmananta

¹ Chay p'unchaykunapitaj Jeroboampa wawan Abías onqoykorqa.

² Jeroboamtaj warminta, nerqa: Jatarispa Silo llajtaman riy, waj jina p'achasta churaykukuspa ama rejsisunankupaj noqaj warmiy kasqaykita, jaqaypi profeta Ahías tiyakun, pay noqata niwarqa kay llajtaj reynin kanayta.

³ Makiykipitaj chunka t'antasta, tortillastawan, uj yuritupi misk'itawan apapuy, paywantaj tinkumuy willasunampaj imaynachus kay wawa kananmanta.

⁴ Jeroboampa warmenqa kikinta ruwarqa; sayarikuytawan Siloman, Ahiaspa wasinman rerqa. Ahiastaj manaña qhawayta aterqachu, machu runaña kasqanrayku ñawisnenqa chharpuña karqa.

⁵ Señorqa ñapis Ahiasman nisqaña: Kunanqa Jeroboampa warmin jamusonqa wawan onqosqa kasqanmanta tapukusoj, waj jinamanta p'achallisqa jamusonqa, qantaj jinata ninki.

⁶ Ahiastaj warmej thaskisqanta uyarispa, punkuta yaykumushajtinña, nerqa: Jeroboampa warmin, yaykumuy. Imaraykutaj waj jinaman tukuspa jamunkiri? Kunan noqa qanman kachamusqa kani manchay phiñakuy willayman.

⁷ Rispa willamuy Jeroboamman; Israelpa Señor Diosnenqa ajinata nin: Qanta noqaqa runas chaupimanta oqharerqayki, churarqaykitaj Israel llajtayta kamachinaykipaj.

⁸ Davidpa ayllunmanta reinota qhechuspa qanman qorqayki. Qanqa mana kamachiy David jinachu kanki, payqa tukuy kamachisqayta waqaychaspa, tukuy sonqowan noqaj qhepaypi purerqa noqaj ñaupaqeypi cheqan kajta ruwaspa.

⁹ Qanrí sajra kajllatapuni ruwarqanki qanmanta ñaupaj kajkunamantapis astawanraj, qantaj metal unuyachispa waj dioskunata lantistawan ruwakorqanki phiñachinawaykipaj, noqataj wasanchawarqanki.

¹⁰ Chayrayku kunanqa Jeroboampa wasinman sajrata apamusaj, Jeroboampa ayllunmanta tukuynin qharista chinkachisaj tukuynin Israelpi, imaynatachus wanuta pichanku ajinatapuni pichasaj tukukunankukama.

¹¹ Jeroboammanta kajkuna llajtapi wañojkunataqa alqos mikhonqanku, campopi wañojkunatataj suwintus mikhonqanku, imaraykuchus ajinata nin Señor.

¹² Qanrí, ripuy wasiykiman, llajta punkuta yaykushajtiykitaj wawayki wañuponqa.

¹³ Tukuynin Israelmanta waqaspa p'ampanqanku, imaraykuchus Jeroboampa kajkunamantaqa paylla p'ampasqa kanqa, payllapi allin ima tarikusqanrayku Señor Diosnimpa ñaupaqempi Jeroboampa wasimpeqa.

^14-15 Israelpitaj Señorqa waj reyta churanqa, paytaj Jeroboampa mirayninta chinkachenqa, kunan p'unchaymanta ñaupajman. Imaynatachus soqosta purej yaku thalarin ajinata Señorqa Israeltaqa thalarparenqa, payllataj Israelta wijch'onqa, kay chhika sumaj jallp'ata tatasninkuman qorqa chaymanta, Eufratesmantapis aswan jaqaymanraj wijch'onqa, Señorta phiñachisqankurayku k'ullusmanta Astarté lantista ruwakuspa.

¹⁶ Señorqa Israelta saqerparenqa Jeroboampa juchasninrayku, Israelta juchallichisqanrayku ima.

¹⁷ Chanta Jeroboampa warmenqa jatarikuspa riporqa Tirsa llajtaman, wasinman yaykushajtintaj wawanqa wañuporqa.

¹⁸ Tukuynin israelitastaj waqaspa p'amparqanku, imaynatachus Señorpa palabran nisqanman jina, mayqentachus Ahías profetannejta parlarqa.

¹⁹ Jeroboampa waj tukuy ima ruwasqasnin, maqanakusqasnin, kamachisqan imaqa, Israelmanta reyespa ruwasqasninku chay libropi qelqasqa kashan.

²⁰ Jeroboamqa iskay chunka iskayniyoj watata kamacherqa, wañupojtintaj cuentampi wawan Nadab kamacherqa.

Roboam Judapi kamachin

²¹ Salomompa wawan Roboamtaj Judapi kamacherqa. Kamachiyta qhallarishajtintaj Roboamqa tawa chunka ujniyoj watayoj karqa, Jerusalempitaj chunka qanchisniyoj watata kamacherqa, Señor tukuynin ayllusmanta ajllakusqan llajtapi, chaypi sutinta churanampaj. Roboampa mamampa sutenqa Naama; amonita karqa.

²² Señorpa ñaupaqempi Judaqa sajra kajta ruwarqa, Señorta phiñachispa tatasninkumanta astawan sajrataraj ruwaspa.

²³ Paykunaqa ruwallarqankutaj lomas patapi altaresta tukuynej alto orqospi, jatuchaj thansa sach'a uraspipis.

²⁴ Chay jallp'api warmi jina qhenchachakoj qharis kallarqataj, chaykunata Señorqa israelitaspa ñaupaqenmanta wijch'orqa, paykunarí chay llajtaspa millay ruwasqankuta ruwallarqankutaj.

²⁵ Egiptomanta rey Sisactaj Jerusalempa contrampi llojsimorqa, Roboam phishqa watata kamachisqanmantaña.

²⁶ Tukuy ima valorniyoj waqaychasqa karqa Señorpa wasimpi, reypa wasimpiwan ima; chay tukuyta jap'ispa apakaporqa, qori puromanta Salomón escudosta ruwarqa chaytapis apakapullarqankutaj.

²⁷ Rey Roboamtaj chay qorimanta karqanku chay escudospa cuentampi broncemanta ruwacherqa, palaciota qhawajkuna soldadosmantaj jaywarqa paykuna jallch'anankupaj.

²⁸ Señorpa wasinman rey rejtin, soldadosqa chay escudosta apaj kanku, chaymantataj qhawajkuna soldadospa wasinkuman saqej kanku.

²⁹ Roboampa waj ruwasqasnin, tukuy ima ruwasqasnimpiwan, manachu qelqasqa kashan Judamanta reyespa ruwasqasninku chay librollapitaj?

³⁰ Tukuy kausayninkupitaj Roboamwan Jeroboamwanqa ch'ajwapi karqanku.

³¹ Roboam wañupojtintaj p'amparqanku tatan Davidpa llajtampi. Mamanqa Amonmanta Naama karqa. Roboampa cuentampitaj wawan Abiam kamacherqa.