1 Crónicas 17 - Qheshwa Biblia DC

Dioswan Davidwan tratota ruwanku

¹ David palaciompi tiyakushajtinña, profeta Natanman nerqa: Noqa cedromanta ruwasqa palaciopi tiyakuni, Dioswan trato ruwasqa cajontaj cortinas urallapi kashan.

² Natantaj kuticherqa: Imachus sonqoykipi kashan chayta ruwallay, Diosqa qanwan kashan.

³ Chay ch'isipachataj Diosqa, profeta Natanman nerqa:

⁴ Riy, kamachiy Davidwantaj parlamuy, willamuytaj noqa Señor nisqayta: Noqa tiyakunaypaj wasita, mana qanchu jatarichipuwanki.

⁵ Israelta orqhomusqanmantapacha kunankamaqa, mana jayk'ajpis yupaychana allin wasipichu tiyakorqani, manachayqa uj toldomanta ruwasqa wasillapi, kaynejpitaj jaqaynejpitaj.

⁶ Tukuy tiempopi paykunawan purisqaypeqa mana jayk'ajpis ni mayqen juezman, aylluyta kamachinankupaj ajllarqani chaykunamantaqa mana mañarqanichu uj yupaychana wasita cedromanta jatarichipunawantaqa.

⁷ Chayrayku niy kamachiy Davidman noqa Tukuy Atiyniyoj Señor, nisqayta: Ovejas tropa chaupimanta, noqa ovejasta michinamanta orqhomorqayki, Israel aylluypa kamachejnin kanaykipaj.

⁸ Mayllamampis rejtiykeqa noqa qanwan rerqani, ñaupaqeykimanta tukuy kaj enemigoykitataj noqa tukucherqani, may mentasqa kanaykitataj ruwasaj, imaynatachus kay pachapi chay allichaj runas uyarisqas kanku ajinata.

⁹ Chay jawaqa, aylluy Israelpaj uj cheqata waquichipuni, chaypitaj kikin jallp'ankupi tiyakunankupaj paykunata churani chaypeqa mana pipis paykunawan chejninakunampaj, nitaj juchasapa runaspa ñaupaqempi jina llakichinankupaj.

¹⁰ Paypachachus Israel aylluyman chay atipachej kuraj runasta churarqani chaypacha, jinataj noqa tukuy enemigosnintinta k'umuykuchisaj. Willachiykitaj mirayniyki ashkha kananta.

¹¹ Maypachachus qampa kausayniyki tukukojtin, wañupojtiykitaj, noqa ujnin aylluykimanta ujnin kajta, rey kanampajtaj churasaj, paytataj kamachinampi allinta sayachisaj.

¹² Pay uj yupaychana wasita jatarichipuwanqa, noqataj kamachinanta wiñaypaj sayachisaj.

^13-14 Noqa paypaj uj tata kasaj, paytaj waway kanqa. Manataj khuyakuyniyta paymanta t'aqasajchu imaynatachus qanmanta ñaupaj reymanta jinataqa, manachayqa wiñaypaj wasiypi, chanta reinoypipis payta churasaj. Reinompis wiñaypaj sayachisqa kanqa.

¹⁵ Natanqa Davidman kay tukuyta willarqa, imaynatachus rikusqanta, imaynatachus uyarisqanta ima.

¹⁶ Chaypacha, rey Davidqa Señorman parlaj rerqa, nerqataj: Señor Diosníy, pitaj noqa kasqani, aylluypis imataj kasqa kaykama chayachimunawaykipajri?

¹⁷ Diosníy, kay tukoyqa pisiraj qanmanqa rijch'asunki, qanqa kay kamachiykej karu jamoj mirayninmantawan parlanki, may sumaj runapis kayman jinata qhawawanki, Señor Diosníy!

¹⁸ Imatawantaj astawan niykiman Señor kay kamachiykita allin runapaj qhawachisqaykimantari? Qanqa rejsinki kay kamachiykitaqa.

¹⁹ Señor, kay t'ukuna imastaqa kay kamachiykita munakusqaykirayku ruwarqanki, qampa allin munayniykiman jina, jatun kayniykita rikuchinaykirayku.

²⁰ Señor, mana pipis qan jina kanchu, manataj qanmanta jawaqa waj dios kanchu, imaynatachus chay tukuy imasta uyarisqaykuman jinaqa.

²¹ Israel aylluyki jinari, mana ujwan pay jina kanchu, payqa uj k'ata nación kay pachapi kajkunamantaqa! Qan, Diosníy, kacharicherqanki aylluyki kanampaj, qantaj may uyarisqa karqanki paykunawan t'ukuna jatuchaj imasta ruwaspa. Qan Egiptomanta orqhomorqanki chay aylluykej ñaupaqenmanta chay waj nacionesta wijch'orqanki.

²² Qanqa Israelta aylluykipaj wiñaypaj jap'erqanki, Señor Diosninkutaj kanki.

²³ Ajinata ari, Señor Diosníy, kay kamachiykiman, mirayninmanwan wiñaypaj junt'ay maychus nisqaykiman jina.

²⁴ Imastachus niwasqaykeqa junt'akuchumpuni, sutiykitaj jatunchasqapuni kachun, nichunkutaj Tukuy Atiyniyoj Diosninmin kasqanta. Payqa cheqamanta Israelpa Diosnin, nisqa. Kamachiyki Davidpa miraynenqa qampa waqaychayniykipi wiñaypaj sayachun.

²⁵ Qan, Diosníy, yachayta qowanki noqaj mirayniyta sayachinaykimanta. Chayrayku noqa kamachiyki kasqaywampis uj imata mañarikusqayki.

²⁶ Qanqa, Señor, Dios kanki, kamachiykimantaj may chhika khuyakuyta qonaykita ninki.

²⁷ Kunantaj kay kamachiykej mirayniyta bendiciyta munarqanki, wiñaypaj makisniykipi waqaychasqas kanankupaj. Qan, Señor, mirayniyta, wiñaypajtaj bendicisqa kanqa.