1 Crónicas 22 - Qheshwa Biblia DC

¹ Chayrayku Davidqa nerqa: Kaypi kanqanku Señorta yupaychanapaj wasenqa, jinataj israelitas q'olachinankupaj altarpis.

Diosta yupaychana wasita jatarichinapaj wakichikunku

² Chaymantataj Davidqa kamacherqa tantakunankuta waj llajtayojkuna Israel jallp'api tiyakusharqanku chaykunata mink'arqataj rumi ch'eqojkuna rumistas ch'eqonankupaj Diosta yupaychana wasita ruwanankupaj.

³ Ashkha fierrosta wakichillarqataj punkusta clavanankupaj, tinkuykunasta jap'ichinapaj ima. Ajinallatataj wakicherqa broncetapis may ashkhatapuni.

⁴ Cedro maderatapis mana yupay atinata, imaraykuchus Sidón llajtapi, jinataj Tiropi tiyakojkunaqa may ashkhatapuni cedro maderata apamusqanku.

⁵ Davidqa yuyarqa: Waway Salomonqa waynallaraj, Señorpaj yupaychana wasita oqharinataj may sumaj jatun kashan. Tukuy kaypachamanta aswan mentasqa kanampaj tukuy imatapis wakisqallataña saqesaj. Chayrayku Davidqa manaraj wañupushaspa maytapuni wakicherqa.

⁶ Chaymantataj, wawan Salomonta wajyaspa, Israelpa Diosnimpa Señorpa yupaychana wasinta ruwananta mink'arqa.

⁷ Nerqataj: Wawáy, noqaqa sonqoypi yuyarqani Señor Diosniypaj yupaychana wasinta oqhariytaqa.

⁸ Señortaj niwan: Rikuni qanqa ashkha yawarta jich'asqaykita, ashkha maqanakustataj ruwasqaykita. Chayrayku qanqa yupaychana wasiyta jatarichipuwayta mana atinkichu.

⁹ Qampata uj qhari wawayki kanqa. Chaytaj tukuywan allinta kausakonqa. Chay jawaqa, noqa saqesaj tukuy enemigosninwan allinta kausakunanta. Chayrayku, Salomón sutin kanqa. Tiempompitaj Israelman qosaj sonqo samakuyta, kusiyllata tiyakuytawan.

¹⁰ Pay uj yupaychana wasita jatarichipuwanqa. Payqa waway jina kanqa, noqataj tatan kasaj. Noqataj Israelpi reinonta wiñaypaj sayachisaj.

¹¹ Kunanqa wawáy, Señor qanwan kachun. Señor Diosniykej yupaychana wasinta jatarichiyta atinaykipaj, imaynatachus qan ruwanaykita nisqanman jina.

¹² Señor sumaj yuyayta qosuchun, jinataj allin yachayniyoj kaytapis, maypachachus Israelta kamachishajtiyki, chaypacha Señor Diosniykej leyninta junt'anaykipaj.

¹³ Tukuy imapi allin risonqa, leykunasninta junt'aj churakunki chayqa, jinataj Señorpa nisqasninta, Israelman Moisesnejta kamacherqa chaykunatapis. Kallpachakuy, sinch'itataj sayay; ama iskayrayaychu, amataj manchachikuychu.

¹⁴ Qhaway, mayta llank'aspa Señorta yupaychana wasimpaj wakichisqayta sojta chunka sojtayoj waranqa quintalesta, qorimanta sojta pachaj sojta chunkayoj waranqa quintalesta, qolqemanta, broncemantataj, fierromantapis may chhikata mana pesay atinata. Ajinallatataj wakicherqani rumismanta, maderamantapis, chaymantaj qanqa astawanraj yapanayki tiyan.

¹⁵ Chay jawaqa qampa kamachiykipi kashanku ashkha llank'ajkuna, rumi ch'eqojkuna albañiles, carpinteros, jinataj tukuy ima ruwaypi may chhika llank'ajkuna ima.

¹⁶ Qoriwan, qolqewan, broncewan, fierrowan ima llank'ajkuna. Ajinaqa llank'aj churakuy. Señortaj yanapasuchun.

^17-18 Chaymantataj Davidqa kamacherqa Israelpi tukuy kuraj kamachejkunata wawan Salomonta yanapanankuta, nerqataj: Señor Diosniykichej qankunawan kashan tukuy qayllaykichejpi tiyakojkunawan sonqo samasqapi kausakuyta qosorqachej. Paymin tukuy Israel jallp'api tiyakojkunata kamachiy urapi churan. Kay jallp'ataj Señorpa jinataj Señorpa ayllumpa atiynin urapi kashan.

¹⁹ Chayrayku kunanqa Señor Diosniykichejta mask'aj churakuychej, tukuy sonqowan, yuyayniykichejwantaj. Ajinata usqhayta churakuychej Señor Diosniykichejpa llimphu yupaychana wasinta oqharinaykichejpaj, chanta Señorpa trato ruwasqa cajonninta, chayman apamunaykichejpaj, jinataj Diosta yupaychanapaj, imaschus t'aqasqas kachanku chaykunatapis apamunaykichejpaj, Señorpa yupaychana wasin oqharisqa kanqa chayman.