1 Reyes 12 - Qheshwa Biblia DC

Israel iskayman t'aqakun

¹ Roboamqa Siquemman rerqa, tukuynin Israeltaj chay Siquemman tantakusqanku payta reyta churanankupaj.

² Chayta yacharqa Nabatpa wawan Jeroboamqa Egiptopi kashaspa, maymanchus pay ayqekorqa rey Salomompa ñaupaqenmanta, Egiptopitaj tiyakorqa.

³ Wajyachimojtinkutaj Jeroboamqa tukuynin israelitas tantasqas karqanku chaykunawan ima, jamorqanku Roboamwan kay jinata parlaj:

⁴ Tataykeqa ancha sinch'ita llank'achiwarqayku, kunanqa qan pisiyachiy ari chay sinch'i llank'ayta, chay chhika llasa yugota jina pataykuman churawasqaykumanta, noqaykutaj qanta sirvisqayku.

⁵ Roboamtaj paykunaman nerqa: Kunanqa ripullaychej, kaymanta kinsa p'unchayman kutimunkichej. Chanta paykunaqa riporqanku.

⁶ Chaymantataj rey Roboamqa taporqa tatan Salomón kausashajtillanraj paypa ñaupaqempi karqanku chay kurajkunamanta yuyayta mañakorqa: Imaynatataj qankuna yuyaychawankichejman kay runasman kutichinaypaj?, nispa.

⁷ Paykunataj kay jinata kuticherqanku: Sichus k'acha kamachi jina qan kay llajtata sirviwaj, k'acha palabraswantaj parlariwaj chayqa, paykunaqa wiñaypaj qanta sirvisonqanku.

⁸ Chanta Roboamqa kurajkunaspa yuyaychasqankuta mana kasorqachu, aswampis payqa pikunachus paywan khuska wiñakorqanku, paypa ñaupaqempitaj karqanku chaykunamantaraj yuyayta mañakorqa.

⁹ Paykunamantaj nerqa: Imaynatataj qankuna yuyaychawankichej kay runasman kutichinaytari? Paykunaqa kay jinata niwanku: Pisiyachiy ari, tatayki chay chhika llasa yugota jina noqaykuman churawasqaykuta, nispa.

¹⁰ Chantataj chay waynas paywan khuska wiñajkunaqa kuticherqanku: Kunanqa kay palabrasta nisojkunaman kay jinata kutichinki: Tataykeqa noqaykuman anchata yapaykuwarqayku yugota jina, qantaj pisiyachiwayku, nispa: Paykunaman kay jinata ninki: Makiypa uña dedonqa tataypa ñañu wasanmanta aswan rakhuraj.

¹¹ Tatayqa llasa yugota jina churasorqachej, noqatajrí astawanraj yapaykusqaykichej, tatayqa lazowan seq'osorqachej, noqatajrí aswan raghu lazowanraj seq'osqaykichej.

¹² Imaynatachus rey Roboam, kaymanta kinsa p'unchayman kutimunkichej nisqanman jina, Jeroboamqa tukuynin runaswan khuska kutimorqa.

^13-14 Reytaj runasmanqa sinch'i palabraswan kuticherqa, kurajkunaspa yuyaychasqanta qhesachaspa, imaynatachus chay waynas yuyaychasqankuman jina nerqa: Tatayqa llasa yugota jina churasorqachej, noqarí astawanraj yapaykusqaykichej, tatayqa lazowan seq'osorqachej, noqataj aswan raghu lazowan jasut'isqaykichej.

¹⁵ Reyqa runaspa nisqanta mana uyarerqachu; imaraykuchus Señormantapuni ajina kanan karqa, junt'akunampaj Señorpa parlasqan Ahías silonitanejta Nabatpa wawan Jeroboamman.

¹⁶ Tukuynin runasqa repararqanku reyqa paykunata mana uyariyta munasqanta, kay jinatataj kuticherqanku: Noqanchej ima ruwananchej tiyan Davidwanri? Isaejpa wawanwanqa mana ima chayaqenchejpis kanchu. Israelmanta kajkunaqa wasisniykichejman ripuychej! David kunanqa wasintaqa qhawachun! Chanta israelitasqa wasisninkuman riporqanku.

