1 Pedro 4 - Qheshwa Biblia DC

Diospa munayninta ruwana

^1-2 Cristo ñak'arerqa aychampi, ajinallatataj qankunapis ñak'arinaykichejpaj wakichikuychej. Aychampi ñak'arejqa juchata atipanña, qhepa p'unchaykunapi ama aychaman jina kausanampaj, nitaj runakunaj munayninman jinachu. Astawanqa, Diospa munayninman jina kausaychej.

³ Mana creejkunaj munayninta ruwasqaykichejqa tukukunña qankunapaj. Chaypacha purej kankichej millay juchaspi, sajrata purispa, machaykuykunaspi, qhochukuspi, anchata ujyaspa, chejnina lantista yupaychaspa ima.

⁴ Paykunawan khuska sajra chinkay kausaypi mana purejtiykichej, sajra runasta jina qhawasunkichej. Chayrayku qankunapaj rimanku.

⁵ Paykuna chay imasmanta cuentata qonqanku pimanchus wakichisqa kashan, juzganampaj kausajkunata, wañusqakunatawan.

⁶ Chayrayku wañusqasman evangelio willasqa karqa, aychapi kashaspa juzgasqa kanankupaj, runasman jina; Diospa munayninman jinataj, espiritupi kausanankupaj.

⁷ Tukuy imaj tukukuynin qayllapiña. Maychus kajta ruwaspa kausakuychej. Mana sayk'uspataj Diosmanta mañakuychej.

⁸ Ñaupajtaqa qankuna ukhupi munakuy kachun, imaraykuchus munakoyqa ashkha juchata pampachan.

⁹ Qankunapura ama thutuspa, wasiykichejman wajyanakuychej.

¹⁰ Sapa ujtaj Diospa qosqanman jina wajkunaman jaywachun, sumaj mayordomo jina, Diosmanta ashkha yanapata jap'isqanmanta.

¹¹ Pillapis parlajqa, Diospa palabranman jina parlachun. Pillapis wajkunata yanapan chaypis, Diospa kallpa qosqanman jina yanapachun; tukuy imapi Jesucristonejta Dios yupaychasqa kanampaj. Paypajtaj kachun janaj pacha k'anchay, kamachiytaj, wiñaypa wiñaynintinkama. Amén.

Cristianos jina ñak'arina

¹² Munakusqasníy, ama t'ukuychejchu nina larwaypi jina ñak'arisqaykichejmanta; mana rejsisqapis kanman jina.

¹³ Astawanqa kusikuychej Cristoj ñak'arisqampi chayaqeyoj kasqaykichejmanta; payqa jatun kaynimpi rikhurimojtintaj, may kusiywan junt'asqa kanaykichejpaj.

¹⁴ Cristoj sutinraykuchus k'amisqas kankichej chayqa, kusikuyniyoj kankichej, imaraykuchus Diospa k'anchaj Espíritun qankunapi tiyakun. [Cheqamanta, paykunaqa Diospa contranta rimanku, qankunataj payta yupaychankichej.]

¹⁵ Ama mayqenniykichejpis runa wañuchis kaychejchu, chayri suwaspis kaychejchu, amataj sajrata ruwaychejchu, nillataj wajkunaj imasninmampis sat'ikuychejchu. Chayta ruwaspaqa ñak'ariwajchej.

¹⁶ Pichus Cristota qhatikusqanrayku ñak'arin chayqa, ama p'enqakuchunchu, astawanqa chaynejta Diosta yupaychachun.

¹⁷ P'unchay chayamunña. Juiciotaj Diospa wasinmanta qallarikunan tiyan. Juiciochus noqanchejmanta qallarikonqa chayqa, Diospa evangelionta mana kasojkuna, imapitaj tukukonqankuri?

¹⁸ Allinta kausakoj runachus ñak'ayllata salvakun chayqa, Diosta mana yupaychaj runa, juchasapaspis, imapitaj rikhurenqankuri?

¹⁹ Ajinaqa, Diospa munayninman jina ñak'arejkuna, almankuta jap'ichichunku, mundota ruwaj, junt'aj Diosman, allin imastataj ruwachunku.