1 Pedro 3 - Qheshwa Biblia DC

Casarakojkunaj kausakuyninku

^1-2 Ajinallatataj, qankunapis warmis, qosasniykichejta kasuychej; ajinamanta Diospa palabrampi mana creejkunapis, warmisninkoj sumaj kausayninta rikuspa, mana palabrallawan Señorman kutirinankupaj; ajinallatataj rikuspa, llimphu puriyniykichejta, Diosta manchachikusqaykichejtawan.

^3-4 K'achanchakuyniykichejqa ama jawallamantachu kachun, ñajch'akuypis ama runaj rikunallampaj; nitaj qorimanta ruwasqa k'acha imasta churakuspa, chayri valorniyoj p'achaswan p'achallikuspa; manachayqa, k'achanchakoyqa sonqoykichej ukhupi kachun, mana ismoj allinchakuywan, espiritupi, llamp'u sonqo kaypitaj kachun. Kay imasqa Diospa ñaupaqempi jatumpaj qhawasqa.

⁵ Ñaupa p'unchaykunapeqa, Diospi suyayniyoj ajllasqa warmis, chay imaswan k'achanchakorqanku, qosasninkuta kasuspa.

⁶ Sarapis Abrahamta kasoj, señorníy, nispa. Qankunapis chay Saraj kausaynin jina kankichej, allin kajta ruwankichej chayqa, mana ni imamanta manchachikuspa.

⁷ Kikillantataj qosaspis, warmisniykichejwan allin yachaywan kausakuychej. Paykunata allimpaj qhawaychej, p'akikoj vasota jina. Paykunaqa qankunawan khuska wiñay kausay chayaqeta jap'enqanku. Ajinamanta, Diosmanta mañakusqaykichejpis mana jark'asqachu kanqa.

Allinta ruwaspa ñak'arejkuna

^8-9 Kunanqa tukuyniykichej uj sonqolla kaychej, wajkunapaj sumaj sonqoyoj, hermanospura munanakuspa, khuyakuyniyoj, llamp'u sonqos; ama sajramanta sajrallatataj kutichispa, nitaj maldicionmantapis maldicionllatatajqa; manachayqa bendicispa, imaraykuchus Diosqa wajyasorqachej bendicionta jap'inaykichejpaj.

¹⁰ Pichus kausayninta munakun, sumaj p'unchaykunatataj rikuyta munan chayqa, qallunta jark'achun sajra rimaykunamanta, simintaj ama llullata parlachunchu.

¹¹ Sajra kajmanta t'aqakuchun, allin kajtataj ruwachun. Sonqo tiyasqa kayta mask'achun. Chaytataj qhatichun.

¹² Señorpa ñawisnenqa cheqan kajkunata qhawashan, ningrisnimpis paykunaj mañakusqankuta uyarishan. Astawampis Señorqa sajrata ruwajkunaj contrampi kashan.

¹³ Pitaj qankunata imanasunkichejman, sichus allin kajta qhatiwajchej chayqa?

¹⁴ Cheqanta kausaspachus imallatapis ñak'arinkichej chayqa, kusikuyniyojmin kankichej. Chayrayku, ama kharkatitispa paykunata manchachikuychejchu, nitaj musphaykachaychejchu.

¹⁵ Astawanqa Cristo Señorta yupaychaychej sonqoykichejpi. Wakichisqapuni kaychej, suyayniykichejmanta yachayta munajkunaman, llamp'u sonqowan, mana phiñakuspa, maychus kajta kutichinaykichejpaj.

¹⁶ Allin sonqoyoj kaychej. Pikunachá qankunapaj thutunku sajratapis ruwawajchej jina chayqa, paykunallataj p'enqachisqas kanqanku, Cristopi allin kausayniykichejta qhasimanta tumpajkuna.

¹⁷ Aswan walej kanman, allinta ruwaspa ñak'arinaykichejqa, Diospa munaynin ajina kajtenqa; manataj sajrata ruwaspaqa.

¹⁸ Cristopis juchasrayku uj kutillata ñak'arerqa cheqan mana juchayoj, juchasapasrayku; Diosman pusanawanchejpaj. Cheqamanta aychapi wañorqa, espiritupitaj kausasharqa.

¹⁹ Chay espiritupitaj rispa, presochasqa espiritusman willamorqa.

²⁰ Chaykunataj ñaupa p'unchaykunapi, mana kasukoj karqanku. Noéj p'unchaynimpi, Diosqa jatun pacienciawan paykunata suyarqa arca ruwakushajtin. Chaypachataj pisi runas yakumanta salvasqas karqanku, tukuyninkutaj pusajlla karqanku.

²¹ Chay yakutaj bautismowan ninakun. Bautismotaj aychaj millayninta mana llimphuchanchu; astawanqa llimphu concienciaj munayninwan Diosninchejman pusawanchej, Jesucristo kausarimusqanrayku.

²² Jesucristotaj janaj pachaman riporqa, chaypitaj Diospa pañampi tiyasqa kashan. Paypa munaynimpi kanku angelkuna, kamachejkuna, atiykunapis.