1 Juan 4 - Qheshwa Biblia DC

Diospa Espíritun, anticristoj espiritunwan

¹ Munakusqasníy, ama pillatapis Diospa yuyaychasqan kani nejkunataqa creeychejchu; allintaraj paykunata rejsiychej Diosmantachus kanku, manachus chayta, imaraykuchus ashkha llulla profetas tukuynejpi rikhurishanku.

² Kay jinapi rejsinkichej Diospa yuyayninman parlajta. Pillapis Jesucristo aychapi jamusqanta yachachejqa, Diosmanta.

³ Pillapis Jesucristota qhesachajqa, mana Diosmantachu, Cristoj contranmantamin. Chay anticristo jamunanmanta uyarerqankichejña; kunan payqa kay pachapiña kashan.

⁴ Wawitasníy, qankunaqa Diosmanta kankichej, paykunatataj atiparqankichej, imaraykuchus qankunapi kajqa astawan atiyniyoj kay pachapi kajmanta nisqaqa.

⁵ Paykunaqa kay pachamanta kanku. Chayrayku kay pachapi imasllamanta parlanku. Kay pacha runastaj paykunata uyarinku.

⁶ Noqanchejqa Diosmanta kanchej. Pichus Diosta rejsin chayqa, uyariwanchej. Diosta mana rejsejrí, mana uyariwanchejchu. Chay jinamanta cheqa Espirituta rejsinchej, pantachej espiritutapis.

Diosqa munakuy

⁷ Munakusqasníy, purajmanta munanakunachej. Munakoyqa Diosmantamin. Munakojqa Diospa wawan, Diostataj rejsin.

⁸ Mana munakojqa Diosta mana rejsinchu; Diosqa munakuymin.

⁹ Kay jinamanta Diosqa munakuyninta rikuchiwarqanchej: Uj k'ata Churinta kachamusqampi paynejta kausananchejpaj.

¹⁰ Kaymá chay munakoyqa. Manaraj Diosta munakushajtinchej, payqa munakuwarqanchejña. Churintataj kachamorqa wañunampaj juchasninchejrayku.

¹¹ Munakusqasníy, chay jinatachus Dios munakuwarqanchej chayqa, noqanchejpis purajmanta munanakunachej.

¹² Mana ni jayk'aj pipis Diosta rikorqachu. Purajmanta munanakojtinchejqa, Dios noqanchejpi kashan, munakuynintaj noqanchejpi junt'akun.

¹³ Kay jinapi yachachej Diospi kasqanchejta, paytaj noqanchejpi, Espiritunta qowasqanchejpi.

¹⁴ Noqaykutaj rikorqayku, willaykutaj Dios Tata churinta kachamusqanta kay pachapi runaspa Salvajnin kanampaj.

¹⁵ Pichus willanman Jesusqa Diospa Churin kasqanta chayqa, Dios paypi kashan, paytaj Diospi.

¹⁶ Noqanchej rejsinchej, creenchejtaj Dios munakuwasqanchejta. Diosqa munakuymin. Munakuypi kajqa Diospi kashan, Diostaj paypi.

¹⁷ Kay jinamanta munakoyqa noqanchejpi junt'akun, tukuy sonqo juicio p'unchaypi kananchejpaj. Imaynatachus pay kashan, ajinata noqanchejpis kay pachapi kashanchej.

¹⁸ Munakuypeqa mana manchachikuy kanchu. Junt'asqa munakoyqa manchachikuyta jawaman qharqon. Manchachikoyqa ñak'ariykunata apamun. Manchachikojqa manaraj munakuywan junt'asqachu kashan.

¹⁹ Noqanchejqa Diosta munakunchej, pay ñaupajta munakuwasqanchejrayku.

²⁰ Pillapis Diosta munakuni ninman, wauqentataj chejninman chayqa, llulla runa. Pichus wauqenta rikushaspa, mana munakunchu chayqa, manallataj Diostapis munakuyta atinchu, mayqentachus mana rikunchu.

²¹ Jesucristoqa kay kamachiyta qowarqanchej: Diosta munakojqa, wauqentapis munakullachuntaj.