1 Pedro 1 - Qheshwa Biblia DC

Pedroj napaykuynin

¹ Noqa Pedro, Jesucristoj apostolnin kani. Kay cartata escribimuni llajtasninkumanta qharqosqas ch'eqerasqasman; pikunachus tiyakunku Pontopi, Galaciapi, Capadociapi, Asiapi, Bitiniapi ima chaykunaman.

² Qankunata Dios Tata ajllakorqa ñaupajmantapacha yuyasqanman jina, Santo Espiritunejta llimphuchaspa, Jesucristota kasunaykichejpaj, yawarninwantaj ch'ajchusqas kanaykichejpaj. Khuyakuy, sonqo tiyasqa kayta, qankunapi yapakuchun.

Kausaypa suyaynin

^3-4 Yupaychasqa kachun Dios, Señorninchej Jesucristoj Tatan. Paya jatun khuyakuyninrayku watejmanta nacichiwarqanchej, kausay suyayta qonawanchejpaj, Jesucristo wañusqakunamanta kausarimusqanrayku, jap'inanchejpaj mana ismoj, mana ch'ichiyoj, nitaj ch'akipoj chayaqeta. Chaytaj janaj pachapi qankunapaj waqaychasqa kashan.

⁵ Creesqaykichejraykutaj Diospa atiynimpi waqaychasqas kankichej, chay wakichisqa salvacionta tarinaykichejpaj. Chaytaj, qhepa p'unchaykunapi rikuchisqa kanqa.

^6-7 Chayrayku, kusisqas kashankichej, kunanqa tukuy imaymana llakiykunawan pisi tiempopaj ñak'arinaykichej kajtimpis, creesqaykichej llimphuman tukunampaj, yupaychakuyman, lliphipiyman, jatunchakuymantaj, Jesucristo rikhurimojtin. Creesqaykichejqa qorimanta aswan k'acha. Qoreqa tukukuyniyoj, chaywampis ninanejta ch'uwachasqa.

⁸ Jesucristotaqa munakunkichej mana rikuspalla; kunanqa mana rikuspalla paypi creenkichej, kusikunkichejtaj mana niy atina kusiywan, janaj pacha jatun k'anchaywan ima.

⁹ Creesqaykichejpa suyayninta taripaspa, almasniykichejpaj salvacionninta tarinkichej.

¹⁰ Chay salvaciontaqa profetas mayta mask'arqanku, tapuykacharqankutaj. Paykunaqa Diospa khuyakuyninmanta willarqanku, qankunapaj chay salvacionta wakichisqanta.

¹¹ Chantá allinta qhawarqanku pichus, mayk'ajtajchus kananta. Paykunapi kaj, Cristoj Espirituntaj, ñaupajmantapacha willarqa Cristoj ñak'arinasninmanta, jatuchaj yupaychanas qhepankuta jamunanmanta ima.

¹² Paykunamantaj sut'inchasqa karqa, chay imastaj mana paykunallapajchu, astawanqa qankunapajpis kasqanta. Paykuna imatachus willarqanku, chayllatataj janaj pachamanta kachamusqa Santo Espíritoj atiynimpi evangeliomanta willawanchej. Chay imastaqa angelespis anchatapuni qhawayta munanku.

Diosqa llimphu kausayman wajyawanchej

¹³ Chayrayku, allinta yuyayniykichejta wakichiychej, maychus kajtataj kausakuychej. Tukuy suyayniykichejtataj churaychej chay khuyakuypi; mayqentachus Dios Tata qosonqachej, Jesucristoj rikhurimuynimpi.

¹⁴ Kasukoj wawas jina kaychej, ama sajra imasta qhatispa, mayqenkunatachus ñaupajta ruwaj kankichej, manaraj Diosta rejsishaspa.

¹⁵ Imaynatachus qankunata wajyaj Diosqa santo, ajinallatataj qankunapis santos kaychej, tukuy kausakuyniykichejpi.

¹⁶ Escriturapeqa nin: Santos kaychej, imaraykuchus noqa santo kani.

¹⁷ Tataykichejta jinachus Diosta yupaychankichej chayqa, manchachikuspa puriychej tukuy kausayniykichejpi, waj llajtayojpis kawajchej jina. Diosqa runasta mana runaspa rijch'ayninman jinachu juzgan. Manachayqa, sapa ujta ruwasqasninman jina juzgan.

^18-19 Qankuna yachankichej Dios kacharichisusqanta chay qhasi mana kaj kausayniykichejmanta, mayqentachus tatasniykichejmanta jap'erqankichej; mana tukukoj imaswanchu rantispa, mana qoriwan jinachu, nitaj qolqewan jinachu, astawanqa, Cristoj qhapaj yawarninwan. Payqa mana ch'ichiyoj, mana onqoyniyoj cordero jinataj wañuchisqa karqa.

²⁰ Cristo chaypaj wakichisqa karqa, manaraj kay pacha ruwasqa kashajtin. Qhepantataj p'unchaykunapi rikhurimorqaña qankunata munakusqanrayku.

²¹ Paynejta Diospi creenkichej. Paytaj Cristota wañusqakunamanta kausarichispa jatuncharqa; ajinamanta feniykichej suyayniykichejpis, Diospi kanampaj.

²² Kunantaj qankuna Santo Espiritunejta cheqa kajta kasuspa, almasniykichejta llimphucharqankichej, hermanosniykichejta cheqamanta munakunaykichejpaj mana llullakuspa. Kunanqa munananakuychej purajmanta llimphu sonqowan.

²³ Qankunaqa watejmanta nacisqas kankichej, mana ismoj mujumantachu; manachayqa mana ismojmanta, Diospa palabrannejta. Chaytaj kausan wiñaynintimpaj.

²⁴ Escrituraqa nin: Runaqa qhora jina; tukuy sumaj kausaynintaj qhora t'ika jina. Qhoraqa ch'akipun, t'ikataj t'akakun.

²⁵ Señorpa palabranqa wiñaynintimpaj kanqa. Kaytaj chay palabra, evangelionejta qankunaman willasqa.