1 Juan 5 - Qheshwa Biblia DC

Juchata atipanchej

¹ Pillapis Jesusqa Cristo kasqanta creen chayqa, Diospa wawan. Pillapis tatanta munakojqa, wawantapis munakullantaj.

² Kaypi yachanchej Diospa wawasninta munakusqanchejta, Diosta munakojtinchej, kamachiykunasnintataj kasojtinchej.

³ Diosta munakoyqa kamachisqasninta junt'aymin, kamachisqasnintaj junt'ana jinalla kanku.

⁴ Pillapis Diospa wawan kajqa kay pachata atipan. Kaymá atipayqa. Creesqaykichej kay pachata atipan.

⁵ Pitaj kay pachata atipan, manachu Jesusqa Diospa Churin kasqanta creejlla?

Diospa Churinmanta willanku

⁶ Kaymin yakuwan, yawarwan jamoj Jesucristoqa. Manataj yakullawanchu jamorqa, astawanqa yakuwan, yawarwan ima. Kay imasmanta kikin Espíritu willawanchej; imaraykuchus Espiritoqa cheqa kajmin.

^7-8 Kinsa kanku willajkunaqa: [Janaj pachapi Dios Tata, paypa Churin, Santo Espirituwan. Paykunataj ujlla kanku. Kay pachapi willajkunapis kinsallataj kanku]: Santo Espíritu, yaku, yawar ima. Kinsantintaj uj kikinta willanku.

⁹ Runaspa willasqasninkutapis jap'ikunchej; kaymanta aswan kurajqa Diospa willasqan; kaytaj Diospa willaynenqa, Churinmanta willawasqanchej.

¹⁰ Pichus Diospa Churimpi creejqa, Diospa willasqanta sonqompi jap'in. Diospi mana creejrí, Diosta llullata jina rikhurichin, Churinmanta Diospa willasqanta mana creesqanrayku.

¹¹ Kaytaj chay willayqa: Dios wiñay kausayta qowasqanchej, kay wiñay kausaytaj Churimpi kashan.

¹² Diospa Churinta sonqompi jap'ejqa kausayniyoj. Diospa Churinta mana sonqompi jap'ejrí, mana kausayniyojchu.

Wiñay kausay

¹³ Kay imasta escribimuykichej, Diospa Churimpi creesqaykichejrayku, yachanaykichejpaj wiñay kausayniyoj kasqaykichejta.

¹⁴ Kaytaj Diospi suyakuyninchejqa. Munayninman jinachus imallatapis mañakusunman chayqa, pay uyariwanchej.

¹⁵ Imallatapis Diosmanta mañakojtinchejqa, yachanchej pay uyariwasqanchejta; ajinallatataj mañakusqanchejta paymanta jap'isunchej.

¹⁶ Pillapis wauqenta rikunman mana wañuyman apaj juchawan juchallejta chayqa, Diosmanta paypaj mañapuchun. Diostaj payman kausayta qonqa. Kayta nini mana wañuyman apaj juchawan juchallejkunapaj. Tiyallantaj wañuyman apaj juchapis. Mana ninichu Diosmanta mañanata chay juchawan kajpaj.

¹⁷ Tukuy mana cheqan kajta ruwayqa jucha. Chaywampis, tiyallantaj wañuyman mana apaj jucha.

¹⁸ Yachanchej Diosmanta nacejqa mana juchapi purisqanta, imaraykuchus Diospa Churin payta juchamanta waqaychan. Chayrayku supayqa mana atinchu payta llankhaykuyllatapis.

¹⁹ Yachanchej Diosmanta kasqanchejta, mundontintaj supaypa atiynimpi kasqanta.

²⁰ Yachanchej Diospa Churin jamuspa yachayta qowasqanchejta, cheqa Diosta rejsinanchejpaj; cheqa Churimpitaj kananchejpaj. Pay cheqa kaj Diosqa, wiñay kausaytaj.

²¹ Wawitasníy, qhasi mana kaj dioskunamanta allinta qhawakuychej.