1 Reyes 11 - Qheshwa Biblia DC

Salomonqa Diosmanta karunchakun

^1-2 Rey Salomonqa Faraompa wawan karqa chay warminmanta waj llajtayojkuna ashkha warmistawanraj munakorqa: amonitasta, moabitasta, edomitasta, sidoniasta, hititastawan ima; chay runasmanta Señorqa israelitaspa wawasninman nerqa: Ama paykunawanqa chajrukunkichejchu, nitaj paykunapis qankunawan chajrukamusonqachejchu; imaraykuchus paykunaqa dioskunasninkuman sonqosniykichejta aysasonqachej. Chaywampis Salomonqa chay warmiswan chajrukorqa paykunata munakuspa.

³ Tukuynimpi qanchis pachaj warmisnin reinas karqa; tantalla karqanku chay warmisnintaj kinsa pachaj, chay warmisnintaj paypa sonqontaqa pantacherqanku.

⁴ Salomón machu runaña kashajtintaj, warmisnenqa waj dioskunaman sonqonta kutiricherqanku, ajinamanta sonqonqa mana cheqanchu karqa Señor Diosnimpajqa, imaynachus tatan Davidpa sonqon cheqan karqa ajinataqa.

⁵ Imaraykuchus Salomonqa yupaycharqa Astarteta, sidoniospa china diosninkuta; Amonitaspa chay millay lantinku Milcomtawan.

⁶ Ajinamanta Salomonqa sajratapuni ruwarqa Señorpa ñaupaqempi, manataj cheqantachu purerqa Señorta qhatispa tatan David jinaqa.

⁷ Chanta Salomonqa Moabpa millay lantin Quemospaj uj altarta wakicherqa, Jerusalempa chimpan orqopi; Amonitaspa chay millay lantin Molocpajpis uj altarta wakichillarqataj.

⁸ Ajinallatataj ruwarqa chay tukuy karu llajtayoj warmisnimpajpis, paykunataj chay altarespi inciensota q'osñichispa, uywa ñak'asqastawan dioskunasninkuman jaywaj kanku.

⁹ Señorqa Salomompa contrampi phiñakorqa, paypa sonqon israelitaspa Señor Diosninmanta karunchakusqanrayku, Señorqa payman iskay kutita rikhurerqapis.

¹⁰ Señorqa kamacherqataj ama purinanta waj dioskunata yupaychaspa; paytajrí Señorpa kamachisqantaqa mana kasorqachu.

¹¹ Señortaj Salomonman nerqa: Kay jinata ruwasqaykirayku, tratoyta, kamachisqasniytapis mana waqaychasqaykirayku, kunanqa reinoykita qhechusqayki, ujnin kamachiykimantaj qopusaj.

¹² Chaywampis mana kunan p'unchaykunasniykipichu chayta ruwasaj, tatayki Davidta munakusqayrayku; wawaykej makinmantaraj qhechusaj.

¹³ Manataj tukuynin reinotachu qhechusaj, uj ayllullata saqepusaj kamachiy Davidta munakusqayrayku, Jerusalén llajtata ajllakusqayraykutaj.

¹⁴ Señortaj uj enemigota jataricherqa Salomompa contrampi: Hadad edomitata, payqa Edommanta reyespa mirayninmanta karqa.

¹⁵ Maypachachus David Edompi kashajtin, soldadospa kurajnin Joabqa rerqa maqanakupi wañusqasta p'ampaj, chaypacha Edommanta tukuynin qharista wañucherqa.

¹⁶ Joabqa tukuynin israelitaswan jaqaypi tiyakorqa sojta killata, idumeo qharista tukuchinankukama.

¹⁷ Chaywampis Adadqa ayqekorqa tatampa wakin edomita kamachisninwan, chaykunawantaj Egiptoman riporqa, chaypacha Adadqa juch'uyllaraj karqa.

¹⁸ Madianmanta llojsispataj Paranman chayarqanku, chaymanta runasta kamachisninkupaj jap'ispataj paykunawan Egiptoman riporqanku, rey faraompaman, paytaj paykunaman qorqa wasita, mikhunata, jallp'atawan.

¹⁹ Adadtaj jatun khuyakuyta tarerqa rey faraompa ñaupaqempi, paymantaj cuñadanta warmin kanampaj qoporqa, Tahpenes reinaj ñañanta.

²⁰ Tahpenespa hermanantaj Adadpaj uj wawata nacechikorqa Genubat sutiyojta, chay wawatataj Tahpenesqa ñuñumanta p'itiytawan, faraompa palaciompi uywarqa paypa wawasnintawan khuska.

²¹ Adadtaj Egiptopi kashaspa David wañupusqanta yacharqa, soldadospa kurajninku Joab wañupusqantapis, chaypacha Adadqa rey faraomta nerqa: Saqeway llajtayman ripojta.

²² Faraontaj kuticherqa: Imarayku? Imataj noqajpi mana kasqachu jallp'aykiman ripunaykipaj? Paytaj nerqa: Mana imapis; chay tukuywampis mañakuyki ripojta saqenawaykita.

