1 Crónicas 27 - Qheshwa Biblia DC

Davidpa waj yanapajkunasnin

¹ Kay jinata israelitasqa yupachikorqanku, wasi aylluspi kamachejkunaman jina, waranqa soldadosta kamachejkuna, pachaj soldadosta kamachejkuna, chay kurajkuna reypa kamachimpi kasharqanku chaykunapiwan, paykunaqa jatun t'aqa soldadosninkuwan khuska sirvej kanku sapa killa mit'asninkuman jina tukuy, sapa t'aqaqa watantinta, iskay chunka tawayoj waranqa runaswan karqa.

² Ñaupaj kaj t'aqa ñaupaj kaj killamanta qhawajkuna soldados payta kamachejninkoqa Zabdielpa wawan Jasobeam karqa.

³ Payrí Farespa miraynninmanta karqa. Ñaupaj killapi yaykoj soldadospa kamachejkunasninkumanta kuraj kamachejnin karqa.

⁴ Iskay kaj qhepan killamanta, qhawajkuna t'aqa soldadospata, Dodai ahohita kamachejninku karqa.

⁵ Kinsa kaj killamanta qhawajkuna t'aqa soldadospata kamachejkunaqa, kuraj sacerdote Joiadaj wawan Benaía karqa.

⁶ Benaiaqa chay kinsa chunka wapukunamanta ujninku kaj karqa, chanta chaykunaj kamachejninkupis. Chaywampis wawan Amisabad chay t'aqapi kamacherqa.

⁷ Tawa kaj killamanta qhawajkuna t'aqamanta soldadospata, kamachejninkoqa Joabpa wauqen Asael karqa. Paypa qhepantataj kamachej wawan Zebadías yaykorqa.

⁸ Phishqa kaj killamanta qhawajkuna t'aqa soldadospata kamachejninkoqa izraita Samhut karqa.

⁹ Sojta kaj killamanta qhawajkuna t'aqa soldadospata Iquespa wawan Ira kamachejninkoqa karqa, Tecoa llajtamanta.

¹⁰ Qanchis kaj killamanta qhawajkuna t'aqa soldadospa kamachejninkoqa Efraín ayllumanta paltita nisqa Heles karqa.

¹¹ Pusaj kaj killamanta qhawajkuna t'aqa kamachejninkoqa Seraj ayllunmanta husatita Sibecai karqa.

¹² Isq'on kaj killamanta qhawajkuna t'aqa soldadospata kamachejninkoqa anatotita Abiezer Benjamimpa ayllunmanta karqa.

¹³ Chunka kaj killamanta qhawajkuna t'aqa soldadospata kamachejninkoqa Nesofamanta Maharai karqa. Paytaj Zeraj ayllunmanta karqa.

¹⁴ Chunka ujniyoj kaj killamanta qhawajkuna t'aqa soldadospata kamachejninkoqa, Piratonmanta Benaía karqa, payqa Efraimpa ayllunmanta karqa.

¹⁵ Chunka iskayniyoj killamanta qhawajkuna t'aqa soldadospata kamachejinkoqa Netofamanta Heldai karqa, payqa Otonielpa mirayninmanta karqa.

¹⁶ Israel tukuynin ayllumanta kamachejkunaqa karqanku: Rubén ayllumanta; Zicrej wawan Eliezer; Simeón ayllumantataj Maacaj wawan Sefatias.

¹⁷ Levéj ayllunmantataj Kemuelpa wawan Hasabías; Aarompa mirayninmantataj karqa Sadoc.

¹⁸ Judá ayllumantataj Davidpa wauqen Eliú karqa. Isacar ayllumantataj Micaelpa wawan Omri karqa.

¹⁹ Zabulon ayllumantataj Abdiaspa wawan Ismael karqa.

²⁰ Efraín ayllumantataj Azaziaspa wawan Oseas karqa. Manasés khuskan ayllumantataj Pedaiaspa wawan Joel karqa.

²¹ Gaalaadpi kasharqa Manasés khuskan ayllumantataj Zacariaspa wawan Iddo karqa. Benjamín ayllumantataj Abnerpa wawan Jaasiel karqa.

²² Dan ayllumantataj Jerohampa wawan Azareel karqa. Kaykuna Israel tukuynin ayllumanta kurajkuna karqanku.

²³ Davidqa mana yupacherqachu iskay chunka watayojmanta sullk'astaqa, Señor nisqanrayku israelitastaqa mirachinanrayku cielopi qoyllurkunata jina.

²⁴ Sarviaj wawan Joabqa yupayta qallarerqa, manataj tukuycharqachu chaynejta Israel aylluman llakiy chayamusqanrayku. Chayrayku mashkhachus kasqankoqa rey Davidpa lista librompi mana rikhurerqachu.

²⁵ Adielpa wawan Azmavetqa reypa palaciompi jallch'aj karqa. Chay chajra poqojkunata jallch'ana wasista waqaychanmanta Uziaspa wawan Jonatantaj churasqa karqa, pirwasta qhawanankupaj, campospi, llajtaspi, ranchospi, lindespi ima.

²⁶ Queludpa wawan Ezritaj chajra jallp'aspi llank'ajkunata kamachisharqa.

²⁷ Uvas huertapi llank'achinamantataj Ramatmanta Simei karqa, vinota jallch'anamanta oqharinamantataj Sefanmanta Sabdi karqa.

²⁸ Geredamanta Baalhanantaj churasqa karqa chay pampa jallp'asnejpi kasharqanku chay olivo sach'asmanta, higos k'ita sach'asmantawan. Aceiteta jallch'anamantataj Joas churasqa karqa.

²⁹ Wakasta michinamantataj Sarompi kikin Saronmanta Sitrai karqa, chay Adlaipa wawan Safattaj vallesnimpi wakasta michinamnta churasqa karqa.

³⁰ Ismaelita Oblitaj camellosta qhawanamanta churasqa karqa. Meronotmanta Hehediastaj burrosta qhawanamanta.

³¹ Agareno Jazitaj ovejasta qhawanamanta churasqa karqa. Tukuy kaykunaqa rey Davidpa kapuyninmanta qhawajkuna karqanku.

³² Davidpa tion Jonatantaj yachayniyoj runa kasqanrayku reypa yuyaychajnin karqa, Hacmonej wawan Jahieltaj reypa wawasninta qhawaj.

³³ Ahitofelpis reypa yuyaychajnin karqa. Arquita Husaitaj reypa yanapajnin karqa.

³⁴ Ahitofelpa qhepantataj reyta yuyaychajkuna karqanku wawan Joiadaj Abiatar ima. Joabtaj, reypa tukuy soldadosninmanta kamachejnin karqa.