1 Crónicas 15 - Qheshwa Biblia DC

Davidqa Diospa cajonninta Jerusalenman aparqa

¹ Davidqa wasista ruwakorqa, Davidpa llajtan nisqapi. Diospa cajonninta chaypi churanankupajpis uj cheqata wakichillarqataj; chaytaj karqa uj toldo wasipi.

² Chaypacha kamacherqa: Mana levitasmanta kajkunaqa mana mayqempis Diospa cajonnintaqa apayta atinchu, Señorqa paykunata chayta apaykachanankupajpuni ajllasqanrayku, paypa serviciompipunitaj kanankupaj.

³ Chaymantataj, tukuy israelitasta Jerusalempi tantaykorqa, Diospa cajonnimpaj maypichus wakicherqa chayman apamunankupaj.

⁴ Aarompa mirayninmanta kajkunata, chantá levitasmanta kajkunatapis tantaykullarqataj.

^5-6 Coatpa mirayninmanta kajkunamantaqa pachaj iskay chunkayoj runas karqanku: Uriel, aylluntin ima, Merarej mirayninmantataj iskay pachaj iskay chunkayoj runas kamachejkuna Asaías ayllusnintin ima.

⁷ Gersompa mirayninmanta kajkunamantataj pachaj kinsa chunkayoj runas karqanku: Kamachejninku Joel, ayllusnin ima.

⁸ Elizafampa mirayninmanta kajkunataj iskay pachaj runas karqanku: Semaías kamachejninku ayllusnin ima.

⁹ Hebrompa mirayninmantataj pusaj chunka runas karqanku: Kamachejninku Eliel, ayllusnintin ima.

¹⁰ Uzielpa mirayninmantataj pachaj chunka iskayniyoj runas karqanku: Aminadab kamachejninku, ayllusnin ima.

¹¹ Chaymantataj, Davidqa wajyarqa Sadocta, Abiatarta ima. Paykunaqa sacerdotes karqanku. Levitasmantataj wajyarqa Urielta, Asaiasta, Joelta, Elielta, Aminadabta ima.

¹² Paykunamantaj nerqa: Qankunaqa levitas, ayllumanta kamachejkuna kankichej. Chayrayku llimphuchakuychej ayllusniykichejwan khuska, Israelpa Señor Diosnimpa cajonninta apanaykichejpaj wakicherqani chay cheqaman.

¹³ Ñaupaj kutipi qankuna chayta mana ruwasqaykichejrayku noqanchejmanta ujninchejta Señor wañurparicherqa, Señorta mana tapurispalla, nisqanta mana junt'asqanchejrayku.

¹⁴ Chaypacha sacerdotesqa levitaspis llimphuchakorqanku, leypi imaynatachus nisqanman jina, Israelpa Señor Diosnimpa cajonninta apanankupaj.

¹⁵ Paykunaqa k'aspisninmanta lijrariykukuspa aparqanku, imaynatachus Señor kamacherqa kamachin Moisesnejta chayman jina.

¹⁶ Chaymantataj kamachillarqataj, levitaspa kamachejkunasninta, paykuna ukhu ayllumanta mask'anankuta, takejkunata, tocanasnintinta, salteriosniyojta, arpasniyojta, platillosniyojta ima, sinch'ita sumaj kusiywan takerqanku.

¹⁷ Levitasqa Joelpa wawan Hemanta ajllarqanku, jinallataj Berequiaspa wawan Asaftapia. Payqa Hemampa ayllun karqa. Ajllarqankutaj Merarej wawasninta, hermanosnintapis, Cusaiaspa wawan Etanta jina.

¹⁸ Chay jawaqa ajllarqankutaj chay karu ayllusninkutapis. Paykunaqa chay allinta takejkunamanta qhepallapi karqanku: Zacarías, Jaaziel, Semiramot, Jehiel, Uni, Eliab, Benaía, Maasías, Matatías, Elifelehu, Micnías ima. Chaymanta, Obed-edom, Jeiel ima. Paykuna punku qhawajkuna karqanku.

¹⁹ Takejkunamanta karqanku: Hemán, Asaf, Etán ima. Paykuna churasqas karqanku bronce platillosta ch'ajwachinankupaj.

²⁰ Chantá Zacariaspata, Azielpata, Semiramotpata, Jeielpata, Unejpata, Eliabpata, Maasiaspata, Benaiajpatataj salteriosninku tiyaporqa elamitas jina tocarinankupaj.

²¹ Matatiaspata, Elifelehumpata, Micniaspata, Obed-edompata, Jeielpata, chantá Azasiaspata ima, arpasninku tiyaporqa simionitas jina tocarispa takiyta qallarichinankupaj.

²² Quenaniasqa levitasmanta kamachejninku karqa, paytaj mink'asqa karqa takichinamanta, tukuymanta astawan yachasqanrayku.

²³ Diospa cajonninta qhawanamantaqa, Berequiaswan Elcanawan mink'asqas karqanku.

²⁴ Sacerdotesmantataj Sebanías, Josafat, Natanael, Amasai, Zacarías, Benaías, Eliezer ima Diospa cajonnimpa ñaupaqempi trompetasta tokaj kanku. Obed-edonwan, Jehiaswan Diospa cajonninta qhawaj kanku.

²⁵ Chaypacha Davidqa, Israelmanta kurajkunawan, soldadospa kurajkunasninku ima, kusiywan rerqanku Dioswan trato ruwasqa cajonninta Obed-edompa wasinmanta apamoj.

²⁶ Levitasta Dios yanapasqanrayku Diospa cajonninta apamuypi ruphachiporqanku qanchis novillosta, qanchis corderostawan Diosman ñak'aspa jaywarqanku.

²⁷ Davidtaj sumaj lino p'achawan p'achallisqa rerqa, ajinallatataj Diospa cajonninta apajkuna levitaspis, takejkunapis, takiyta yachachej Quenaniaspis ajina p'achallisqasllataj karqanku. Chay jawa Davidqa linomanta efodwan p'achallisqa rerqa.

²⁸ Tukuy israelitas ajinata aparqanku allinyakuna Dioswan trato ruwasqa cajonnintaqa, kusiywan qhaparkachaspa, pututuspa ch'ajwaynimpi, trompetaspapi, platillospapi, jinataj salteriosta, arpasta tocarispa.

²⁹ Dioswan trato ruwasqa cajonninta Jerusalenman chayachimojtinkukamaqa, Saulpa wawan Mical ventanaman qayllaykorqa. Payqa Davidta kusiywan tusojta rikuspataj, sonqompi sinch'i chejniyta q'enayasqa Davidpaj karqa.