1 Juan 2 - Qheshwa Biblia DC

Cristoqa kutikuwajninchej

¹ Wawitasníy, kay imasta escribimuykichej ama juchallikunaykichejpaj. Pillapis juchallikunman chayqa, Dios Tataj ñaupaqempi kutikuwajninchej tiyan. Payqa cheqan kaj Jesucristo.

² Jesucristoqa wañorqa juchasninchejta pampachanampaj; manataj juchasninchejraykullachu, astawanqa tukuy runaspa juchasninkurayku.

³ Diospa kamachisqasninta kasusqanchejpi yachanchej payta rejsisqanchejta.

⁴ Pillapis Diosta rejsini ninman, kamachisqasnintataj mana kasunmanchu chayqa, llullaqa. Manataj cheqa kaj paypichu kashan.

⁵ Pichus Diospa palabranta waqaychan chayqa, cheqamanta Diospa munakuynin paypi junt'akun. Ajinamanta yachanchej Diospi kasqanchejta.

⁶ Pichus Diospi kani nejqa, paypi purinan tiyan, imaynatachus Jesucristo purerqa ajinata.

Ujkuna ujkunawantaj munanakunamanta

⁷ Munakusqasníy, mana mosoj kamachiytachu escribimuykichej. Ñaupa kaj kamachiyllata escribimuykichej, mayqentachus qallariymanta jap'erqankichej. Kay ñaupa kamachisqayqa Diospa palabran; chaytataj uyarerqankichejña.

⁸ Chaywampis, uj mosoj kamachisqayta escibimuykichej. Chaytaj cheqamin Jesucristopi, ajinallataj qankunapipis. Laqhaqa chinkaripun, cheqa k'anchaytaj lliphipimunña.

⁹ Pichus k'anchaypi kashani nin, wauqentataj chejnin cheqa, laqhallapiraj kashan.

¹⁰ Pichus wauqenta munakojqa k'anchaypi kashan, manataj ni ima misk'anapis paypaj kanchu.

¹¹ Wauqenta chejnikojrí, laqhapi kashan, laqhallapitaj purishan; manataj yachanchu maymanchus rishasqanta; imaraykuchus laqhaqa ñawisninta tutayachin.

¹² Wawitasníy, qankunaman escribimuykichej, juchasniykichejqa pampachasqaña kanku Jesucristo sutinnejta.

¹³ Qankunamampis, tatakuna, escribimuykichej. Qankunaqa qallariymantapacha kajta rejserqankichej. Waynakuna, qankunaman escribimuni. Qankunaqa supayta atiparqankichejña. Wawakuna, qankunaman escribimuni, Dios Tatata rejsisqaykichejrayku.

¹⁴ Tatas, qankunaman escribimuni. Qankuna rejserqankichej ñaupajmantapacha kajta. Waynakuna, qankunaman escribimullaykichejtaj sinch'i kallpayoj kasqaykichejrayku. Diospa palabran qankunapi kashan, supaytataj atiparqankichej.

¹⁵ Ama mundota munakuychejchu, nitaj mundopi kaj imastapis. Pillapis mundota munakun chayqa, Dios Tataj munakuynenqa mana paypichu kashan.

¹⁶ Tukuy ima kay mundopi kajqa, kay jina kanku: Aychaj munapayaynin, ñawispa qhawapayaynin, umata oqhariypiwan. Kay tukuy imaqa mana Dios Tatamantachu, mundomantamin.

¹⁷ Kay mundoqa tukukapushan, jinallataj sajra munapayaynimpis. Diospa munayninta ruwajrí, wiñaypaj kausanqa.

Anticristomanta

¹⁸ Wawitasníy, ñapis tukukuy p'unchaykunaña kanku; uyarerqankichej Cristoj contranta oqharikoj jamunanta. Kunanqa, ashkha anticristos rikhurimunkuña. Chaynejta yachanchej tukukuy p'unchaykunaña kasqankuta.

¹⁹ Chay runasqa noqanchej ukhumanta llojserqanku. Chaywampis mana noqanchejmantachu karqanku. Noqanchejmantachus kankuman karqa chayqa, paykunaqa noqanchejwan qhepakunkuman karqa. Ajinamanta rejsichikunku, mana tukuyninchu noqanchejmanta kasqankuta.

²⁰ Qankunaqa Santo Espirituta Jesucristonejta jap'erqankichej, chayta tukuy yachankichej.

²¹ Mana cheqa kajta, mana rejsejkunaman jinachu escribimuykichej, astawanqa chayta rejsejkunaman jina. Tukuy llullakuypis manamin cheqa kajmantachu.

²² Pitaj llullari, manachu Jesusta mana Cristochu nej? Chay runamá anticristoqa; imaraykuchus Dios Tatata, Churintawan qhesachan.

²³ Pichus Churita qhesachan chayqa, mana Dios Tatayojchu. Pichus Churita sonqompi jap'in chayqa, Dios Tatayoj.

²⁴ Chayrayku, imatachus qallariymantapacha uyarerqankichej, chay qankunapi kakuchun. Qankunapichus, chay qallariymantapacha uyarisqaykichej kakonqa chayqa, qankunapis Churiwan, Dios Tatawan kakunkichej.

²⁵ Kaymá chay wiñay kausayqa, mayqentachus kikin Jesucristo nerqa qonawanchejta.

²⁶ Kay imasta escribimuykichej, qankunata pantachiyta munajkunamanta.

²⁷ Qankunaqa Santo Espirituta Jesucristomanta jap'erqankichej. Payta qankunawan kashan, nitaj pimanta yachachinata munankichejñachu. Santo Espiritoqa, tukuy imata yachachisunkichej. Paypa yachachisqanqa cheqa, manataj llullachu. Chayrayku qankunaqa, Cristowan ujlla kakuychej, imaynatachá Santo Espíritu yachachisorqachej, ajinata.

²⁸ Kunanqa, wawitasníy, Cristowan ujlla kakuychej; qhepa kaj jamuynimpi pay rikhurimojtintaj, mana manchachikuspa, nitaj p'enqakuspa, ñaupaqenman qayllaykunaykichejpaj.

²⁹ Jesucristo cheqan kasqanta yachankichej chayqa, yachallaychejtaj ari, pillapis cheqan kajta ruwajqa, Diospa wawan kasqanta.