1 Pedro 2 - Qheshwa Biblia DC

¹ Chayrayku tukuy laya sajra yuyayta saqeychej, tukuy laya ch'aukiyayta, puraj uya kayta, qhawanakuyta, tukuy sajra rimaykunatawan.

^2-3 Espirituman jina, llimphu lecheta munaychej, ñuñoj wawas jina, chaywan salvaciompaj wiñanaykichejpaj, sichus Señorpa k'acha kayninwan misk'ichikorqankichej chayqa.

Cristoqa kausaj rumi

⁴ Señorman qayllaykuychej, kausaj rumiman jina. Paytaqa runas qhesachanku, Diospajtaj ajllasqa sumaj k'acha rumi kashan.

⁵ Qankunapis kausaj rumis jina, Espiritupi uj templo jina ruwasqas kankichej, ajllasqa sacerdotes kanaykichejpaj; Jesucristonejta Diosman Espiritupi allin kaj jaywanasta jaywanaykichejpaj.

⁶ Chayrayku Escriturapi nisqa kashan: Noqa Siompi churani aswan sumaj esquina rumita, ajllasqa k'acha rumitataj. Chaypi creejqa mana p'enqakonqachu.

^7-8 Chaymin qankuna creejkunapaj k'acha; mana creejkunaj chay wasichajkunaj qhesachasqanku rumeqa, sumaj esquina rumiman tukupun, misk'achej rumiman, urmachej qaqamanta. Mana kasukojkunaqa Diospa palabrampi misk'anku, imaraykuchus chaypaj churasqas karqanku.

Diospa wawasnin

⁹ Qankunaqa ajllasqa ayllu kankichej, reypa sacerdotesnin, juchamanta t'aqasqas, Diospa rantisqan ayllu, willanaykichejpaj paypa atiyninta; pichus laqhamanta wajyasorqachej sumaj k'anchayninman.

¹⁰ Ñaupa p'unchaykunapeqa manaraj aylluchu karqankichej, kunanrí Diospa ayllunña kankichej. Jinallataj, ñaupa p'unchaykunapeqa Diospa khuyakuyninta manaraj tarerqankichejchu, kunantaj tarinkichejña.

Diospa wawasnin jina kausaychej

¹¹ Munasqa hermanos, mañakuykichej, waj llajtayojkunata, chayri purikojkunata jina, ama aychaj munasqasninta qhatinaykichejta, imaraykuchus chaykunaqa almaj contrampi maqanakunku.

¹² Allinta kausakuychej Diosta mana rejsejkuna ukhupi. Paykunaqa sajra runaspaj jina qankunapaj rimashanku; Señor chayamojtintaj, Diosta yupaychanqanku, allin ruwasqasniykichejta rikuspa.

^13-14 Señorninchejrayku kasuychej runaspa kamachisqankuta, reyta ima, kurajta jina; ñataj kamachejkunatapis, Señorpa kachamusqasninta jina, sajra ruwajkunata jasut'inankupaj, allinta ruwajkunatataj jatunchanankupaj.

¹⁵ Kaymin Diospa munaynenqa: Allin imasta ruwaspa, sajra, mana yuyayniyoj runasta ch'inyachinaykichejpaj.

¹⁶ Kacharisqas jina kankichej; amataj kacharisqasman tukuspa, sajrata ruwajkuna jinachu kaychej, astawanqa, Diospa kamachisnin jina puriychej.

¹⁷ Tukuyta jatumpaj qhawaychej. Hermanosta munakuychej. Diosta manchachikuychej. Reytataj allimpaj qhawaychej.

Cristoj ñak'arisqan yachachiwanchej

¹⁸ Uywasqas, tukuy sonqo uywaqesniykichejta kasuychej; mana k'acha llamp'u sonqoyoj kajkunallatachu, sajra kajkunatapis kikillantataj kasuychej.

¹⁹ Kayqa allin qhawasqa kanan tiyan; sichus pillapis concienciarayku, Diospa ñaupaqempi llakiykunata, qhasi mana kajmanta jap'ikun chayqa.

²⁰ Ima allintaj kanman llakikusqaykichej juchallikuspa laq'asqas, llamp'u sonqotaj kawajchej chayri? Allinta ruwaspachus ñak'ariwajchej, llamp'u sonqowantaj chayta apawajchej chayqa, chaymá Diospa ñaupaqempeqa allin.

²¹ Diosqa chaypajmin wajyasorqachej. Cristopis qankunarayku ñak'arerqa. Yachachiyta qankunapaj saqerqa, purisqanta purinaykichejpaj.

²² Cristoqa mana jayk'ajpis juchallerqachu, nitaj llulla parlaypis simimpi tarikorqachu.

²³ Cristoqa, payta maldicejtinku, mana maldicillarqatajchu, ñak'arishaspapis mana kutichikorqachu, astawanqa cheqanta juzgajpa makisninman chay imasta churarqa.

²⁴ Pay kikin cuerpompi juchasninchejta k'aspi cruzpi aparqa, noqanchejta juchaspaj wañusqas kaspa, cheqanta kausananchejpaj. Paypa nanayninraykutaj jucha onqoymanta thañichisqas kankichej.

²⁵ Ñaupajtaqa chinkasqa ovejas jina karqankichej; kunantaj kutiripunkichejña almaykichejpa michejnin Cristoman.