¹⁷ Roboamtaj kamacherqa Judá llajtaspi israelitas tiyakojkunata.

¹⁸ Chaymantataj reyqa mit'api llank'ajkunata qhawaj Adoramta kacharqa; israelitastaj rumiwan ch'anqaspa wañucherqanku. Chayta uyarispa Roboamqa usqhayllata carretanman llojsispa Jerusalenman ayqekorqa.

¹⁹ Ajinamanta Israelqa Davidpa mirayninmanta t'aqakaporqa kunankama.

²⁰ Tukuynin israelitastaj Jeroboam kutimusqanta uyarispa, tantasqas kasharqanku chayman wajyachimuspataj, tukuy Israelpi kamachejta churarqanku, ni mayqen ayllupis qhepakorqachu Davidpa mirayninta qhatejqa, manachayqa Judá ayllumanta kajkunalla.

²¹ Roboamtaj Jerusalenman jamuspa, Judamanta tukuynin aylluta, Benjamín ayllumantawan ima tantaykorqa pachaj pusaj chunkayoj waranqa runasta, maqanakupaj ajllasqasta, Israelpa contrampi maqanakoj rinankupaj, ajinamanta tukuynin reinota Salomompa wawan Roboamman kutichimunankupaj.

²² Chanta Diospa runan Semaiasman Señorpa palabran jamorqa, kay jinata:

^23-24 Judáj reynin Salomompa wawan Roboamman, Judamanta kajkunaman, Benjamimpamanta kajkunamanwan, chanta chay wakin runasmanwan, kay jinata parlay: Señorqa ajinata nin: Ama israelitas wauqesniykichej contrampi maqanakoj riychejchu. Sapa ujniykichej wasiykichejman kutipuychej, kaytaqa noqamin ruwani. Paykunataj Señorpa palabranta uyarispa wasinkuman kutiporqanku, Señorpa nisqanman jina.

Jeroboampa juchallisqan

²⁵ Jeroboamqa Efraín orqopi Siquem llajtata watejmanta ruwacherqa, chaypitaj tiyakorqa. Chaymanta llojsispataj Penuel llajtatañataj watejmanta ruwacherqa.

^26-27 Jeroboamtaj sonqompi nerqa: Kunanqa reino atinman kutichipuyta Davidpa wasinman, sichus kay runas Jerusalenman wicharenqanku uywa ñak'asqasta Señorpa wasimpi jaywamoj chayqa. Kay runasqa Judamanta rey Roboamman sonqonkupi kutirinkuman, noqata wañuchiwaspataj, rey Roboamman kutiripunkuman.

²⁸ Chaymanta yuyaychakuytawantaj, iskay waka uñasta qorimanta ruwarqa, chanta israelitasman nerqa: Anchataña Jerusalenman rinkichej: Israelitas kayqa ari dioskunaykichejqa, Egipto jallp'amanta orqhomusorqachej chaykuna.

²⁹ Chanta ujta Betelman churarqa, ujtataj Danman.

³⁰ Kaytaj israelitastaqa juchallicherqa; runasqa Betelkama chantá Dankama yupaychaj rerqanku.

³¹ Ruwallarqataj lomas patapi yupaychana wasista, chanta sacerdotestawan churarqa runasllamanta manataj Levéj ayllunmantachu.

³² Chanta Jeroboamqa uj fiestata wakicherqa pusaj kaj killapi, chunka phishqayoj p'unchaypi, imaynatachus uj jatun fiestata Judapi ruwaj kanku ajinata; uj altar patapitaj uywa ñak'asqasta jaywarqa. Ajinata ruwarqa Betelpi uywa ñak'asqasta jaywaspa chay waka uñasta ruwasqanman. Kamachillarqataj sacerdotes kanankupaj chay lomas patapi wasista ruwachisqasnimpaj.

³³ Pusaj kaj killapi chunka phishqayoj p'unchaypi, altarta ruwarqa chay patapi uywa ñak'asqasta jaywarqa Betelpi. Kikin sonqonmanta orqhokuspa chay killapi israelitaspaj fiestata ruwarqa, llojserqataj chay altarman inciensota ruphachej.