²³ Diosqa jatarichillarqataj Salomompa contrampi Eliadaj wawan Rezonta, payqa ayqekusqa Sobaj reynin Adad-ezerpa kamachiyninmanta.

²⁴ Paywantaj sajra runasta tantaykorqa, paykunaj kurajninkutaj karqa. Maypachachus David Sobamanta kajkunata atipaykorqa, chaypacha Damascoman ripuspa tiyakamorqanku, chaypitaj kamachejta paytaqa churarqanku.

²⁵ Salomompa tukuy p'unchaykunasnimpi Israelpa contrampi karqa, kay llakiy yapakorqa Hadadpa Israelta chejnisqanman. Ajinamanta Rezonqa Siriapi kamachej karqa.

²⁶ Nabatpa wawan Jeroboampis, efrateo Seredamanta, reypa contrampi oqharikullarqataj, payqa Salomompa kamachin karqa, mamantaj uj viuda Zerua sutiyoj karqa.

²⁷ Payqa kay jinamanta reypa contrampi makisninta oqharerqa: Salomonqa Milopi tatan Davidpa llajtampa perqasninta wisq'aykuchisharqa.

²⁸ Jeroboamtaj sumaj kallpayoj wapu runa karqa, Salomontaj sumaj k'uchi kasqanta rikuspa, Josej ayllunmanta mit'api llank'ajkunata qhawanampaj churarqa.

²⁹ Jinataj karqa, uj p'unchaypi Jeroboamqa Jerusalenmanta jamushaspa, ñampi silonita nisqa profeta Ahiaswan tinkorqa, Ahiasqa mosoj poncho churaykusqa kasharqa. Paykunataj iskaynillanku campopi kasharqanku.

³⁰ Ahiastaj chay mosoj ponchonta jap'ispa chunka iskayniyojman llik'imucharqa.

³¹ Jeroboamtataj nerqa: Qampaj jap'ikuy kay llik'isqamanta chunkata, Israelpa Señor Diosnin ajinata nisunki: Kayqa noqa Salomompa reinonta makinmanta qhechusaj, qanmantaj chunka ayllusta qosqayki.

³² Paytaj uj ayllullawan qhepakonqa kamachiy Davidta Jerusalentawan munakusqayrayku, chay llajtataqa noqa ajllakorqani tukuynin Israel ayllus ukhumanta.

³³ Imaraykuchus Salomonqa noqata saqerpariwaspa yupaycharqa sidoniospa china diosnin Astarteta, Moabpa diosnin Quemosta, amonitaspa diosnin Moloctawan, manataj noqaj ñankunasniypichu purinku, noqaj ñaupaqeypi cheqanta ruwaspa, kamachisqasniyta, nisqasniytawan, imaynatachus tatan David waqaycharqa jinataqa.

³⁴ Manataj makinmantachu qhechusaj reinotaqa, aswampis saqellasajraj kamachinanta tukuy kausaynimpi, kamachiy Davidta munakusqayrayku, mayqentachus noqa ajllakorqani, paytaj kamachisqasniyta, nisqasniytawan waqaycharqa.

³⁵ Wawampa makinmantaraj reinotaqa qhechusaj, qanmantaj chunka ayllusta qopusqayki.

³⁶ Wawanmantaj uj aylluta qosaj, kamachiy Davidpa k'anchaynin noqaj ñaupaqeypi k'anchanallampajpuni Jerusalempi, sutiyta churanaypaj chay ajllakusqay llajtapi.

³⁷ Noqataj qanta jap'isqayki, qantaj kamachinki imaynatachá munanki chayman jina, qantaj tukuy Israelpi kamachinki.

³⁸ Sichus uyariwanki kay tukuy kamachisusqayta, ñankunasniypitaj puriwaj, noqaj ñaupaqeypi, cheqanta ruwaspa, waqaychaspa kamachisqasniyta, nisqasniytawan, kamachiy David ruwarqa jinata chayqa, qanwan noqa kasaj, wasiykitapis sumajta sayachisaj, imaynatachus Davidpajpis ruwarqani jinata, Israeltataj qanman qosqayki.

³⁹ Chayrayku noqaqa Davidpa mirayninta llakiyman churasaj, jinapis mana wiñaypajchu.

⁴⁰ Chaynejta Salomonqa Jeroboamta wañuchiyta munarqa, chanta Jeroboamqa jatarispa Egiptoman ayqekorqa, Egiptoj reynin Sisacpaman, chaypitaj kakorqa Salomón wañupunankama.

Salomompa wañupusqan

⁴¹ Salomompa waj ruwasqasnin, tukuy ima ruwasqasnin, yachachiyninmantawan, manachu Salomompa ruwasqasnin chay libropi qelqasqa kashan?

⁴² Salomontaj kamacherqa Jerusalempi tukuynin Israelta tawa chunka watata.

⁴³ Salomón wañupojtintaj tatan Davidpa llajtampi p'ampasqa karqa, cuentampitaj wawan Roboam kamacherqa.