1 Crónicas 19 - Qheshwa Biblia DC

David atipaykun siriosta amonitastawan

^1-3 Mana chhika unayninmantachu amonitaspa reyninku Nahas wañuporqa. Cuentanmantataj wawan kamacherqa. Chaypacha Davidqa yuyarqa Nahaspa wawan Hanunta khuyaj sonqowan rikunanta, paypa tatanqa, Davidta may khuyakuywan rikusqanrayku, kacharqataj willajkunata Hanunman nimunankupaj, tatampa wañupusqanmanta llakikusqanta willachispa. Maypachachus Davidpa yanapajkunasnin amonitaspa jallp'anman chayajtinkutaj, chaypacha amonitaspa kamachejkunasnin Hanunman nerqanku: Yuyankichu, rey Davidqa runasninta kachamusqanta llakiyninta rikuchinallasumpaj, qampa tataykita jatunchanallampajchu? Paykunaqa jallp'aykita qhawanallankupajchá jamunku, allinta rikunankupaj, wateqanankupajtaj.

⁴ Chaypacha Hanún kamacherqa Davidpa kachasninta presota jap'inankuta, sunkhasninkuta rasphanankuta, p'achasninkutataj chaka patasninkumanta uraman llik'iracherqa. Chaymantataj paykunata kachariporqa.

⁵ Davidman willajtinku, chay kachasninman imaschus pasasqanta; chaypacha kacharqa taripamunankupaj, yuyaspa may p'enqasqaschus kashasqankuta, chay yanapaj kachasnintataj kamacherqa Jericó llajtallapi qhepakunankuta, sunkhasninku wiñanankama, chaymantaraj kutimpunankuta.

⁶ Amonitasqa yacharqanku, Davidqa paykunapaj phiñasqa kashasqanta. Chayraykutaj Hanunwan amonitaswanqa apacherqanku qolqeta sojta pachaj sojta chunkayoj quintalesta, mink'amunankupaj, maqanakunankupaj carretasta, caballosta Mesopotamiamanta, Siriamanta, Maacamanta, Sobamanta ima manaqanakojkuna runasta.

⁷ Chaypitaj chay qolqewan pagaspa mink'arqanku kinsa chunka iskayniyoj waranqa maqanakupaj nisqa carretasta; Maacamanta reyta soldadosnintawan. Kaykunataj chayamuytawan jarankuta sayacherqanku Medelaj ñaupaqempi. Amontapis llajtasnintinmanta jamuspa tantakorqanku maqanakuman yaykunankupaj.

⁸ Davidtaj chayta yachaspaqa, kacharqa Joabta, tukuy soldadostawan.

⁹ Amonitastaj llojsimuspa wakichikorqanku maqanakuman yaykunankupaj chay llajtaman yaykunapi. Jamorqanku chay reykunataj camponejpi kasharqanku.

¹⁰ Joabtaj rikuspa ñaupaqenkumanta, jinataj qhepankumanta maqaj yaykuykamunankuta, chaypacha payqa israelitasmanta aswan sumaj kaj soldadosninta ajllaspa wakichikorqa sirioswan maqanakuman yaykunapaj.

^11-12 Chay puchoj soldadostataj hermanon Abisaejpa kamachiyninman churarqa amonitaswan maqanakuman yaykunankupaj, nerqataj: Sirios atipanayankuman chayqa, qan jamunayki yanapanawaykupaj. Amonitas qanta atipanayasunkuman chayri, noqa jamuspa yanapasqayki.

¹³ Kallpachakuy, tukuy kallpawantaj maqanakunachej jallp'anchejrayku, Diosninchejpa llajtasninraykutaj. Señortaj imachus allin rijch'asqanta ruwachun.

¹⁴ Joabqa soldadosninwan qayllarqa sirioswan maqanakuman yaykunankupaj. Siriostaj ñaupaqenkumanta ayqerqanku.

¹⁵ Amonitastaj sirios ayqesqankuta rikuspa, paykunapis ayqellarqankutaj Joabpa wauqen Abisaej ñaupaqenman llajta ukhumantaj yaykuporqanku. Chaypacha Joabqa Jerusalenman kutiporqa.

¹⁶ Siriosqa, israelitaswan atipaykuchikuspaqa, kacharqanku wajyachimunankupaj Eufrataes mayoj jaqay ladompi kasharqanku chay siriosta. Paykunataqa kamachisharqa Sofac, payqa Hadad-ezerpa soldadosnimpa kamachejnin karqa.

¹⁷ Chaytataj Davidman willarqanku, paytataj chay ratopacha tukuy israelitasta tantaykuspa Jordán mayuta chimparqa, paykunaj contrankupitaj maqanakunankupaj wakichikorqa. Davidtaj soldadosninta siriosman rak'irarqa maqanakuman yaykunankupaj; siriostaj paykunawan maqanakorqanku.

¹⁸ Siriosqa israelitaspa ñaupaqenkumanta ayqekorqanku. Davidtaj carretaspi maqanakojkunamanta wañuracherqa qanchis waranqa soldadosta. Chakipi purej soldadosmantataj tawa chunka waranqata. Siriospa soldadosninkoj kamachejnin Sofactapis wañuchillarqataj.

¹⁹ Hadad-ezerpa yanapajkunasnintaj israelitaswan atipaykuchikuspa, Davidwan allinyakorqanku, paypa kamachiynimpitaj karqanku.

²⁰ Chaymantapachataj Siriosqa manaña ujtawan amonitastaqa yanapayta munarqankuñachu.