1 Crónicas 5 - Qheshwa Biblia DC

Rubempa mirayninmanta kajkuna

^1-3 Israelpa kuraj kaj wawan Rubempa wawasnin karqanku: Hanoc, Falú, Hezrón, Carmi ima. Rubenqa kuraj kaj wawa karqa. Chaywampis tatampa warminwan puñuykusqanrayku kuraj wawaj chayaqentaqa, Israelpa wawan Josej wawasninman qosqa karqa. Chayrayku Rubenqa manaña kuraj wawa jinachu yupasqa karqa. Chanta aswan qhepaman Judaqa hermanosninmanta aswan atiyniyojman tukorqa, paymantataj llojserqa uj kuraj kamachejqa. Jinapis, kuraj wawa kajpa chayaqenqa Josejpatapuni karqa.

^4-6 Joelpa mirayninmanta kajkunataj karqanku: Semaías, Gog, paypatataj Simeí, Micaía, Reaía, Baal, Baalpatataj Beera ima. Beeraqa rubenitaspa kurajninku karqa, waj llajtamantaj pusasqa karqa Asiriaj reynin Tiglat-pilesernejta.

^7-8 Beeraj hermanosnintaj librospi qelqasqa ayllusninkuman jina kurajkunaqa karqanku: Jeiel kuraj kaj, Zacarías, Bela ima. Payqa Asazpa wawan karqa, Semaj allchhintaj. Semataj Joelpa wawan karqa. Belaqa Aroerpi tiyakorqa, jallp'antaj Nebokama, Baal-meonkamataj karqa.

⁹ Inti llojsimuynejman Eufrates mayumantapacha qallarispa ch'in pampaman yaykunakama tiyakorqa. Galaad jallp'api uywasninku maytapuni mirasqanrayku.

¹⁰ Saúl kamachishajtin rubenitasqa maqanakorqanku agarenoswan, atipaykorqankutaj, jinamanta tiyakaporqanku Galaadmanta chay inti llojsimuynej cheqanejpi.

Gadpa mirayninmanta kajkuna

¹¹ Gadpa mirayninmanta kajkunaqa rubenitaspa chimpampi tiyakorqanku, Basán chaynejpi Salca llajtakama.

¹² Basannejpi kuraj kamachejkunaqa karqanku: Joel, qhepantaj Safán, chaymanta Jaanai, chaymantataj Safat.

¹³ Hermanosninkutaj wasi ayllusninkuman jina karqanku: Micael, Mesulam, Seba, Jorai, Jacán, Zía, Heber ima. Tukuypi qanchis karqanku.

¹⁴ Kaykunaqa Abihaialpa wawasnin karqanku. Abihaialtaj Hurejta wawan karqa. Huritaj Jaroajta wawan. Jaroataj Galaadpata, Galaadtaj Mecailpata, Mecailtaj Jesisaipata. Jesisaitaj Jahdojta. Jahdotaj Buzpata.

¹⁵ Aheqa Abdielpa wawan karqa, Gunej allchhintaj. Payqa ayllusninmanta kuraj kamachejninku karqa.

¹⁶ Paykunaqa tukuyninku tiyakorqanku Galaadpi, Basampi, chay qaylla ranchospiwan. Jinataj Sarompi michina campospi chay tinkuyninkama.

¹⁷ Tukuyninku wasi ayllus chay libropi qelqasqas karqanku, Judamanta rey Jotampa tiemposnimpi, jinataj Israelmanta rey Jeroboampa tiemposnimpipis.

Iskay aylluspa khuskanninmanta willaykunas

¹⁸ Rubempa mirayninmanta kajkuna, Gatpamanta kajkuna, jinataj Manasespa khuskan ayllunmanta kajkunapis, sumachaj wapu soldados karqanku escudosninkuwan, espadasninkuwan, arcosninkuwantaj armasqas, maqanakunankupaj jina sumaj wakichisqas. Tukuypi karqanku tawa chunka tawayoj waranqa, qanchis pachaj sojta chunkayoj runas maqanakuman rinankupaj jina.

¹⁹ Paykunaqa maqanakorqanku agarenoswan, Jeturwan, Nafiswan, Nodadwan ima.

²⁰ Diostaj paykunata yanaparqa. Agarenosqa, paykunawan kajkunataj, makisninkuman urmarqanku, maqanakupi kashaspa Diosmanta yanapata mañarikusqankurayku. Diostaj paykunata uyarerqa, paypi suyasqankurayku.

²¹ Chaymantataj enemigosninkoj uywasninkuta apakaporqanku. Chaykunataj tukuypi karqanku: Camellosqa phishqa chunka waranqa, ovejastaj iskay pachaj phishqa chunkayoj, burrostaj iskay waranqa. Chantapis, pachaj waranqa runastawan presosta jap'iykorqanku.

²² Ashkha enemigostaj wañurarqanku, Diospa yanapayninwan maqanaku kasqanrayku. Chay cheqaspitaj tiyakaporqanku waj llajtasman wijch'usqas kanankukama.

²³ Manasespa mirayninmanta khuskan ayllumanta kajkunataj tiyakorqanku, Basán chay cheqamantapacha Baal-hernón, Senir, chanta Hermón orqoskama, paykuna ashkhaman mirasqankurayku.

²⁴ Ayllusninkumanta kamachejkunaqa karqanku: Efer, Isi, Eliel, Azriel, Jeremías, Hodavías, Jahdiel ima. Paykunaqa sumaj wapu soldados karqanku, may mentasqa runas, ayllusninku ukhupitaj kamachejkuna.

²⁵ Chaywampis, ñaupa tatasninkoj Diosnimpa contrampi oqharikorqanku, payta qhesachaspataj paykunaj ñaupaqenkumanta Dios wijch'orqa. Chay runaspa lantisninkuta yupaycharqanku.

²⁶ Chayraykumá Israelpa Diosnenqa, Asiriaj reynin Pulta, jinataj Asiriaj reynin Tiglat-pilesertapis paykunaman apamorqa. Tiglat-pileser reyqa wijch'orqa waj llajtaman rubenitasta, gaditasta, jinataj Manasespa ayllunmanta khuskannintawan ima. Paykunataqa apacherqa Halahman, Haborman, Haraman, Gozán mayumanwan. Chaypitaj kunankama kashanku.