1 Reyes 13 - Qheshwa Biblia DC

Judamanta uj profeta k'amin Jeroboamta

¹ Jeroboam chay altarpa ñaupaqempi inciensota ruphachinan kashajtin, uj profeta Señorpa kachamusqan Judamanta Betelman chayamorqa.

² Paytaj chay altarpa contrampi qhaparerqa, Señorpa kamachisqanman jina: Altar, altar, Señorqa ajinata nin: Davidpa ayllunmanta uj wawa Josías sutiyoj nacenqa, qampa pataykipi ñak'aspa jaywanqanku loma pata wasispi sacerdotesta, qampa pataykipi inciensota ruphachinku chaykunata, runa tullusta ima pataykipi ruphachenqa.

³ Chay kikin p'unchaypitaj profetaqa payman uj señalta qorqa, nerqataj: Señorpa parlasqanmanta kaymin chay señalqa kanqa; altarqa p'akikonqa, chay patampi ushpha kashan chaypis qhallerparikonqa.

⁴ Rey Jeroboamqa Diospa profetampa palabrasninta uyarispa Betelpi altarpa contrampi, altarmantapacha makinta oqharispa, nerqa: Jap'iychej! Chanta chay makinta contrampi oqharisqanqa kikimpi ch'akiykorqa, manañataj oqhariyta aterqachu.

⁵ Altarqa p'akikorqa, ushphapis qhallikorqa altarmanta, Diospa kamachisqan runaj nisqanman jina chay señalqa junt'akorqa.

⁶ Chanta kutichispa Diospa profetanman reyqa nerqa: Mañakuyki Señor Diosniykimanta mañapunawaykita thañinampaj noqaj makiy. Diospa runantaj Señormanta mañarqa, reypa makintaj thañiporqa imaynachus ñaupajta karqa jina.

⁷ Reytaj Diospa profetanman nerqa: Jaku noqaj wasiyman mikhumunaykipaj, uj t'inkatawantaj qosqayki.

⁸ Chanta Diospa profetanqa reyman nerqa: Wasiykej khuskanninta qowankiman chaypis manapuni qanwanqa riymanchu, nitaj t'antata mikhuymanchu nitaj yakutapis ujyaymanchu kay cheqapeqa.

⁹ Imaraykuchus Señorqa ajinata kamachiwarqa: Ama mikhunkichu t'antata, nitaj ujyankichu yakutapis, nitaj risqayki chay ñanllatataj kutimpunkichu, nispa.

¹⁰ Profetaqa waj ñannejta kutiporqa, manataj Betelman jamusqan ñannejtachu.

¹¹ Betelpitaj uj machu profeta tiyakorqa, wawantaj willarqa Diospa runan Betelpi tukuy ruwasqanta; willallarqataj imastachus reyman parlasqantapis.

¹² Tatankutaj nerqa: Mayqen ñannejtataj ripunri? Wawasnintaj rikhucherqanku, Judamanta jamoj Diospa profetanqa mayqen ñantachus ripusqanta.

¹³ Paytaj wawasninman nerqa: Burrota karunapuwaychej. Paykunataj karunaykorqanku burrota, paytaj montaykorqa.

¹⁴ Diospa profetampa qhepanta rispataj, uj encina nisqa sach'a urapi tiyashajta tariparqa, nerqataj: Qanchu kanki Judamanta Diospa profetan jamojqa? Paytaj nerqa: Noqa kani.

¹⁵ Chanta nerqa: Jaku noqawan wasiyman t'antata mikhumunki.

¹⁶ Judamanta profetataj nerqa: Mana atiymanchu qanwan kutiytaqa, nitaj t'antata mikhuymanchu, ni yakutapis ujyaymanchu kay cheqapeqa.

¹⁷ Señorqa palabrannejta niwarqa: Jaqaypeqa mana t'antata mikhunkichu nitaj yakutapis ujyankichu, nitaj kutimunkichu risqayki ñanllatatajqa.

