1 Crónicas 26 - Qheshwa Biblia DC

Punku qhawajkunawan wajkunawan ima

^1-5 Punkusta qhawajkunapaj rak'irapojtinkutaj kaykuna karqanku: Coreitasmanta, Corej wawan Meselemías, Abiasafpa ayllunmanta karqanku. Meselemiaspa wawasnintaj karqanku: Kuraj kajqa Zacarias, sullk'a kajtaj Jediael, kinsa kajtaj Zebadías, tawa kajtaj Jatniel, phishqa kajtaj Elam, sojta kajtaj Jahanán, qanchis kajtaj Elsoenail. Obed-edompa wawasnintaj karqanku: Ñaupaj kajqa Semaías, iskay kajtaj Jozabal, kinsa kajtaj Joa, tawa kajtaj Sacar, phishqa kajtaj Natanael, sojta kajpatataj Amiel, qanchis kajpata Isacar, pusaj kajpata Peultai. Ajinata Diosqa Obed-edonta ashkha wawaswan bendicerqa.

⁶ Obed-edompa wawan Semaiaspatataj iskay wawasnin karqanku, ayllusninkutataj kamacherqanku wapu runas kasqankurayku.

⁷ Semaiaspa wawasnintaj karqanku Otni, Rafael, Obed, Elzabad, Eliú, Samaquías ima. Kaykunaqa wapu runas karqanku.

⁸ Tukuy kaykunaqa Obed-edompa ayllunmanta karqanku. Wawasninwan wauqesninwanqa ruwanasninkupi rikucherqanku, wapus k'uchistaj kasqanku. Tukuypi Obed-edompa ayllunmanta kajkunaqa sojta chunka iskayniyoj runas karqanku.

⁹ Meselemiaspa wawasnintaj wauqesnimpiwan chunka pusajniyoj karqanku, paykunapis wapu runasllataj karqanku.

¹⁰ Mirarej ayllunmanta, Hosaj wawasnintaj karqanku: Simri, payqa mana kuraj wawapischu karqa, chaywampis tatanqa ayllumpi kamachejta churarqa.

¹¹ Sullk'antaj Hilcias karqa; kinsa kajtaj Tebalías; tawa kajtaj Zacarías karqa, Hosaj wawasnin hermanosnimpiwan tukuypi karqanku chunka kinsayoj.

¹² Kaykuna ukhupi punku qhawana mit'as rak'irakorqa. Paykunaman, kamachejkunasninkuman, jinataj wauqesninkumampis, Diosta yupaychana wasipi ruwanas urmarqa.

¹³ Suerteta choqarqanku sapa punkuman mayqen ayllumantachus yaykunankupaj; chay sorteoman yaykorqanku jatunmanta juch'uykama.

¹⁴ Selemiasman urmarqa inti llojsimuy lado punku, wawan Zacariasmantaj pata lado kaj punku urmarqa. Zacariasqa yachayniyoj umachaj runa karqa.

¹⁵ Obed-edonmantaj ura kaj punku qhawan chayarqa. Paypa wawasninmantaj urmarqa Diosta yupaychana wasipi mikhunasta waqaychana cuartosta qhawanku.

¹⁶ Supimmanwan, Hosamanwantaj inti yaykuy punku urmarqa, chaynej Salequete nisqa punku kashan chaynejpi, wichaynejman rishan chay ñan patapi. Ruwanasninku kajta kay jinata rak'inakorqanku:

¹⁷ Sapa día karqanku inti llojsimuy punkupi sojta qhawajkunas, pata ladonejpitaj tawa, ura lado punkupitaj tawallataj. Sapa uj waqaychana cuartospitaj iskaykama karqanku.

¹⁸ Patiopitaj inti yaykuynejpi, chay ñaupaqennejpi tawa karqanku, kikin patiopitaj iskay qhawajkuna karqanku.

¹⁹ Ajinata punku qhawajkuna Corej, jinataj Mirarej ayllunmanta kajkunaqa ruwanasta rak'inakorqanku.

²⁰ Levitasmanta wakinkunataj churasqas karqanku Diosta yupaychana wasipi chay valorniyoj kaj imasta, jinataj Diospaj t'aqasqa jaywanasta waqaychanankupaj.

²¹ Gersompa mirayninmanta Laadampa wawasnimpa wasi ayllus kamachejkunasninkoqa jehielitas karqanku.

²² Jehielitaj wawasninwan, wauqesnin Zetampa, Joelpa wawasninkupiwan Diosta yupaychana wasej qhapaj kayninta waqaychanankupaj churasqas karqanku.

^23-24 Amrampa mirayninmanta Izharmanta, Hebronmanta, Uzielpa mirayninmantawan imaqa, yupaychana wasipi qhawajkunaj kamachejnin Sebuel karqa. Payqa Moisespa wawan, Gersompa ayllunmanta karqa.

²⁵ Wauqen Eliezerpa ayllunmanta kajkunataj karqanku: Rehabías, payqa Eliezerpa wawan karqa. Rehabiaspa wawantaj Jesahías. Jesahiaspa wawantaj Joram; Jorampa wawantaj Zicri; Zicrej wawantaj Selomit.

²⁶ Selomitwan wauqesninwanqa, Señorpaj t'aqasqa imasta waqaychanankupaj churasqas karqanku, chaykunataqa Señorman t'aqasqanku David, ayllus ukhumanta kamachejkuna, soldadosmanta kamachejkuna ima.

²⁷ Chaykunaqa maqanakusmanta pusamusqasninku, chaykunatataj yupaychana wasita jallch'anapaj nispa waqaychasqanku.

²⁸ Chayllapitaj kasharqa profeta Samuel Señorman llimphuchasqasnin imaspis, chanta Cispa wawan Saulpatapis, Nerpa wawan Abnerpatapis, Sarviaj wawan Joabpatapis. Señorman llimphuchaspa t'aqasqa kajkunamanta waqaychanamanta mink'asqa karqanku Selomitawan wauqesninwan ima.

²⁹ Izharpa mirayninmanta kajkuna, Quenaniaswan wawasnimpiwan imaqa qelqeris jina, jueces jinataj churasqas karqanku Israel ukhupi ch'ajwasta sut'inchanankupaj.

³⁰ Hebrompa mirayninmanta kajkunataj, Jordanmanta inti yaykuynej ladoman kamachinankupaj churasqas karqanku. Señorpaj nisqa ruwanasmanta, chanta reypa ruwanasnin kajmantapis. Chaykunataj karqanku Hasabiaswan, ayllusninwan ima waranqa qanchis pachajniyoj wapu runas.

³¹ David tawa chunka watataña kamachishajtin, payqa allinta waturicherqa Hebrompa mirayninmanta ayllusta. Tarerqankutaj paykuna ukhupi may wapu runas kasqankuta Galaadpi, chay Jazer llajtapi. Hebrompa mirayninmanta kamachejqa Jerías.

³² Wauqesninkuwan imaqa iskay waranqa qanchis pachajniyoj wapu runas karqanku wasi ayllusninkumanta kamachejkuna. Chaykunatataj David churarqa Ruben ayllupi, Gad ayllupi, Manasespa khuskan ayllumpi ima kamachejkunapaj, Señorpaj nisqa ruwanasmanta, reypaj ruwanas kajkunamantapis.