1 Juan 3 - Qheshwa Biblia DC

Diospa wawasnin

¹ Qhawariychej, may jinatapunichus Dios Tata munakuwarqanchej, Diospa wawasnin sutichasqas kananchejpaj; cheqamanta ajina kanchej. chayrayku, kay pachapi runakuna mana rejsiwanchejchu, Diosta mana rejsisqankurayku.

² Munakusqasníy, kunanqa Diospa wawasnin kanchej, chaywampis, manaraj sut'ichu imaynachus kananchejqa. Yachanchejtaj, Jesucristo rikhurimojtin payman rijch'akunanchejta, imaraykuchus payta rikusunchej maychus kasqanta jina.

³ Pillapis Jesucristopi suyayninta churajqa, pay kikin llimphuchakun, imaynatachus Jesucristopis llimphu kashan, ajinata.

⁴ Juchallikojqa Diospa leyninta p'akin; imaraykuchus juchaqa Diospa leyninta p'akiymin.

⁵ Yachankichej jina, Jesucristoqa jamorqa juchasninchejta chinkachinampaj; manataj paypeqa ni ima jucha kanchu.

⁶ Jesucristowan kakojqa, mana juchachakunchu. Juchallapipuni kakojrí, mana payta rikorqachu, nitaj rejserqachu.

⁷ Wawitasníy, ama piwampis ch'aukiyachikuychejchu. Pichus cheqan kajta ruwajqa, cheqan runa; imaynatachus Jesucristopis cheqan, ajina.

⁸ Juchallikojqa supaypata. Supayqa qallariymanta juchallikun. Chayrayku, Diospa Churenqa jamorqa supaypa ruwasqasninta phirinampaj.

⁹ Diospa wawan kajqa mana juchapi kausanchu; paypeqa Diospa kausaynin kashan. Diospa wawan kasqanraykutaj manaña juchapi kausanmanchu.

¹⁰ Kay jinapi yachakun Diospa wawasninchus chayrí supaypatachus kasqankoqa. Mana cheqan kajta ruwajqa, nitaj wauqentapis munakojqa, mana Diospa wawanchu.

Ujkuna ujkunawan munanakunamanta

¹¹ Kaymin qallariymantapacha uyarisqaykichej willayqa: Ujkuna ujkunawan munanakunanchej.

¹² Mana Caín jinachu kananchej; payqa supaypata kaspa, wauqenta wañucherqa. Imaraykutaj payta wañucherqari? Caimpa ruwasqasnin sajras karqanku, wauqempatataj allin karqanku.

¹³ Wauqesníy, kay pachapi sajrata kausajkunachus chejnisunkichejman chayqa, ama t'ukuychejchu.

¹⁴ Noqanchejqa yachanchej wañuymanta kausayman kutirimusqanchejta wauqesninchejta munakusqanchejwan. Mana munakojqa wañusqallaraj kashan.

¹⁵ Pillapis wauqenta chejnejqa, runa wañuchi; yachankichejtaj runa wañucheqa mana wiñay kausayniyoj kasqanta.

¹⁶ Jesucristo kausayninta noqanchejrayku qorqa, chaypitaj munakuyninta rejsinchej. Ajinata noqanchejpis wauqesninchejrayku kausayninchejta qonanchej tiyan.

¹⁷ Kapuyniyoj runachus, wauqenta pisichikojta rikuspa, mana khuyanmanchu chayqa, imaynamantataj chay runaj sonqompi Diospa munakuynin kanmanri?

¹⁸ Wawitasníy, ama simillawanchu munanakusun, astawanqa ruwanawan, cheqa kajwantaj.

Suyayninchejta Diospi churana

¹⁹ Kay jinamanta yachanchej cheqa kajmanta kasqanchejta; Diospa ñaupaqempitaj sonqosninchej jallch'asqas kasqankuta.

²⁰ Sonqonchejchus imallamantapis k'amiwasunman chayqa, Dios astawan kuraj sonqonchejmanta nisqaqa, tukuy imatataj yachan.

²¹ Munakusqasníy, sonqonchejchus mana k'amiwanchej chayqa, tukuy suyayninchej Diospi kashan.

²² Imallatapis Diosmanta mañakusunchej chayqa, paymanta jap'isunchej; imaraykuchus kamachisqasninta junt'anchej, paypa munasqantataj ruwanchej.

²³ Kaymin Diospa kamachiynenqa: Jesucristo Churimpa sutimpi creespa, ujkuna ujkunawan munanakunanchej, kamachiwasqanchejman jina.

²⁴ Pillapis Diospa kamachisqasninta junt'an chayqa, Diospi kashan, Diostaj paypi. Chaypitaj yachanchej Dios noqanchejpi kashasqanta, qowarqanchej chay Espiritunnejta.