¹⁸ Machu runa kajqa llullakuspa nerqa: Noqapis qan jina profetallataj kani, nispa, Señorpa uj angelnintaj kamachiwan: Rispa pusamuy qampa wasiykiman t'antata mikhunampaj, yakutapis ujyanampaj.

¹⁹ Chanta paywan khuska kutimuspataj, wasimpi mikhorqa t'antata, yakutapis ujyarqa.

²⁰ Ajinataj karqa, paykuna mesapi tiyashajtinku Señorpa palabran jamorqa ichus kutichimorqa chay profetaman.

^21-22 Judamanta jamoj profetamantaj jatunmanta qhaparispa, nerqa: Señorqa ajinata nin: Señorpa kamachinta mana uyarikoj kasqaykimanta, manataj waqaycharqankichu Señorpa nisusqanta, aswampis kutirispa t'antata mikhorqanki, yakutapis ujyarqanki, Señor may cheqapichus mana mikhunaykita nitaj ujyanaykitapis nisorqa chaypi, chayrayku kunanqa ayaykipis mana tatasniykej p'ampakusqampichu p'ampasqa kanqa.

^23-24 Judamanta Diospa runan mikhuyta ujyaytapis tukojtintaj, payta kutichimorqa chay machu profetaqa burrota karunaykaporqa. Judamanta profeta ripushajtintaj ñampi uj león llojsimuspa wañurpacherqa, cuerpontaj ñampi wijch'urayasharqa, burrowan leonwantaj ayaj ladompi qhepakorqanku.

²⁵ Chaypitaj ñanta pasajkuna, ayata ñampi wijch'usqata rikhorqanku, leontapis wañusqaj ladompi kashajta, maypichus chay machu profeta tiyakorqa chay llajtaman jamuspataj willarqanku rikusqankuta.

²⁶ Ñanmanta kutichimoj profetaqa chay jinata uyarispa, nerqa: Chayqa Diospa runanmin, Señorpa kamachisqanta mana kasusqanrayku, Señorqa leonman jaywaykun chaytaj mitharparispa wañurpachin, Señorpa palabran nisqanman jina.

²⁷ Wawasninman parlaspataj, nerqa: Uj burrota karunaykapuwaychej. Paykunataj burrota karunaykorqanku.

²⁸ Rispataj payqa ñampi ayata wijch'urashajta tariparqa, leonwan burrowampis chay ayaj qayllampi kashajta, manataj leonqa wañusqataqa mikhuykusqachu nillataj burrotapis imanasqachu.

²⁹ Chantá machu profetaqa Diospa profetampa ayanta burropi apamorqa llajtanman, mayta waqarikuspa p'ampanampaj.

³⁰ Ayata sepulturaman churaykuspataj waqarqanku: Ay, wauqéy!, nispa.

³¹ Chay wañusqata p'ampaykuspataj wawasninman nerqa: Noqa wañupojteyqa, maypichus p'ampasqa kashan Diospa runan chayllamantaj p'ampaykuwankichej, tullusniytapis paypa tullusnintawan khuska churapuwankichej.

³² Imaraykuchus Señorpa palabrannejta paypa tukuynin ima nisqasnenqa cheqamanta junt'akonqapuni, Betelpi altarpa contrampi parlasqan, Samaria llajtaspi lomas patapi yupaychana wasispa contrampiwan.

³³ Chay tukuywampis Jeroboamqa manapuni sajra ñanninmanta t'aqakorqachu, aswampis watejmanta churallarqataj sacerdotesta llajta runasllamanta, chay loma pata altarespaj, pitachus munasqanta ajllallaj chay altarespi sacerdotes kanankupaj.

³⁴ Chay jina ruwayqa Jeroboampa mirayninta juchaman urmacherqa; chayraykutaj wijch'usqas tukuchisqastaj karqanku kay jallp'a patamanta.